Read CHUYA QELLQA La Biblia en Quechua de Ayacucho 2012 2~Reyes 23 Bible Online

2~Reyes 23 - CHUYA QELLQA La Biblia en Quechua de Ayacucho 2012 bible

2~Reyes 23

¹Rey Josiasmi Judá nacionpi chaynataq Jerusalén llaqtapi llapa ancianokunata huñurachimurqa.

²Hinaspam reyqa Tayta Diospa tem-plonman rirqa, Judá nacionniyuq runa-kunawan, Jerusalén llaqtapi yachaq-kunawan, sacerdotekunawan, profeta-kunawan, llapallan llaqtakunapi yachaq-kunawan, rirqakutaqmi taksapas hatun-pas. Paykunapa qayllanpim reyqa leerqa, templopi tarisqanku Tayta Diospa pacto ruwasqan librota.

³Hinaspam reyqa pilarpa waqtanpi sayaykuspan Tayta Diospa qayllanpi contratota ruwarqa. Chayman hinam prometekurqa Tayta Diosta qatinanpaq, kamachikuyninkunatapas, yachachikuyninkunatapas, decretonkunatapas tukuy sonqonwan hinaspa tukuy vidanwan kasukunanpaq, prometekurqataqmi Diospa pacto ruwasqan libropa nisqanta cumplinanpaqpas. Chaypi kaq llapallan runakunapas chaynata ruwanankupaqmi prometekurqaku.

⁴Chaymantam rey Josiasqa sumo sacerdote Hilciastawan, wakin sacerdotekunata, punkuwan cuentallikuqkunata kamachirqa, Baal idolota, Asera idolota chaynataq cielopi llapallan chaskakunata servinankupaq ruwasqanku kaqkunata Tayta Diospa templonmanta hurqomunankupaq. Chaykunatam kañarqa Cedrón pampapi, Jerusalén llaqtamanta hawapi, uchpantapas Bet-el llaqtamanmi apachirqa.

⁵Judá nacionpa llaqtankunapi chaynataq Jerusalén llaqtapa muyuriqnin moqokunapi kaq capillankunapi incienso kañanankupaq Judá nacionpi reykunapa churasqan sacerdotekunatapas qarqorurqam. Qarqorurqataqmi Baalman, intiman, killaman hinaspa llapallan chaskakunaman incienso kañanankupaq churasqanku sacerdotekunatapas.

⁶Tayta Diospa templonpi kaq Asera idolotapas hurqorachispanmi Jerusalén llaqtamanta hawaman aparuspan Cedrón wayqopi kañarurqa uchpayanankama. Uchpantañataqmi llaqta runakunapa pampakunanman machqeparurqa.

⁷Tuñichirqataqmi templopa pationpi qaripas warmipas qachakuyninkuwan idolokunata servinanku cuartokunatapas, chay cuartokunapim warmikunapas Asera idolopaq pachakunata awaqku.

⁸Judá nacionpi llapa sacerdotekunata Jerusalenman huñurachimuspanmi, chay sacerdotekunapa incienso kañananku moqokunapi capillakunatapas millakuypaqta ruwarurqa, Geba llaqtamanta qallaykuspa Beerseba llaqtakama. Tuñichirqataqmi llaqtapa gobernadornin Josueypa punkunpi demoniokunapaq ruwasqanku capillakunatapas. Chay punkuqa karqa llaqtapa punkunpa ichoq lawninpim.

⁹Moqokunapi incienso kañaq sacerdotekunaqa manam seqaqkuchu Jerusalén llaqtapi kaq Tayta Diospa altarninmanqa, aswanqa sacerdote masinkunawan kuskam mana levadurayuq tantata mikuqku.

¹⁰ Rey Josiasqa, Hinom qechwapi churinku kañananku [7]Tofettapas milla-kuypaqtam ruwarurqa, chaynapi manaña pipas churinta Moloc idoloman kaña-nankupaq.

