Read CHUYA QELLQA La Biblia en Quechua de Ayacucho 2012 2~Reyes 16 Bible Online

2~Reyes 16 - CHUYA QELLQA La Biblia en Quechua de Ayacucho 2012 bible

2~Reyes 16

¹Remaliaspa churin Peka chunka qanchisniyuq wataña munaychakuchkaptinmi, Jotampa churin Acaz Judá nacionpi munaychakuyta qallaykurqa.

²Rey Acazqa iskay chunka watanpim munaychakuyta qallaykurqa. Chunka soqtayuq watam Jerusalén llaqtapi munaychakurqa. Ichaqa manam taytan David hinachu Tayta Diospa qayllanpi allin kaqkunata ruwarqa.

³Aswanqa Israel nacionpi reykunapa kawsasqanta hinam kawsarqa. Israelpa mirayninkunapa qayllanmanta Tayta Diospa qarqosqan runakunapa millakuypaq ruwasqankuta hina ruwaspam paypas churinta sacrificarqa.

⁴Alto moqo capillakunapipas chaynataq rapisapa sachakunapa sikinpipas hinallam sacrificiota ofrecespan inciensota kañarqa.

⁵Chay punchawkunapim Siria nacionpa reynin Rezinwan Israel nacionpa reynin Remaliaspa churin Peka, Jerusalén llaqtaman rirqaku, rey Acazpa contranpi peleanankupaq, ichaqa manam venceyta atirqakuchu.

⁶Chay punchawkunapim Edom nacionpa reynin nacionninpaq Elat llaqtata kutichikurqa, hinaspam Judá nacionniyuq runakunata Elat llaqtamanta qarqorurqa, chaymi Edom runakunaña chayman rispanku kunankama chaypi yachachkanku.

⁷Hinaptinmi rey Acazqa Asiria nacionpa reynin Tiglat-pileserman comisionta kamachirqa kaynata nimunanpaq: Ñoqaqa churiki hina serviqnikim kani, hamuspaykiyá Siria nacionpa reyninmantawan Israelpa reyninmanta libraykuway, paykunam contraypi hamurunku, nispa.

⁸Chaynapim Acazqa Tayta Diospa templonmanta hinaspa reypa wasinmanta qorita, qollqeta hurqoramuspan Asiria nacionpa reyninman regalota apachirqa.

⁹Asiria nacionpa reyninñataqmi chaskiruspan Damasco llaqtapa contranpi peleananpaq rirqa. Venceruspanmi runankunata presochasqata Kir lawman aparqa, wañurachirqataqmi reynin Rezintapas.

¹⁰Chaymantam rey Acazqa Damasco llaqtaman rirqa Asiria nacionpa reynin Tiglat-pileserwan tupananpaq. Damasco llaqtapi altarta rey Acaz qawaykuspanmi, chay altarpa imaynam ruwasqa kasqanpa planonta sacerdote Uriasman apachirqa.

¹¹Sacerdote Uriasmi Damasco llaqtamanta rey Acazpa apachisqan planoman hina altarta ruwarqa, Damasco llaqtamanta rey Acaz kutimunankama.

¹²Damasco llaqtamanta kutiruspanmi rey Acazqa chay altarta qawaykuspan chaypi sacrificiota ofrecerqa.

¹³Chaypitaqmi lliw kañana sacrificiotawan kawsaykunamanta ofrendata ofrecerqa, tallirqataqmi vino ofrendatapas. Dioswan allinlla kasqanmanta wañuchisqan animalpa yawarnintapas chay altarpa hawanmanmi challarqa.

¹⁴Tayta Diospa qayllanpi kaq broncemanta altartañataqmi templopa ñawpaqninmanta asurachispan musoq altarpa norte lawninpiña churarurqa.

¹⁵Hinaspanmi sacerdote Uriasta rey Acaz kamachirqa: Hatun kaq altarpim kañanki tutapay lliw kañana sacrificiota chaynataq tutaykuy kañana kawsaykunamanta ofrendatapas; reypa qosqan lliw kañana sacrificiotawan kawsaykunamanta ofrendatapas. Kañankitaqmi runakunapa lliw kañana sacrificiokunatawan chaynataq kawsaykunamanta ofrendankutapas, tallinkitaqmi vino ofrendankutapas. Lliw kañana animalpa yawarnintawan wañuchisqa ani-malkunapa yawarnintapas chaymanmi challanki. Broncemanta altarmi ichaqa ñoqapaq kanqa Tayta Diosta tapunaypaq, nispa.

¹⁶Chaymi sacerdote Uriasqa rey Acazpa kamachisqanta hina lliwta ruwarqa.

¹⁷Chaymantam rey Acazqa lavatoriokunapa tiyanan tablakunata hurqorachirqa, hurqorachirqataqmi broncemanta ruwasqa torokunapa hawanpi tiyaq estanquetapas, hinaspam empedrasqa pampapiña tiyarachirqa.

¹⁸Samana punchawpaq templopi corredor hatarichisqankutapas chaynataq reypa yaykunan punkutapas Asiria nacionpa reyninta agradananpaqmi hurqorachirqa.

¹⁹Acazpa imaynam kawsasqanwan imakunam ruwasqankunapas Judá nacionpi reykunapa ruwasqanmanta willakuq libropim qellqasqa kachkan.

²⁰Acaz wañuruptinmi “Davidpa Llaqtanwan” sutichasqankupi pamparurqaku, ñawpaq taytankunapa kasqanpi. Paypa rantinpim churin Ezequiasña munaychakurqa.