Read CHUYA QELLQA La Biblia en Quechua de Ayacucho 2012 2~Samuel 4 Bible Online

2~Samuel 4 - CHUYA QELLQA La Biblia en Quechua de Ayacucho 2012 bible

2~Samuel 4

¹Abnerpa Hebrón llaqtapi wañurusqanmanta Saulpa churin Is-boset yacharuspanmi pasaypaqta hukmanyarurqa, Israel runakunapas sinchitam mancharikurqaku.

²Is-bosetpam karqa iskay runankuna, Benjamín ayllumanta, Berot llaqtayuq Rimonpa churinkuna: Baana hinaspa Recab. Paykunaqa karqaku salteaq runakunapa kamachiqninkum.

³Beerot llaqtayuq runakunaqa Gitaim llaqtaman lluptiruspankum huklaw llaqtayuq hina chaypi yacharqaku.

⁴Saulpa churin Jonatanpam karqa mana puriy atiq churin Mefi-boset sutiyuq. Mefi-boset pichqa watayuq kachkaptinmi Jezreel llaqtamanta Saulpa hinaspa Jonatanpa wañukusqanku noticia chayaramurqa, hinaptinmi Mefi-bosetpa uywaqnin warmi qepirikuspa utqayman ayqechkaspan chay wawata pampaman kachaykurqa, chaymantapunim suchuña rikurirurqa.

⁵Beerot llaqtayuq Rimonpa churinkunam, Recabwan Baana, chawpi punchaw rupaypi Is-bosetpa wasinman rirqaku. Chayaruspankum Is-bosetta puñuchkaqta tariykurqaku.

⁶Is-bosetpa wasin cuidaq warmim, trigo akllasqanpi puñururqa, hinaptinmi Recabwan wawqen Baana, mana pipa rikusqallanta Is-bosetpa wasinman yaykururqaku.

⁷Hinaspam Is-bosetta caman hawanpi puñuchkaqta wañurachirqaku; chaymantam umanta kuchuruspanku Arabá qechwanta tukuy tuta aparqaku.

⁸Hebrón llaqtaman chayaruspankum, Is-bosetpa umanta rey Davidman qawachispanku nirqaku: ¡Reynillayku, kayqaya wañuchiy mu-nasuqniki enemigoyki Saulpa churin Is-bosetpa umanqa! Kunanmi ichaqa Saulta chaynataq miraynintapas Tayta Dios vengakurun, nispanku.

⁹Chaymi Beerot llaqtayuq Rimonpa churin Recabtawan wawqen Baanata David nirqa: Tukuy sasachakuymanta libraqniy Tayta Diosraykum jurani:

¹⁰Allin willakuypaq hapispa Saulpa wañusqanmanta willawaqniy runatapas, chay willa-wasqanmantam Siclag llaqtapi wañu-rachirqani.

¹¹Qamkunataqa Aswanraqmi wañuchisqaykichik mana huchayuq runata wasinpi puñukuchkaqta wañuchisqaykichikmanta, hinaspam kay pachamanta chinkachisqaykichik, nispa.

¹²Chaymantam soldadonkunata David kamaykachiptin, chay iskaynin runakunata wañurachirqaku. Makinkunatawan chakinkunata kuchuruspankum Hebrón llaqtapi estanquepa waqtanpi warkururqaku. Is-bosetpa umantañataqmi Abnerpa sepulturanpi, Hebrón llaqtapi pamparurqaku.