Read CHUYA QELLQA La Biblia en Quechua de Ayacucho 2012 Génesis 48 Bible Online

Génesis 48 - CHUYA QELLQA La Biblia en Quechua de Ayacucho 2012 bible

Génesis 48

¹Kaykunapa qepantam Joseyman willaykamurqaku: “Taytaykim onqochkan” nispanku, chaymi churin Manasestawan Efrainta pusaspan José rirqa.

²Jacobmanmi willarqaku: “Churiki Joseymi hamuchkan” nispanku. Hinaptinmi Israelqa kallpanchakuywan hatarispan camanpi tiyaykurqa,

³hinaspam Joseyta nirqa: Tukuy Atiyniyuq Diosmi Canaán lawpi Luz sutiyuq llaqtapi rikuriykuwaspan

⁴niwarqa: “Ñoqam churisapata ruwasqayki, achka nacionkunataqmi hatarinqa miraynikimanta. Kay allpatam wiñay herencianku kananpaq miraynikikunaman qosaq” nispan.

⁵Kay Egipto nacionman manaraq hamuchkaptiy kaypi naceq churiki Efrainwan churiki Manasesqa ñoqapa churiykuna hinam kanqa, imaynam Rubenwan Simeón hina.

⁶Paykunapa qepanta nacemuqkunam ichaqa Efrainpa hinaspa Manasespa sutinpi herenciata chaskinqaku.

⁷Pada-narammanta kutimuchkaptiymi mamayki Raquel wañukurqa, Canaán law Efrata llaqtaman riq ñanpa hichpanpi, chaypim pampamurqani. Chay Efrata llaqtapa huknin sutinqa Belenmi, nispa.

⁸Israelmi Joseypa churinkunata riku-ruspa nirqa: ¿Pikunataq paykunaqa? nispa.

⁹Chaymi José nirqa: Paykunaqa Diospa qowasqan, kay Egipto nacionpi naceq churiykunam, nispa. Hinaptinmi Jacob nirqa: Asuykachimuway bendeciykunaypaq, nispa

¹⁰Israelpa ñawinkunam tumpallataña qawakurqa yuyaqña kasqanrayku, chaymi Joseypa churinkuna asuykuptinku Israel abrazaykuspa muchaykarirqa.

¹¹Hinaspam Joseyta nirqa: Manañam piensarqanichu qam rikuykuytaqa, aswanqa Diosmi munan qamtapas chaynallataq churikikunatapas qawaykunayta, nispa.

¹²Chaymi Joseyqa taytanpa moqonmanta warmakunata asurichispan qonqoranpa kumuykurqa.

¹³Joseymi iskaynin churinkunata hapiykuspa taytan Israelman asuykachirqa. Efraintam hapirqa alleq makinwan, Manasestañataqmi ichoq makinwan, hinaptinmi Efrainqa Israelpa ichoq lawninpi karqa, Manasestañataqmi alleq lawninpi.

¹⁴Ichaqa Israelmi alleq makinta haywariykuspan sullka kaq Efrainpa umanman churaykurqa, ichoq makintañataqmi Manasespa umanman. Manasés piwi kasqanta yachastinmi chaynataqa ruwarqa.

¹⁵Joseyta bendecispanmi kaynata nirqa: “Taytay Abrahampa, Isaacpa servisqan Diosmi, nacesqay punchawmantapunim kunankama waqaychawarqa.

¹⁶Tukuy mana allinmanta libraqniy angelyá kay warmakunata bendecichun. Ñoqapa sutiy, taytay Abrahampa sutin chaynataq taytay Isaacpa sutinpas paykunantakama yuyarisqa kachun. Kay pachapiyá sinchillataña mirachunku”, nispa.

¹⁷Efrainpa umanman Jacob alleq makinta churasqanta qawaykuspanmi Joseyqa hukmanyarurqa, chaymi Efrainpa umanmanta hapiykuspa Manasespa umanman churarurqa.

¹⁸Hinaspam taytanta José nirqa: Taytáy, amayá chaynataqa ruwaychu, Manasesmi piwi churiyqa, paypa umanman alleq makikitaqa churaykuy, nispan.

¹⁹Taytanñataqmi mana munaspan nirqa: Yachanim churilláy, Manasespa mirayninpas hatun nacionmi kanqa, ichaqa sullkanmi aswan allin qawasqaqa kanqa, mirayninmantapas achka nacionkunam hatarinqa nispa.

²⁰Chay punchawmi bendecispan Jacob kaynata nirqa: Qamkunapa sutikichikpim Israelpa mirayninkuna bendecinakuspanku ninqaku: “Diosyá yanapasunki Efraintawan Manasesta hina”, nispanku. Puntataqa Efrainpa sutintam rimarirqa Manasespa sutinmantaqa.

²¹Chaymantam Joseyta Israel nirqa: Ñoqaqa wañukusaqñam, ichaqa Diosmi qamkunawan kanqa, hinaspam ñawpaq taytaykichikkunapa allpanman kutichisunkichik.

²²Wawqekikunaman qosqaymantapas mastaqa qanmanmi qoyki, chay allpaqa amorreokunamanta espadaywan chaynataq flechaywan qechusqay Siquem orqokunam karqa, nispa.