Read CHUYA QELLQA La Biblia en Quechua de Ayacucho 2012 1~Reyes 19 Bible Online

1~Reyes 19 - CHUYA QELLQA La Biblia en Quechua de Ayacucho 2012 bible

1~Reyes 19

¹Rey Acabmi warmin Jezabelman willaykurqa Eliaspa imam ruwarusqanta hinaspa Baalpa profetakunatapas imaynam wañurachisqanta.

²Chaymi Eliasman Jezabel kaynata nichimurqa: Dioskunayá sinchita castigawachun Baalpa profetankunawan imaynallam ruwasqaykita hina qamtapas paqarin kay horata mana ruwaruptiyqa, nispa.

³Chaymi Eliasqa llumpayta mancharikuspan wañurachinankumanta Judá lawpi Beerseba llaqtaman ayqekurqa, chay llaqtapim criadonta saqerurqa.

⁴Payñataqmi chunniqninta huk punchaw puriyta pasakurqa, chaypim retama sachapa sikinpi tiyaykuspan wañuyta munaspan nirqa: Dios Taytalláy, kaykamallañayá kawsasaq, wañurachiwayña, manam ñawpaq taytaykunamanta aswan allinninchu kani, nispa.

⁵Chaynata niruspanmi retamapa sikinpi siriykuspa puñururqa, hinaptinmi huk ángel llapchaykuspan nirqa: Hatarispa mikuy, nispa.

⁶Eliasñataqmi puñusqanmanta rikchariruspan sawnanpa waqtanpi rikururqa sansapa hawanpi ruwasqa tortillata hinaspa aysakupi yakuta; chayta mikuruspan tomaruspanmi kasqallan puñuykurqa.

⁷Tayta Diospa angelninmi ichaqa yapamanta llapchaykuspan nirqa: Hatarispa mikuy, llumpay karuraqmi rinayki kachkan, nispa.

⁸Eliasñataqmi hatarispan mikurqa hinaspa tomarqa. Chay mikuywan kallpanchakuykuspanmi tawa chunka punchaw tawa chunka tuta rirqa “Diospa orqon” nispa sutichasqa Horeb orqokama.

⁹Chayaruspanmi huk machaypi chay tuta samarurqa. Chaymi Tayta Dios rimapayaspan, nirqa: Yaw Elías, ¿imatataq kaypi ruwachkanki? nispa.

¹⁰Eliasñataqmi nirqa: Tukuy Atiyniyuq Tayta Dios, sonqoymi qanmanta llumpay llakisqa kachkan, Israelpa mirayninkunam pacto ruwasqaykita saqeruspa altarnikikunatapas tuñirachinku. Profetaykikunatapas espadawan wañurachiptinkum sapallayña qeparuni, ichaqa ñoqatapas wañuchi-wanankupaqmi maskawachkanku, nispa.

¹¹Chaymi Tayta Dios nirqa: Hawaman lloqsispa orqoman qespiy hinaspa ñoqapa qayllaypi sayay, nispa. Tayta Dios pasaptinmi, huk sinchi wayrapas orqokunata tuñichispa rumikunata ñutururqa, Tayta Diosmi ichaqa mana chay wayrapichu karqa. Wayra pasaruptinñataqmi terremoto karqa, Tayta Diosmi ichaqa mana chay terremotopichu karqa.

¹²Chay terremoto pasaruptinñataqmi rawrachkaq nina hamurqa, Tayta Diosmi ichaqa mana chay ninapichu karqa. Nina pasaruptinñataqmi llampullamanta chiwiwiwiq wayracha hamurqa.

¹³Chaymi Elías uyariruspan uyanta capanwan tapakuykurqa, machaymanta lloqsiruspanmi machaypa punkunpi sayaykuspa uyarirqa: Yaw Elías, ¿imatataq kaypi ruwachkanki? niqta.

¹⁴Eliasñataqmi nirqa: Tukuy Atiyniyuq Dios Taytalláy, son-qoymi qanmanta llumpay llakisqa tarikun, Israelpa mirayninkunam pacto ruwasqaykita saqeruspa altarnikikunatapas tuñirachinku. Profetaykikunatapas espadawan wañurachiptinkum sapa-llayña qeparuni, ichaqa ñoqatapas wañu-chiwanankupaqmi maskawachkanku, nispa.

¹⁵Chaymi Tayta Dios nirqa: Maymi hamusqayki ñanninta Damasco law chunniqman kutiy hinaspa Hazael sutiyuq runata Siria nacionpi rey ka-nanpaq aceitewan tallispa sapaqchamuy.

¹⁶Nimsipa churin Jehú sutiyuq runatañataqmi Israel nacionpi munaychakunanpaq aceitewan tallispa sapaqchanki, Abel-mehola llaqtayuq Safatpa churin Eliseotañataqmi qampa rantikipi profeta kananpaq churanki.

¹⁷Hazaelpa mana wañuchisqantam Jehú wañuchinqa, Jehupa mana wañuchisqantañataqmi Eliseo wañuchinqa.

¹⁸Ñoqañataqmi Israel nacionpi puchuchisaq qanchis waranqa runakunata, paykunaqa manam Baalpa ñawpaqninpi qonqorakurqakuchu nitaqmi mucharqakuchu, nispa.

¹⁹Chaymanta lloqsispanmi Eliasqa, Safatpa churin Eliseota tarirurqa ya-puchkaqta. Chunka iskayniyuq yunda-kunamantam payñataq huknin yundawan qepallataña yapurqa. Eliasñataqmi Eliseopa waqtanta pasachkaspan capanwan Eliseota capaykachirqa.

²⁰Chaymi Eliseoqa yapusqan yundata saqeruspan Eliaspa qepanta kallparqa, hayparuspanmi nirqa: Ama hina kaspayá saqeykuway tayta-mamayta muchaykuspa despedikaykamunaypaq, chaymantañam qatisqayki, nispa. Eliasñataqmi nirqa: Kutiyá, manam harkakuykichu, nispa.

²¹Kutiruspanmi Eliseoqa iskay yunda torokunata nakarurqa, takllankunawan yugonkunawanñataqmi aychata yanururqa, hinaspam runakunaman mikurachirqa. Chaynata ruwaruspanmi Eliasta qatikurqa paytaña servinanpaq.