Read CHUYA QELLQA La Biblia en Quechua de Ayacucho 2012 Génesis 9 Bible Online

Génesis 9 - CHUYA QELLQA La Biblia en Quechua de Ayacucho 2012 bible

Génesis 9

¹Diosmi Noeyta hinaspa churinkunata bendecispan nirqa: Achka wawa-churiyuq kaspayá kay pachata huntaychik.

²Qamkunam munaychakunkichik purun animalkunapi, alton pawaq animalkunapi, qasqonpa puriq animalkunapi chaynataq lamar qochapi challwakunapipas.

³Chay animalkunatam qoykichik mikunaykichikpaq, qoykichiktaqmi yuyukunatapas chaynataq sachakunatapas.

⁴Kikillanmanta wañusqa animalpa aychantaqa amam mikunkichikchu, yawarninpi kawsaynin kasqanrayku.

⁵Qamkuna wañuchiqtaqa, runa kaptinpas otaq animal kaptinpas cuentatam mañasaq.

⁶ Pipas runamasin wañuchiqtaqa paytapas runamasintaqmi wañuchinqa, runaqa Diosman rikchakuq ruwasqa kasqanrayku.

⁷Qamkunaqa achka wawa-churiyuqyá kaychik, anchallataña miraspa kay pachata huntaychik.

⁸Diosmi Noeytawan churinkunata nirqa:

⁹Ñoqam qamkunawan chaynataq miraynikichikkunawanpas pactota ruwani;

¹⁰ruwanitaqmi alton pawaq animalkunawan, uywa animalkunawan, purun animalkunawan llapallan kay pachapi arcamanta lloqsimuq animalkunawanpas.

¹¹Qamkunawanmi pactota ruwani, manañam huktawanqa kayna sinchi parawan haykam kawsaqkunata nitaq kay pachatapas puchukachisaqñachu, nispa.

¹²Diosqa nirqataqmi: Qamkunawan chaynataq animalkunawanpas wiñaypaq pacto ruwasqaypa señalninqa kaymi kanqa:

¹³Chirapaytam puyupi churani, chay chirapam kay pachapi kawsaqkunawan pacto ruwasqaypa señalnin kanqa.

¹⁴Kay pachapa hawanpi puyurichimuptiymi chirapay chay puyukunapi rikurinqa;

¹⁵hinaptinmi qamkunawan chaynataq llapallan animalkunawan pacto ruwasqayta yuyarisaq. Kaynata hinaqa yakukunapas manañam kay pachapi kawsaqkunata puchukachinqañachu.

¹⁶Puyupi chirapay rikurimuptinmi, chayta qawarispay yuyarisaq qamkunawan chaynallataq llapallan animalkunawanpas wiñaypaq pacto ruwasqayta, nispa.

¹⁷Noeytam Dios nirqa: Chay chirapam kay pachapi llapallan kawsaqkunawan pacto ruwasqaypa señalnin kanqa, nispa.

¹⁸Arcamanta lloqsimuq Noeypa churinkunam kaykuna: Sem, Cam hinaspa Jafet. Camqa karqa Canaanpa taytanmi.

¹⁹Noeypa kay kimsan churinkunamantam kay pachata runakuna huntarqa.

²⁰Chaymantam Noeyqa chakrapi llamkayta qallarispa uvasta plantarqa.

²¹Chaymi vinota upyaruspan paqwayta sinkarurqa carpan ukupi qalalla wischurayanankama.

²²Canaanpa taytan Camñataqmi rikururqa taytan qalalla wischurayasqanta, hinaspanmi hawapi iskaynin wawqenkunaman willaykurqa.

²³Chaymi Semwan Jafetñataq pachata hombronkuman sawakuykuspa qepanpallaman asuykuspanku taytankuta qataykurqaku, chaynapim paykunaqa taytankupa qalalla kayninta mana rikurqakuchu.

²⁴Sinka puñusqanmanta mallaqyaruspanmi, Noeyqa sullka churinpa imam ruwasqanta yacharurqa.

²⁵Chaymi nirqa: ¡Ñakasqa kachun Canaán! Wawqenkunapa esclavonpapas esclavon kachun.

²⁶Tayta Diospa bendecisqanyá Sem kachun, Canaanñataq Sempa esclavon kachun.

²⁷Diospa hatunchasqan [11]Jafet kachun, Sempa carpankunapiyá yachakuchun, Canaanñataqyá Jafetpa esclavon kachun, nispa.

²⁸Sinchi para usyamusqanmantam kimsa pachak pichqa chunka watataraq Noé kawsarqa.

²⁹Noeyqa isqon pachak pichqa chunka watanpiñam wañukurqa.