¹¹Judá nacionpi reykunapa intiman qosqanku caballokunatapas chinkarachirqam. Chay caballokunaqa karqa reyta serviq Natán-melecpa cuartonpa hichpan punkupim otaq templopa pationpim. Natán-melecmi chay caballokunamanta nanachikuq. Kañarurqataqmi intita yupaychananku carretakunatapas.

¹²Tuñirachirqam Acazpa wasinpa qatanpi kaq altarkunatapas, chaykunataqa Judá nacionpa reyninkunam hatarichirqa. Tuñichirqataqmi Tayta Diospa templopa iskaynin pationkunapi rey Manasespa hatarichisqan altarkunatapas. Ñutuparuspanmi allpantapas Cedrón wayqoman wischuramurqa.

¹³Tuñichirqataqmi Jerusalenmanta intipa qespimunan lawninpi, Olivos moqopa sur lawninpi tarikuq capillakunatapas. Chaykunatam Israelpa reynin Salomón hatarichirqa Sidón llaqtapa millakuypaq Astoret idolonkupaq, moabitakunapa cheqnipay Quemos idolonkupaq chaynataq amonitakunapa millakuypaq Milcom idolonkupaqpas.

¹⁴Ñutuparurqataqmi rumimanta ruwasqa idolokunatapas, Asera idolokunatapas, chaykunata hur-qosqanku sitiokunamanpas runakunapa tullunkunawanmi huntarachirqa.

¹⁵Tuñichirqam Bet-elpi altartapas, chay altartaqa Israel nacionta huchallichiq Nabatpa churin Jeroboammi hatarichirqa. Chaymantam uchpayanankama kañarurqa. Asera idolotapas kañarurqam.

¹⁶Kutichkaspanmi rey Josías rikururqa chay moqopa waqtanpi sepulturakunata, chaymi runakunata kachaspan tullukunata hurqorachimurqa, hinaspam chay altarpi kañarurqa millakuypaqña kananpaq, chaynapim profetantakama Tayta Diospa nisqan cumplikurqa.

¹⁷Chaymantam rey Josías tapukurqa: ¿Pipa sepulturantataq wakpi qawachkani? nispa. Runakunañataqmi nirqaku: Wakqa Judá nacionmanta hamuq Diospa profetanpa sepulturanmi. Kay Bet-elpi kunan ruwasqaykikunatam payqa rimarqaña. Paypa nisqallantam ruwarunki, nispanku.

¹⁸Hinaptinmi rey Josías nirqa: Amam paypa tullunkunataqa kuyuchinkichikchu, nispa. Chaynapim paypa tullunkunatawan Samaria llaqtamanta hamuq profetapa tullunkunataqa mana kuyuchirqakuchu.

¹⁹Tayta Diosta piñachinankupaq Israel nacionpi reykunapa Samaria llaqtapa muyuriqninpi hatarichisqanku capillakunatapas lliwtam, Bet-el llaqtapi ruwasqanta hinam rey Josiasqa chinkarachirqa.

²⁰Alto moqokunapi kaq capillakunapi sacerdotenkunatapas hina chay altarkunallapim lliwta wañurachirqa, chaypitaqmi runakunapa tullunkunatapas kañarurqa, hinaspam Jerusalén llaqtaman kutikurqa.

²¹Rey Josiasmi llapallan runakunata kamachispan nirqa: Kay pacto libropi qellqasqaman hinayá yupaychasqanchik Tayta Diospaq Pascua fiestata ruwaychik, nispa.

²²Pascua fiestataqa Israel nacionta juezkunapa kamachisqan watamantaraqmi mana ruwarqakuñachu, Israel nacionpi reykunapa tiemponpipas nitaq Judá nacionpi reykunapa tiemponpipas manam ruwarqakuchu.

²³Chunka pusaqniyuq wataña rey Josías munaychakuchkaptinmi Jerusalén llaqtapi Pascua fiestata ruwarqaku.

