Read CHUYA QELLQA La Biblia en Quechua de Ayacucho 2012 Génesis 40 Bible Online

Génesis 40 - CHUYA QELLQA La Biblia en Quechua de Ayacucho 2012 bible

Génesis 40

¹Chaykuna pasaruptinmi Egipto nacionpi reyman vino serviqwan tanta apaykuq, reyninkupa contranpi pantarurqaku.

²Chaymi rey Faraón vino serviqkunapa kamachiqninpa contranpi hinaspa panaderokunapa kamachiqninpa contranpi piñakururqa.

³Hinaspam Joseypa kasqan carcelman apaykarachirqa, chay carcelqa reyta waqaychaq soldadokunapa capitanninpa wasinpim karqa.

⁴Guardiakunapa capitanninñataqmi chay presokunata Joseyman nanachikunanpaq kunaykurqa, chaypim unay watakuna preso karqaku.

⁵Huk tutam Egipto nacionpi reyman vino serviqwan tanta qoqpas carcelpi kachkaspanku mosqokururqaku, sapa mosqoymi willakuyniyuqkama karqa.

⁶Paqarinnintin qawaqninku hamuspanmi, paykunata sinchi hukmanyasqata José tarirurqa.

⁷Hinaptinmi Faraonpa serviqninkunata, patronninpa wasinpi kaq presomasinkunata José tapurqa: ¿Imanasqataq hukmanyasqa kachkankichik? nispa.

⁸Chaymi paykuna nirqaku: Mosqokurunikum hinaptinmi mana pipas imam ninanta niwaqniyku kanchu, nispanku. Hinaptinmi José paykunata nirqa: Willawaychikyá, Diosmi nisunkichik mosqoynikichikpa imam ninanta, nispa.

⁹Chaymi vino serviqkunapa kamachiqninqa mosqoyninta Joseyman willarqa: Ñoqam mosqoyniypi uvas sachata ñawpaqniypi rikurqani.

¹⁰Chay uvas sacham kimsa kallmayuq kasqa, ikllimuspam sisamuchkasqa, hinaptinmi uvaspa rurun poqorusqa.

¹¹Faraonpa copanñataqmi makiypi kachkasqa, chaymi copanman uvaskunata llapispay Faraonpa makinman copata haywachkasqani, nispa.

¹²Joseyñataqmi nirqa: Kaymi mosqoynikipa imam ninanqa: Kimsa kallmakunam kimsa punchaw.

¹³Kimsa punchawmantam Faraón pusachisuspayki puestoykiman kutiykachisunki, chaymi ñawpaqta hina Faraonman copata servinki.

¹⁴Chayna allinña kaspaykiqa amamá qonqaruwankichu, ama hina kaspaykim rey Faraonta niykapuwanki kay carcelmanta hurqowananpaq.

¹⁵Hebreo casta runakunapa kasqan lawmantam ñoqataqa suwaramuwarqaku. Mana imamantataqmi kay carcelmanpas aparamuwanku, nispa.

¹⁶Vino serviqman mosqoyninpa imam ninanta willaykuptinmi, panaderokunapa kamachiqninpas Joseyta nirqa: Ñoqapas kaynatam mosqokururqani: Umaypim apachkasqani tanta apana patanasqa kimsa yuraq balayta.

¹⁷Alton kaq balaypim kachkasqa Faraonpaq tukuy rikchaq miskillaña tantakuna, hinaptinmi chay apasqay balaymanta alton pawaq animalkuna mikuchkasqa.

¹⁸Chaymi José nirqa: Kaymi mosqoynikipa imam ninanqa: Kimsan balaykunam kimsa punchaw.

¹⁹Kimsa punchawmantam Faraón pusachisunki, hinaspam kunkaykimanta sachaman warkuchisunki, chaymi alton pawaq animalkuna aychaykita mikunqa, nispa.

²⁰Kimsa punchawmantam santonpi Faraón convidota ruwarqa llapallan serviqninkunapaq, hinaspam carcelmanta vino serviqkunapa kamachiqninta chaynataq panaderokunapa kamachiqnintapas hurqochimurqa.

²¹Vino serviqkunapa kamachiqnintam puestonman kutiykachirqa, chaymi Faraonman vinota servirqa.

²²Panaderokunapa kamachiqnintaña-taqmi Joseypa nisqanman hina warkurachirqa.

²³Vino serviqkunapa kama-chiqninñataqmi Joseymanta mana yuyarqachu, aswanqa qonqarurqam.