Read CHUYA QELLQA La Biblia en Quechua de Ayacucho 2012 2~Reyes 13 Bible Online

2~Reyes 13 - CHUYA QELLQA La Biblia en Quechua de Ayacucho 2012 bible

2~Reyes 13

¹Ocoziaspa churin Joás iskay chunka kimsayuq wataña Judá nacionpi munaychakuchkaptinmi, Jehupa churin Joacaz Israel nacionpi munaychakuyta qallaykurqa. Chunka qanchisniyuq watam Samariapi munaychakurqa.

²Ichaqa Tayta Diospa qayllanpim mana allinkunata ruwarqa, hinaspanmi Israel nacionta huchallichiq Nabatpa churin Jeroboam hina huchallikurqa, chayna ruwaytaqa manam saqerqachu.

³Chayraykum Israel nacionpa contranpi Tayta Dios anchallataña piñakuspan, Siria nacionpa reynin Hazaelman chaynataq churin Ben-adadman unay wata munaychakunanpaq qoykurqa.

⁴Hinaptinmi Tayta Diosta Joacaz qayakurqa, chaymi Israel runakunapa ñakarisqanta qawaspan Joacazpa mañakusqanta Tayta Dios uyariykurqa; paykunataqa Siria nacionpa reyninmi ñakarichirqa.

⁵Chaymi Israel nacionman libraqninta Tayta Dios qoykuptin Siria nacionmanta librakuruspanku ñawpaqta hina wasinkupiña hawka yachakurqaku.

⁶Chaywanpas Israel nacionta huchallichiq Jeroboampa huchallikusqantaqa manam saqerqakuchu. Paykunaqa hinallam huchallikurqaku. Asera idolopas hinallam Samaria llaqtapi karqa.

⁷Siria nacionpa reynin chinkarachispan ñutu allpata hinaña ruwaruptinmi, rey Joacazpa soldadonkunamantaqa puchururqa caballopi sillakuqkunamanta pichqa chunka runakunawan guerrapaq chunka carretakuna hinaspa chakiwan riqkunamanta chunka waranqa soldadokunallaña.

⁸Joacazpa imaynam kawsasqanwan imakunam ruwasqanpas chaynataq mana manchakuspa ruwasqankunapas Israel nacionpi reykunapa ruwasqanmanta willakuq libropim qellqasqa kachkan.

⁹Joacaz wañuruptinmi Samaria llaqtapi pamparurqaku, ñawpaq taytankunapa kasqanpi, paypa rantinpim churin Joasña munaychakurqa.

¹⁰Rey Joás kimsa chunka qanchisniyuq wataña Judá nacionpi munaychakuchkaptinmi, Joacazpa churin Joás Israel nacionpi munaychakuyta qallaykurqa, hinaspanmi Samaria llaqtapi chunka soqtayuq wata munaychakurqa.

¹¹Ichaqa Tayta Diospa qayllanpim mana allinkunata ruwarqa. Israel nacionta huchallichiq Nabatpa churin Jeroboam hinam huchallikurqa, aswanqa hinallam mana allinkunata ruwarqa.

¹²Joaspa imaynam kawsasqanwan imakunam ruwasqanpas chaynataq mana manchakuspa Judá nacionpa reynin Amasiaswan peleasqanpas, Israelpi reykunapa ruwasqanmanta willakuq libropim qellqasqa kachkan.

¹³Joás wañukuptinmi Samaria llaqtapi pamparurqaku, Israelpi reykunapa pampakusqanpi. Paypa rantinpim Jeroboamña munaychakurqa.

¹⁴Wañukunanpaqña Eliseo onqochkaptinmi, Israelpa reynin Joás watukurqa, hinaspam qayllanpi waqaspan nirqa: ¡Taytáy, taytáy, qamqa Israel nacionpaqmi carretakunawan caballopi sillada tropakuna hina karqanki! nispa.

¹⁵Eliseoñataqmi nirqa: Arcotawan flechakunata hapiy, nispa. Chaykunata hapiykuptinmi,

¹⁶Israelpa reyninta Eliseo nirqa: Kunanñataqyá flechanaykipaq hina churakuy, nispa. Chaynata rey ruwaptinmi Eliseopas reypa makinpa hawanman makinta churaykuspan

¹⁷nirqa: Intipa qespimunan lawman kaq ventanata kichay, nispa. Kichaykuptinmi Eliseo nirqa: Flechata kachariy, nispa. Flecharuptinmi Eliseo rimarirqa: ¡Salvananpaq kaq Tayta Diospa flechanmi wak flechaqa, wak flechaqa Siria nacionta venceq flecham. Afec llaqta lawpim Siria soldadokunata tukunaykikama wañuchinki! nispa.

¹⁸Yapamantam Eliseo kamachirqa: Flechakunata hapiy, nispa. Flechakunata Israelpa reynin hapiykuptinmi Eliseo nirqa: Pampata flechawan waqtay, nispa. Reyñataqmi kimsakama waqtaruspan sayarurqa.

¹⁹Chaymi reypaq piñakuspan profeta Eliseo nirqa: Pichqa kutikama otaq soqta kutika-ma pampata waqtaspaqa Siria runakunatam manaña hukllapas puchunankama wañuchiwaq karqa. Chaynaqa, kimsa kutikamallam Siria nacionta vencenki, nispa.

²⁰Eliseo wañukuptinmi pamparur-qaku. Watan-watanmi Moab nacionmanta salteaq tropakuna Israel nacionman hamuqku.

²¹Huk punchawmi wañukuqpa ayanta runakuna pampachkarqaku, hinaspam qonqaymanta salteaq suwakunata rikururqaku, chaymi ayata Eliseopa sepulturanman wischuykuspa ayqekurqaku. Eliseopa tullunkunaman chay wañukuqpa ayan tuparuspanmi kawsarirurqa hinaspam sayarirurqa.

²²Siria nacionpa reynin Hazaelmi Israel runakunata ñakarichirqa rey Joacazpa munaychakusqan watakama.

²³Ichaqa Tayta Diosmi paykunata kuyapayaspan llakipayarikurqa, chaynataqa ruwarqa Abrahamwan, Isaacwan hinaspa Jacobwan pactota ruwasqankuraykum, chaymi kunan punchawkama paykunataqa mana chinkarachirqachu nitaqmi qayllanmantapas wischururqachu.

²⁴Siria nacionpa reynin Hazael wañu-ruptinmi churin Ben-adadña rantinpi munaychakurqa.

²⁵Hazaelmi guerrata ruwaspan rey Joaspa taytan Joacazmanta llaqtakunata qechururqa. Rey Joasqa kaqllamanta chay llaqtakunata kutiykachikurqa. Ben-adadta rey Joás kimsakama venceruspanmi Israelman llaqtakunata kutiykachirqa.