²⁴Rey Josiasqa qatipaqkunatapas, layqakunatapas, qayaqkunatapas, rik-chaqmana idolokunatapas chaynataq wasikunapi idolokunatapas, idolo-kuna yupaychanankupaq ruwasqanku millakuypaq kaqkunatapas Judá nacionmantawan Jerusalenmantam chinkarachirqa. Chaytaqa ruwarqa templopi sacerdote Hilciaspa tarisqan libropi Tayta Diospa yachachikuyninta cumplinanpaqmi.

²⁵Manam mayqan reypas karqachu rey Josías hina Tayta Diosman kutirikuqqa; payqa tukuy sonqonwan, vidanwan hinaspa tukuy kallpanwanmi Moisespa qellqasqan yachachikuykunata ruwayman churarqa. Pay hinaqa manam huk reyqa karqachu ñawpaqtapas nitaq qepatapas.

²⁶Chaywanpas Tayta Diospa piñakuyninqa ratachkaq nina hinam karqa Judá nacionpa contranpi, Manasespa tukuy mana allinkuna ruwasqanmanta.

²⁷Chayraykum Tayta Dios nirqa: Israel nación wischusqayta hinam Judá naciontapas qayllaymanta wischusaq. Kay akllasqay Jerusalén llaqtatapas qepanchakurusaqmi, qepanchakurusaqtaqmi “Sutiytam chaypi churasaq” nisqay templotapas, nispa.

²⁸Josiaspa imaynam kawsasqanwan imakunam ruwasqanpas Judá nacionpi reykunapa ruwasqanmanta willakuq libropim qellqasqa kachkan.

²⁹Chay tiempopim Egiptopa reynin Faraón Necao Eufrates mayukama rirqa, chaynapi Asiria nacionpa reyninta yanapananpaq. Rey Josiasñataqmi rey Necaopa contranpi rirqa, ichaqa rey Necaomi rikuruspan rey Josiasta Meguido llaqtapi wañurachirqa.

³⁰Hinaptinmi runakunaqa carretaman wañusqataña churkuruspanku Meguido llaqtamanta Jerusalén llaqtaman aparuspanku kikinpa sepulturanpi pamparurqaku. Hinaspankum Josiaspa rantinpi churin Joacaztaña aceitewan tallispa rey kananpaq churarqaku.

³¹Rey Joacazmi iskay chunka kimsayuq watanpi munaychakuyta qallaykurqa. Kimsa killallam Jerusalén llaqtapi munaychakurqa. Mamanmi karqa Libna llaqtayuq Jeremiaspa churin Hamutal.

³²Rey Joacazqa ñawpaq taytankuna hinam Tayta Diospa qayllanpi mana allinkunata ruwarqa.

³³Jerusalenpi mana munaychakunanpaqmi rey Joacazta Faraón Necao, Hamat nacionpi kaq Ribla llaqtapi presocharurqa. Judá nacionniyuq runakunatapas kimsa waranqa kimsa pachaknin kilo qollqewan hinaspa kimsa chunka kimsayuq kilo qoriwanmi multarurqa.

³⁴Hinaspanmi Faraón Necaoqa rey kananpaq Josiaspa huknin churin Eliaquimtaña churarurqa, chaynapi taytanpa rantinpi munaychakunanpaq. Rey Eliaquimpa sutintam Joacinman tikrarurqa. Joacaztañataqmi Egipto nacionman pusaruptin chaypi wañukurqa.

³⁵Rey Joacinmi Faraonman qoritawan qollqeta qorqa. Chaypaqmi Judá nacionpi kapuqniyuq runakunamanta qorinpi qollqenpi impuestota mañaspan Faraón Necaoman qorqa.

³⁶Rey Joacimqa iskay chunka pichqayuq watanpim munaychakuyta qallaykurqa, chunka hukniyuq watam Jerusalén llaqtapi munaychakurqa. Mamanmi karqa Ruma llaqtayuq Pedaiaspa churin Zebuda.

³⁷Rey Joacimqa ñawpaq taytankuna hinam Tayta Diospa qayllanpi mana allinkunata ruwarqa.