Read CHUYA QELLQA La Biblia en Quechua de Ayacucho 2012 2~Reyes 15 Bible Online

2~Reyes 15 - CHUYA QELLQA La Biblia en Quechua de Ayacucho 2012 bible

2~Reyes 15

¹Israel nacionpi rey Jeroboam iskay chunka qanchisniyuq wataña munaychakuchkaptinmi Amasiaspa churin [4]Azarías Judá nacionpi munaychakuyta qallaykurqa.

²Azariasqa chun-ka soqtayuq watanpim munaychakuyta qallaykurqa pichqa chunka iskayniyuq watam Jerusalén llaqtapi munaychakurqa. Mamanmi karqa Jerusalén llaqtayuq Jecolías.

³Azariasqa Tayta Diospa qayllanpim allin kaqkunata ruwarqa taytan Amasiaspa ruwasqanta hina.

⁴Chaywanpas moqo-kunapi capillakunataqa manam chinkachirqachu, chayraykum runakunapas hinalla chaypi sacrificiokunata ofrecespanku inciensota kañaqku.

⁵Tayta Diosmi rey Azariasta wañunan punchawkama lepra onqoywan ñakarichirqa, chaymi payqa sapaq wasipi yacharqa. Chaynapim palacionpiqa churin Jotamña munaychakurqa.

⁶Rey Azariaspa imaynam kawsasqanwan imakunam ruwasqanpas Judá nacionpi reykunapa ruwasqanmanta willakuq libropim qellqasqa kachkan.

⁷Rey Azarías wañukuptinmi “Davidpa Llaqtanwan” sutichasqankupi pam-parurqaku, ñawpaq taytankunapa kasqanpi. Paypa rantinpim churin Jotamña munaychakurqa.

⁸Judá nacionpa reynin Azarías kimsa chunka pusaqniyuq wataña munaychakuchkaptinmi Jeroboampa churin Zacarías Israelpi munaychakuyta qallaykurqa, hinaspam soqta killa Samaria llaqtapi munaychakurqa.

⁹Ichaqa mana allinkunatam Tayta Diospa qayllanpi ruwarqa, aswanpas ñawpaq taytankuna hina, Israel huchallichiq Nabatpa churin Jeroboam hinam huchallikurqa.

¹⁰Zacariaspa contranpi Jabespa churin Salum hoqarikuruspanmi runakunapa qayllanpi atacaruspan wañurachirqa, hinaspam payña Zacariaspa rantinpi munaychakurqa.

¹¹Zacariaspa imaynam kawsasqanwan imakunam ruwasqanpas Israel nacionpi reykunapa ruwasqanmanta willakuq libropi qellqasqam kachkan.

¹²Chaynapim rey Jehuman Tayta Diospa nisqan cumplikurqa. Tayta Diosmi nirqa: Churikikunam Israel nacionpi willkaykipa willkankama munaychakunqa, nispa.

¹³Judá nacionpi rey Uzías kimsa chunka isqonniyuq wataña munaychakuchkaptinmi Jabespa churin Salum munaychakuyta qallaykurqa. Payqa huk killallam Samaria llaqtapi munaychakurqa.

¹⁴Gadipa churin Manahemmi Tirsa llaqtamanta Samaria llaqtaman rispan Jabespa churin Salumta wañurachirqa, hinaspam Salumpa rantinpi payña munaychakurqa.

¹⁵Salumpa imaynam kawsasqanwan Zacariaspa contranpi hoqarikuspa wañuchisqanpas Israelpi reykunapa ruwasqanmanta willakuq libropim qellqasqa kachkan.

¹⁶Chay tiempopim Manahemqa Tirsa llaqtamanta qallaykuspan Tifsa llaqtata chaynataq muyuriqninpi llaqtakunatapas atacaspan saquearurqa, hinaspam llapa wiksayuq warmikunapa wiksantapas kicharurqa. Chaytaqa ruwarqa Tifsa llaqtapa punkunkunata mana kichasqankuraykum.

¹⁷Judá nacionpa reynin Azarías kimsa chunka isqonniyuq wataña munaychakuchkaptinmi, Gadipa churin Manahem Israel nacionpi munaychakuyta qallaykurqa, hinaspam chunka wata Samaria llaqtapi munaychakurqa.

¹⁸Ichaqa Tayta Diospa qayllanpim mana allinkunata ruwarqa. Israel nacionta huchallichiq Nabatpa churin Jeroboam hinam kawsanan punchawkama huchallikurqa.

¹⁹Asiria nacionpa reynin [5]Tiglat-pilesermi Israel nacionta atacananpaq hamurqa, chaymi rey Manahemqa kimsa chunka kimsayuq waranqa kilo qollqeta Tiglat-pileserman qorqa, Manahempa favorninpi kaspan munaychakuyninpi takyachinanpaq.

