Read CHUYA QELLQA La Biblia en Quechua de Ayacucho 2012 2~Samuel 13 Bible Online

2~Samuel 13 - CHUYA QELLQA La Biblia en Quechua de Ayacucho 2012 bible

2~Samuel 13

¹Davidpa churin Amnonmi panin Tamarmanta enamorakururqa. Tamarqa karqa Davidpa churin Absalonpa paninmi, payqa ancha kuyayllapaq sipasmi karqa.

²Amonmi panin Tamarmanta enamorakuruspam llakimanta onqorurqa. Tamarqa manaraq qari reqsiq kasqanraykum Amnonqa mana ima ruwaruytapas atirqachu.

³Amnonpam karqa huk amigon ancha sakri runa Jonadab sutiyuq. Payqa Davidpa wawqen Simeapa churinmi karqa.

⁴Paymi Amnonta nirqa: Reypa churin, ¿imanasqataq puncha-punchaw kaynatañaqa hukmanyachkanki? ¿Manachu willaykuwankiman? nispa. Chaymi Amnón nirqa: Wawqey Absalonpa panin Tamarmantam llumpayta enamorakuruni, nispa.

⁵Hinaptinmi Jonadab nirqa: Camaykiman usturuspayki onqoq tukuruy; taytayki watukusuqniki hamuptinñataqmi ninki: “Ama hina kaspayá paniy Tamarta kacharamuway mikuyta ñawpaqniypi yanuruspa qaraykuwaptin mikunaypaq”, nispa.

⁶Chaymi Amnón onqoq tukuruspa camanman ustururqa. Rey watukuq riptinñataqmi kaynata nirqa: Ruegakuykim paniy Tamar hamuspan iskay tortillakunata ñawpaqniypi yanuruspa mikuchiwananpaq, nispa.

⁷Hinaptinmi Davidqa Tamarta qayachispan kaynata nichimurqa: Ama hina kaspaykiyá turiki Amnonpa wasinman rispa mikuyta ruwarapamuy, nispa.

⁸Chaymi Tamarqa turin Amnonpa wasinman rispan camanpi puñuchkaqta tariykurqa. Hinaspanmi harinata chapuruspan ñawpaqninpi tortillata ruwarqa.

⁹Tortilla ruwasqanta haywaykuptinmi Amnonqa mikuyta mana munaspan criadonkunata kaynata nirqa: Kaymanta lloqsiychik, nispa. Llapa runakuna chaymanta lloqsiruptinkum

¹⁰Tamarta Amnón nirqa: Puñunayman apamuspayki simiyman mikuchiway, nispa. Chaymi Tamarqa tortillakuna ruwasqanta turin Amnonpa puñunanman apaykurqa.

¹¹Mikunanpaq ñawpaqninman asuykachiptinmi Tamarta hapiruspan nirqa: Panilláy, hamuy puñusunchik, nispa.

¹²Tamarñataqmi qaparispa nirqa: ¡Ama turilláy! ¡Amayá abusawaychu! Israel nacionpiqa manam kaynataqa ruwanachu. Ama kay millakuypaq penqay-taqa ruwaychu.

¹³¿Maymantaq penqakuyniywan riyman? Qampas Israel nacionpichá penqakuypaq qawasqa kawaq. Mañakuykim reyta kunan niykamunaykipaq, payqa manam casarakunanchiktaqa harkakunqachu, nispa.

¹⁴Amnonmi ichaqa Tamarpa nisqanta mana kasuspan kallpanman hina abusarurqa.

¹⁵Chaymantam Amnonqa Tamarta llumpayta cheqnirurqa. Kuyas-qanmantapas aswanraq cheqnipakuruspanmi nirqa: Hatarispayki kaymanta lloqsiy, nispa.

¹⁶Tamarñataqmi nirqa: Turilláy, ama wischullawaychu, wischu-waynikiqa abusawasqaykimantapas aswan mana allinmi kanman, nispa. Amnonmi ichaqa nisqanta mana kasuspa

¹⁷criadonta qayaykuspan nirqa: Kay warmita hawaman qarqospa punkuta allinta wichqay, nispa.

¹⁸Amnonpa criadonmi Tamarta hawaman wischuruspan punkuta allinta wichqarurqa. Tamarqa rikchaqmana colorniyuq suma-sumaq pachawan pachasqam karqa, chaynataqa pachakuqku reypa sipas churinkunallam.

¹⁹Chaymi Tamarqa uchpata umanman machqekuykuspan suma-sumaq pachantapas llikiparuspan, umanta makinwan hapikuykuspan qaparispa waqastin pasakurqa.

