Read CHUYA QELLQA La Biblia en Quechua de Ayacucho 2012 2~Samuel 21 Bible Online

2~Samuel 21 - CHUYA QELLQA La Biblia en Quechua de Ayacucho 2012 bible

2~Samuel 21

¹Davidpa tiempopim kimsa watan-tin muchuy karqa, chaymi David tapuptin Tayta Dios nirqa: Kay muchuyqa Saulwan runankuna Gabaón llaqtayuq runakunata wañu-chisqankumantam, nispa.

²Gabaón llaqtayuqkunaqa manam Israel castamantachu karqaku, paykunaqa Amor castamanta puchuqkunam karqaku. Israel runakunam paykunaman jurarqaku mana wañuchinankupaq. Saulmi ichaqa Israelpa mirayninkunamanta chaynataq Judapa mirayninkunamanta sientisqanrayku, Gabaón runakunata chinkarachiypi rirqa. Chaymi Gabaón llaqtayuqkunata David qayachimuspan paykunawan rimaspan

³nirqa: ¿Imatataq qamkunapaq ruwayman Saúl contraykichikpi daño ruwasusqaykichikmanta Tayta Diospa llaqtanta bendecinaykichikpaq? nispa.

⁴Gabaón runakunañataqmi nirqaku: Saulmantawan ayllunkunamantaqa manam qoritapas qollqetapas munanikuchu, nitaqmi munanikuchu Israelpi hukllapas wañunantaqa, nispanku. Hinaptinmi David nirqa: Chaynaqa, imam niwasqaykichiktam ruwasaq, nispa.

⁵Paykunañataqmi nirqaku: Israel nacionpi chullallapas mana puchunaykuta munaspam Saulqa chinkarachiwaykupi rirqa.

⁶Chaynaqa, Saulpa mirayninmanta qanchis qarikunata qowayku, hinaptin Saulpa llaqtan Gabaapi Tayta Diospa qayllanpi teqoramunaykupaq, nispanku. Chaymi rey David nirqa: Qosqaykichikmi, nispa.

⁷Saulpa willkan Mefi-bosettam ichaqa mana qorqachu, Mefi-bosetpa taytan Jonatanwan Tayta Diospa qayllanpi juramentota ruwanakusqanrayku.

⁸Ichaqa Armonitawan Mefi-bosettam hapichimurqa, paykunaqa karqaku Ajapa warmi churin Rizpa sutiyuq Saulpa churinkunam. Hapichimurqataqmi Merabpa pichqa wawankunatapas, paykunaqa Saulpa willkankunam karqaku. Merabmi Adrielpa warmin karqa, Adrielqa Mehola llaqtayuq Barzilaipa churinmi karqa.

⁹Paykunatam Gabaón llaqtayuqkunaman David qoykurqa, hinaptinmi Tayta Diospa qayllanpi huk moqopi warkururqaku. Chaytaqa cosecha tiempopim ruwarqaku, cebada rutuy qallarichkaptin.

¹⁰Chaymi Ajapa churin Rizpa, luto pachata rumikunapa hawanpi mastaykuspa chaypi waqtapaykurqa, hinaspam cosecha qallariymanta poqoy para chayamunankama ayakunata cuidarqa. Punchawmi alton pawaq animalkuna mikurunanmanta cuidarqa, tutanñataqmi purun animalkunamanta.

¹¹Saulpa churiwachan Rizpa imam ruwasqanta Davidman willaykuptinkum

¹²Saulpa chaynataq Jonatanpa tullunkunata David rispan apamurqa Galaad lawpi Jabes llaqtayuq runakunapa kasqanmanta. Paykunam suwarurqaku Bet-sán llaqtapa plazanmanta Saulpa chaynataq Jonatanpa ayanta, llapa filisteokuna Gilboa moqopi venceruspa warkurusqankuta.

¹³Davidmi apachimurqa Saulpa chaynataq Jonatanpa tullunkunata, huñuchimurqataqmi warkusqa runakunapa tullunkunatapas.

¹⁴Saulpa chaynataq Jonatanpa tullunkunatam Benjamín ayllupa allpanpi kaq Zela llaqtapi Saulpa taytan Cispa sepulturanpi pamparamurqaku. Reypa kamachisqanman hinam tukuy imata ruwarqaku. Chaymantañam llaqtapa mañakuyninta Dios uyariykurqa.

¹⁵Filisteokunam Israel runakunawan yapamanta guerrapi karqaku, chaymi tropankunawan David rirqa llapa filisteokunawan peleamunanpaq, hinaspam pisiparurqa.

¹⁶Chaymi hatunkaray runakunapa mirayninmanta kaq Isbi-benob Davidta wañurachiyta munarqa. Chay runapa lanzanpa broncemanta puntanmi kimsa kilo masninta llasarqa, weqawninpipas musoq espadatam aparqa.

¹⁷Ichaqa Sarviapa wawan Abisaimi Davidta yanapaspan chay filisteota wañurachirqa. Chaymi Davidpa soldadonkuna juraspa nirqaku: Kunanmanta ñawpaqmanqa manañam ñoqaykuwan guerraman lloqsinkichu, manam munanikuchu Israelpa achkiynin wañurunanta, nispanku.

¹⁸Gob lawpim llapa filisteokunawan yapamanta guerra karqa, chaymi Husa castamanta kaq Sibecai wañurachirqa hatunkaray runakunamanta Saf sutiyuq runata.

¹⁹Huktawanmi Gob lawpi filisteokunawan guerra karqa, chaypim Jairpa churin Elhanán Gat llaqtayuq Goliatta wañurachirqa, paypa lanzanpa kaspinmi karqa telarpa rodillon hina rakusu.

²⁰Kaqllamantam filisteokunawan Gat llaqtapi guerra hatarirqa, chaypim karqa huk hatunkaray runa, makinpipas chakinpipas soqta dedoyuq, llapanpiqa iskay chunka tawayuq dedonkunam karqa; payqa karqa hatunkaray runakunapa castanmi.

²¹Paymi Israel soldadokunata insultarqa, paytam Davidpa wawqen Simeapa churin Jonatán wañurachirqa.

²²Chay tawankum Gat llaqtayuq Rafa sutiyuq runapa miraynin karqaku. Paykunatam Davidwan soldadonkuna wañurachirqaku.