Read CHUYA QELLQA La Biblia en Quechua de Ayacucho 2012 2~Samuel 16 Bible Online

2~Samuel 16 - CHUYA QELLQA La Biblia en Quechua de Ayacucho 2012 bible

2~Samuel 16

¹Chay orqopa puntanmanta tumpa waklawnintaña David richkaptinmi Mefi-bosetpa serviqnin Siba chaskiqnin lloqsimurqa. Sibaqa hamurqa iskay silla asnokuna pusarisqam hinaspa iskay pachak tantata, pachak sarta uvas pasasta, higos pasasmanta pachak tortillakunata chaynataq huk odre vinota cargakuykuspanmi.

²Chaymi Sibata David tapurqa: ¿Imapaqtaq kaykunata apamurqanki? nispa. Sibañataqmi nirqa: Asnokunaqa reypa ayllunkuna sillakunanpaqmi, tantawan pasaskunañataqmi soldadokuna mikunanpaq, vinoñataqmi chunniqpi pisipaqkuna tomanankupaq, nispa.

³Hinaptinmi rey tapurqa: ¿Maypitaq patronnikipa willkanqa kachkan? nispa. Chaymi Siba nirqa: Jerusalenpim qeparamun, payqa tanteachkan abuelonpa munaychakusqan Israel nacionta kutichipunankutam, nispa.

⁴Reyñataqmi nirqa: Kunanqa Mefi-bosetpa tukuy ima kapuqninpas qampaqñayá kachun, nispa. Chaymi Sibaqa reypa qayllanpi qonqoraykuspa nirqa: Reynilláy, munasqayki ruwasqa kachun, nispa.

⁵Bahurim llaqtaman rey David chayaruptinmi, Saulpa ayllun Gerapa churin Simei lloqsiramuspa reyta ñakarqa.

⁶Hinapanmi Davidta chaynataq llapallan serviqninkunatapas rumiwan chamqarqa, reyñataqmi runankunapa chaynataq waqaychaqnin soldadokunapa chawpinta rirqa.

⁷Kaynata rimaspanmi Davidta Simei ñakarqa: ¡Runamasinta wañuchiq mana allin runa pasaway kaymanta!

⁸Tayta Diosmi pagapusuchkanki rantinpi munaychakunaykipaq Saulpa mirayninkunata wañuchisqaykimanta, chayraykum Tayta Dios munaychakuynikita churiki Absalonmanña qoykun. Runa wañuchiq kasqaykimantam kay sasachakuy haypamusunki, nispa.

⁹Chaymi Sarviapa wawan Abisaiqa reyta nirqa: ¿Pitaq kay wañusqa allqoqa karqa reyta ñakananpaqqa? Kunallanmi wakpa kunkanta kuchuramusaq, nispa.

¹⁰Ichaqa Davidmi nirqa: Sarviapa wawankuna, ñakawasqanmanqa ama chapukuychikchu. Kikin Tayta Dioschá ñakawananpaq kamachimun. Tayta Dios kamachimuptinqa ¿pitaq upallay ninman? nispa.

¹¹Chaymantam Abisaitawan llapallan serviqninkunata David nirqa: Churiypuni wañuchiwananpaq maska-waptinqa razonchiki Benjamín casta runaqa. Tayta Dios chaynata kamachip-tinqa hinayá ñakawachun.

¹²Ichapas ñakarisqayta qawariwaspa, ñakawasqanpa rantinpi Tayta Dios bendeciykuwanmanraq, nispa.

¹³Davidwan serviqninkuna ñanta riptinkum, Simeiñataq ñakastin, rumikunawan chamqamustin chaynataq allpata machqemustin chimpan waq-tanta rirqa.

¹⁴Reyñataqmi llapallan runankunapiwan pisipasqallaña Jordán mayuman chayaruspanku chaypi samarurqaku.

¹⁵Absalonmi Israel runakunapiwan Jerusalén llaqtaman yaykururqa, Ahitofelpas paywanmi yaykurqa.

¹⁶David-pa amistadnin Arqui casta Husai sutiyuq runapas Absalonpa kasqanman chayaruspanmi qaparirqa: ¡Kawsachun rey! ¡Kawsachun rey! nispa.

¹⁷Hinaptinmi Husaita Absalón nirqa: ¿Kaynatachu kuyakuyninmanta David-man kutichinki? ¿Imanasqataq mana paywanchu rirqanki? nispa.

¹⁸Chaymi Absalonta Husai nirqa: Ñoqaqa Tayta Diospa chaynataq Israel nacionpa akllasqan reywanmi qepasaq.

¹⁹Chaynaqa, ¿pitataq servisaq? ¿Manachum churinta? Imaynam taytaykita servirqani chaynatam qamtapas servisqayki, nispa.

²⁰Hinaptinmi Ahitofelta Absalón nirqa: ¿Imaninkichiktaq qamkuna? ¿Imayna-tataq ruwachwanchik? nispa.

²¹Ahitofelñataqmi nirqa: Palaciota waqaychananpaq saqesqan taytaykipa uywanakusqan warmikunawan puñuy, hinaptinmi Israel runakuna taytaykiwan cheqninakusqaykita yachanqaku, chaynapim qanwan kaq llapallan runakuna kallpanchakunqaku, nispa.

²²Chaymi Absalonpaq palaciopa hawanpi carpata ruwarapurqaku, chaypim Absalonqa lliw Israel runakunapa qawasqanta, taytanpa uywanakusqan warmikunawan Absalón puñurqa.

²³Chay punchawkunapiqa Ahitofelpa consejonqa Diospa rimarisqan hinam karqa, Davidpaqpas chaynataq churin Absalonpaqpas.