²⁰Chayta turin Absalón yacharuspanmi tapurqa: Panilláy, ¿turiki Amnonchu kayta ruwaramusunki? Amañayá llumpaytaqa hukmanyaychu, turiki kasqanraykuyá upallaruyña, nispa. Chaymi Tamarqa turin Absalonpa wasinman ripukuspan llakisqallaña chaypi yacharqa.

²¹Chaykunamanta yacharuspanmi rey Davidqa sinchita piñakururqa, Amnontam ichaqa piwi churin kasqanrayku mana qaqcharqachu.

²²Absalonpas wawqen Amnontaqa manam imatapas nirqachu, ichaqa panin Tamarta abusasqanmantam cheqnikurqa.

²³Iskay wata pasaruptinmi, Absalonpa runankuna Efraín llaqtapa hichpan Baal-hazor lawpi ovejankunata rutuchkarqaku, Absalonñataqmi reypa churinkunaman convidarqa.

²⁴Absalonmi reyman hamuspan nirqa: Runaykunam ovejaykunata rutuchkanku, chaynaqa ruegakuykim serviq-nikikunawan rinaykipaq, nispa.

²⁵Chaymi Absalonta rey nirqa: Churilláy, manam llapallaykuqa riymankuchu, llumpaytam gastachikikuman, nispa. Absalón llumpayta hikutaptinpas reyqa manam riyta munarqachu, ichaqa Absalontam bendeciykurqa.

²⁶Absalon-ñataqmi nirqa: Mana riyta munaptikiqa ruegakuykim wawqey Amnón ñoqaykuwan rinanpaq, nispa. Chaymi rey tapurqa: ¿Imapaqtaq Amnón rinanta munanki? nispa.

²⁷Ichaqa Absalón hikutasqanraykum reyqa Amnonta wawqenkunawan rinanpaq kachaykurqa. Absalonñataqmi convidota reypa mikunanpaq hina ruwachirqa.

²⁸Hinaspam serviqninkunata kamachirqa: Amnontam allinta qawankichik, sinkaña kachkaptinmi wañurachinaykichikpaq kamachisqaykichik, hinaptinmi ama manchakuspa wañuchinkichik, ñoqam kamachikichik, kallpanchakuspa qarinchakuychik, nispa.

²⁹Hinaptinmi kamachisqanman hina Absalonpa serviqninkuna Amnonta wañurachirqaku. Chaymi reypa churinkuna mulankuman sapakama sillakuykuspanku lluptikurqaku.

³⁰Paykuna ñanllapiraq kachkaptinkum Davidman willaykurqaku: Absalonmi llapallan churikikunata wañurachin, manam hukllapas puchunchu, nispanku.

³¹Hinaptinmi Davidqa pachanta llikiparuspan llumpay llakisqa kasqanrayku pampaman wischukuykurqa, chaynallatam serviqninkunapas ruwakurqaku.

³²Davidpa wawqen Simeapa churin Jonadabñataqmi hamuruspan nirqa: Reynilláy, ama piensaychu llapallan churikikuna wañurusqantaqa, Amnon-llatam wañurachinkuqa; panin Tamarta abusasqan punchawmantaraqmi Absa-lonqa Amnón wañurachiyta tantearqa.

³³Chaynaqa, reynilláy ama piensaychu llapallan churikikuna wañurusqantaqa, Amnonllam wañurunqa, nispa.

³⁴Absalonñataqmi ayqekurqa. Llaqta waqaychaq runa qawarispanmi rikururqa Horonaim llaqtaman riq ñanninta achkallaña runakuna uraykamuchkaqta, chaymi reypa kasqanman rispan nirqa: Orqopa waqtantam achkallaña runakuna uraykamuchkan, nispa.

³⁵Chaymi reyta Jonadab nirqa: Waqaya churikikunaqa ñoqapa nisqayman hina hamuchkankuña, nispa.

³⁶Jonadab rimayta tukuykuchkaptinmi reypa churinkuna chayaramuspanku qaparispa waqarqaku, reypas llapallan serviqninkunawan kuskam waqarqa.

³⁷Absalonñataqmi lluptikuspa Gesur nacionpa reynin Talmaipaman ripukurqa. Talmaiqa Amiudpa churinmi karqa. Davidñataqmi churin Amnonmanta sapa punchaw waqarqa.

³⁸Absalonmi Gesur nacionman ayqekuspan kimsa wata chaypi yacharqa.

³⁹Rey Davidñataqmi churin Amnonpa wañusqanmanta sonqon tiyaruptin tukuy sonqonmanta Absalonta rikuykuyta munarqa.