Read CHUYA QELLQA La Biblia en Quechua de Ayacucho 2012 1~Reyes 14 Bible Online

1~Reyes 14 - CHUYA QELLQA La Biblia en Quechua de Ayacucho 2012 bible

1~Reyes 14

¹Chay tiempopim Jeroboampa churin Abías onqorurqa,

²chaymi warminta Jeroboam nirqa: Huk pachakunawan pachakuy ñoqapa warmiy kasqaykita mana pipas reqsisunaykipaq hinaspa Silo llaqtaman riruy, chaypim kachkan profeta Ahías, paymi niwarqa kay nacionpi rey kanaypaq.

³Chaynaqa, chunka tantakunata, tortata hinaspa huk aysakupi mielta aparikuspa Ahiaspata riruy. Paymi nimusunki imaynam warmanchik kanantapas.

⁴Chaymi Jeroboampa warminqa chaynata ruwaspan Silo llaqtapi profeta Ahiaspa wasinman chayarurqa. Ahiasqa llumpay yuyaqña kasqanraykum manaña rikukurqañachu.

⁵Tayta Diosmi ichaqa Ahiasta nirqa: Jeroboampa warminmi pantachikuspan onqosqa wawanmanta tapukusunaykipaq hamuchkan, qamñataqmi kay nisqayta hinalla ninki, nispa.

⁶Punkuta warmi yaykumusqanta uyariruspanmi Ahías nirqa: Jeroboampa warmin yaykukamuy. ¿Imanasqataq pantachikunki? Qampaqmi llakikuypaq willakuyta Tayta Dios-manta chaskiruni.

⁷Chaynaqa, kutispa Jeroboamman willamuy, Israelpa yupaychasqan Tayta Diosmi kaynata nin: “Runakunamanta akllaykuspaymi Israel nacionpi munaychakunaykipaq churarqayki,

⁸Davidpa mirayninmanta munaychakuyta qechuruspaymi qanman qoykurqayki, ichaqa manam serviqniy David hinachu kamachisqaykunata kasukurqanki; Davidqa tukuy sonqonwanmi munasqayman hina kawsarqa.

⁹Ñawpaq runakunamantapas aswantaraqmi qamqa mana allinkunata ruwarunki, piñachiwanaykipaqmi metalta chulluchispa idolokunata ruwakurunki, hinaspam qepancharuwanki.

¹⁰Chayraykum qampa miraynikikunaman sasachakuykunata apamusaq. Israelpi llapallan qari churikikunatam wañuchisaq, criado kaqtapas chaynataq libre kaqtapas tukusaqmi, manam pipas puchunqachu. Jeroboampa mirayninkunatam tukunankama wanuta pichachkaq hina picharusaq.

¹¹Llaqtapi wañuq aylluykikunapa ayantapas allqokunam mikunqa, campopi wañuqkunatañataqmi ullachkukuna mikunqa. Ñoqa Tayta Diosmi chaynata nini”, nispa.

¹²Qamñataqyá wasikiman kutiy. Llaqtaman chayaykuchkaptikim warmayki wañukunqa.

¹³Hinaptinmi Israelpi llapa runakuna hatun llakikuywan pampanqaku, Jeroboampa ayllunkunamantaqa payllam Tayta Diospa qayllanpi allinpaq qawasqa karqa, chayraykum pay sapallan pampasqa kanqa.

¹⁴Tayta Diosmi Israel nacionpi huk reyta churanqa, paymi kunanmantapuni Jeroboampa mirayninkunata lliwta tukunqa.

¹⁵Imaynam soqosta mayu aytinyachin, chaynatam Tayta Diospas Israel runakunata ñakarichinqa. Ñawpaq taytankuman qosqan sumaq allpamanta qarqoruspanmi Eufrates mayupa waklawninman wischurunqa. Chaynataqa ruwarunqa Asera idolota ruwaruspa Tayta Diosta piñachisqankuraykum.

¹⁶Jeroboampa huchanmantam chaynataq huchallikuspan Israel naciontapas huchallichisqanraykum Tayta Diosqa Israelpa mirayninkunata qoykunqa, nispa.

¹⁷Hinaptinmi Jeroboampa warmin hata-rispa Tirsa llaqtaman chayarurqa, wasin punkuta yaykuykuchkaptinmi warman wañukurqa.

¹⁸Chaymi Israelpa mirayninkuna hatun waqakuywan pamparqaku, profeta Ahiasnintakama Tayta Diospa nisqanman hina.

¹⁹Jeroboampa wakin ruwasqankunapas, guerrakunapi peleasqanpas, imaynam munaychakusqanpas, Israel nacionpi reykunapa vidanmanta willakuq libropim qellqasqa kachkan.

²⁰Jeroboamqa iskay chunka iskayniyuq watam Israelpi munaychakurqa. Wañukuptinmi churin Nadabña paypa rantinpi munaychakurqa.

²¹Tawa chunka hukniyuq watanpim Salomonpa churin Roboamqa Judá nacionpi munaychakuyta qallaykurqa. Chunka qanchisniyuq watam Jerusalén llaqtapi munaychakurqa, chay llaqtatam Tayta Dios akllakurqa chaypi sutinta reqsichikunanpaq. Roboampa mamanqa karqa Naama sutiyuq amonita casta warmim.

²²Judá runakunam Tayta Diospa qayllanpi mana allinkunata ruwarqaku, ñawpaq taytankupa huchallikusqankumantapas aswantaraq huchallikuspankum Tayta Diosta piñachirqaku.

²³Paykunapas alto moqokunapim capillakunata ruwarqaku, hinaspam Asera idolotawan rumimanta kullumanta ruwasqa idolokunata sayachirqaku, sayachirqakutaqmi rapisapa hatun sachakunapa sikinpipas.

²⁴Chay nacionpiqa qarikunapas qarimasillanwan qachakuspankum tukuy rikchaq idolokunataña yupaycharqaku, hinaspam ruwarqaku Israelpa mirayninkunapa qayllanmanta Tayta Diospa qarqosqan runakunapa millakuypaq huchankunataña.

²⁵Pichqa wataña Roboam munaychakuchkaptinmi, Egipto nacionpa reynin Sisac Jerusalenpa contranpi hamururqa.

²⁶Hinaspam Tayta Diospa templonpi chaynataq reypa palacionpi kaq qorita qollqeta apakurqa. Tukuy imata apakuspanmi Salomonpa qorimanta ruwachisqan escudokunatapas apakurqa.

²⁷Chaykunapa rantinpim rey Roboam broncemanta escudokunata ruwachirqa, hinaspam waqaychaqnin soldadokunapa kamachiqninman chaynataq palaciopa punkunta waqaychaq soldadokunaman waqaychanankupaq qoykurqa.

²⁸Chaytam reyta waqaychaq soldadokuna apaqku, Tayta Diospa templonman rey Roboam sapa kuti yaykuptin, hinaspam kasqallan cuartonkuman kutichimuqku.

²⁹Roboampa imaynam kawsasqanpas chaynataq tukuy ima ruwasqankunapas Judá nacionpi reykunapa vidanmanta willakuq libropim qellqasqa kachkan.

³⁰Roboamwan Jeroboamqa sapa kutillam guerrallapi karqaku.

³¹Roboam wañuruptinmi “Davidpa Llaqtanpi” ñawpaq taytankunapa kasqanpi pamparurqaku. Mamanmi karqa Amón casta Naama. Roboampa rantinpim churin Abiamña munaychakurqa.