²⁰Chay qollqeta huñunanpaqmi Israelpi apukunamanta impuestota Manahem cobrarqa; chay apukunam sapakama parte kilo masnin qollqeta qorqaku, Asiria nacionpa reyninman qonanpaq. Chaynapim Asiria nacionpa reyninqa Israel nacionmanta chaylla kutikurqa.

²¹Rey Manahempa imaynam kawsasqanwan imakunam ruwasqanpas Israel nacionpi reykunapa ruwasqanmanta willakuq libropim qellqasqa kachkan.

²²Rey Manahem wañukuptinmi ñawpaq taytankunapa kasqanpi pamparurqaku, paypa rantinpim churin Pekaiaña munaychakurqa.

²³Rey Azarías pichqa chunka wataña Judá nacionpi munaychakuchkaptinmi, Manahempa churin Pekaía Israel nacionpi munaychakuyta qallaykurqa, hinaspam iskay wata Samaria llaqtapi munaychakurqa.

²⁴Ichaqa Tayta Diospa qayllanpim mana allinkunata ruwarqa. Israel nacionta huchallichiq Nabatpa churin Jeroboam hinam huchallikurqa.

²⁵Pekaiapa contranpim hoqarikururqa Remaliaspa churin Peka. Pekam Argobwan hinaspa Ariewan kuska Ga-laad lawmanta pichqa chunka runakunawan yanapachikuspan rey Pekaiata wañurachirqa, Samaria llaqtapi reypa palacionpi. Chaynapim paypa rantinpi Pekaña munaychakurqa.

²⁶Pekaiapa imaynam kawsasqanwan imakunam ruwasqanpas Israelpi reykunapa ruwasqanmanta willakuq libropim qellqasqa kachkan.

²⁷Rey Azarías pichqa chunka iskayniyuq wataña Judá nacionpi munaychakuchkaptinmi, Remaliaspa churin Peka Israel nacionpi munaychakuyta qallaykurqa. Iskay chunka watam Samaria llaqtapi munaychakurqa.

²⁸Ichaqa Tayta Diospa qayllanpim mana allinkunata ruwarqa. Israel nacionta huchallichiq Nabatpa churin Jeroboam hinam huchallikurqa.

²⁹Israelpi rey Peka munaychakuchkaptinmi Asiria nacionpa reynin Tiglat-pileser Israelman chayarurqa. Atacaspa vencesqan llaqtakunam kaykuna: Ijón, Abel-bet-maaca, Janoa, Cedes, Hazor, Galaad, Galilea hinaspa Neftalí law; venceruspanmi llapa runankunatapas presocharuspan Asiria nacionman aparqa.

³⁰Judá nacionpi Uziaspa churin rey Jotam iskay chunka wataña munaychakuchkaptinmi, Elapa churin Oseas Remaliaspa churin Pekapa contranpi hoqarikuruspan wañurachirqa, chaynapim Pekapa rantinpi Oseasña munaychakuyta qallaykurqa.

³¹Pekapa imaynam kawsasqanwan imakunam ruwasqanpas Israel nacionpi reykunapa ruwasqanmanta willakuq libropim qellqasqa kachkan.

³²Israel nacionpi Remaliaspa churin Peka iskay wataña munaychakuchkaptinmi, Uziaspa churin Jotam Judá nacionpi munaychakuyta qallaykurqa.

³³Payqa iskay chunka pichqayuq watanpim munaychakuyta qallaykurqa. Chunka soqtayuq watam Jerusalén llaqtapi munaychakurqa. Mamanmi karqa Sadocpa churin Jerusa.

³⁴Jotammi Tayta Diospa qayllanpi tukuy imakunatapas allinta ruwarqa, taytan Uziaspa ruwasqanta hina.

³⁵Tayta Diospa templonpa altonpi kaq punkutapas paymi ruwachirqa. Chaywanpas moqokunapi capillakunataqa manam chinkachirqachu, chayraykum runakunapas hinalla chaykunapi sacrificiokunata ofrecespa inciensota kañaqku.

³⁶Jotampa imaynam kawsasqanwan imakunam ruwasqanpas Israel nacionpi reykunapa ruwasqanmanta willakuq libropim qellqasqa kachkan.

³⁷Tayta Diosmi chay punchawkunapi Siria nacionpa reynin Rezintawan Remaliaspa churin Pekata Judá nacionpa contranpi kamachirqa.

³⁸Jotam wañukuptinmi “Davidpa Llaqtanwan” sutichasqankupi pamparurqaku, ñawpaq taytankunapa kasqanpi. Paypa rantinpim churin Acazña munaychakurqa.