Read CHUYA QELLQA La Biblia en Quechua de Ayacucho 2012 2~Crónicas 13 Bible Online

2~Crónicas 13 - CHUYA QELLQA La Biblia en Quechua de Ayacucho 2012 bible

2~Crónicas 13

¹Chunka pusaqniyuq wataña rey Jeroboam munaychakuchkaptinmi, rey Abiasqa Judá nacionpi munaychakuyta qallaykurqa.

²Kimsa watam Jerusalén llaqtapi munaychakurqa, mamanmi karqa Gabaa llaqtayuq Urielpa churin Micaías. Abiaswan Jeroboamqa guerrapim karqaku.

³Abiasmi guerra peleayta qallaykurqa tawa pachak waranqa akllasqa allinnin qari-qari soldadonkunawan, Jeroboampas Abiaswan peleananpaqmi alistarqa pusaq pachak waranqa akllasqa allinnin qari-qari soldadokunata.

⁴Abiasmi Efraín law orqokunapi kaq Zemaraim orqopi sayaykuspan qayakurqa: ¡Jeroboam, Israel nacionniyuq runakuna, uyariwaychik!

⁵¿Manachu yacharqanki-chik Israelpa yupaychasqan Tayta Diosqa Davidmanwan mirayninkunaman Israel nacionpi munaychakuyta pactota ruwaspan wiñaypaq qosqanta?

⁶Ichaqa Nabatpa churin Jeroboammi, Davidpa churin Salomonpa serviqnin kachkaspan contranpi hoqarikururqa.

⁷Jeroboammanmi hukllawakururqa mana allin runakunawan qella runakuna, paykunam Salomonpa churin Roboampa contranpi hoqarikururqaku, Roboamñataqmi warmallaraq kaspa mana tanteakuq kasqanrayku mana imayna rimarikuyta atirqachu.

⁸Kunanñataqmi Tayta Diospa munaychakuyninpa contranpi hatarichkankichik Davidpa mirayninkunapa kachkaptinpas achkallaña kasqaykichikrayku, hinaspam Jeroboampa qorimanta ruwachisqan torillokunataña diosnikichikpaq hapirunkichik.

⁹Qamkunaqa Tayta Diospa churasqan Aaronpa miraynin sacerdotekunatawan levitakunatapas qarqoruspam, imaynam Diosta mana reqsiq nacionkunapas sacerdotenkuta churakunku chaynam qamkunapas sacerdotekichikkunata churakurunkichik. Qamkunaqa pipas malta torotawan qanchis carnerokunata apamuspa sacerdote kay munaqtam idoloykichikkunapa sacerdoten kananpaq churarunkichik.

¹⁰Ñoqaykupa Diosniykuqa Tayta Diosmi, paytaqa manam saqerqanikuchu. Tayta Diospa serviqnin sacerdotekunapas kachkan Aaronpa mirayninkunam, yanapaqninkunapas kachkan levitakunam.

¹¹Paykunam sapa tutapayta, sapa tardeykuyta, Tayta Diospaq lliw kañana sacrificiota hinaspa miski asnaq inciensokunata ofrecenku; ofrecenkutaqmi qorimanta mesapi patanasqa tantakunatapas, sapa tardentaqmi qorimanta candelabropi mecherokunatapas ratachinku. Ñoqaykuqa Tayta Diospa kamachikuynintam kasukuniku, qamkunam ichaqa qepanchakurunkichik.

¹²Chaynaqa, yachaychikyá, Diosniykuqa kamachiqniyku hinam ñoqaykuwan kachkan, trompeta tocaq sacerdotekunapas ñoqaykuwantaqmi kachkan qamkunapa contraykichikpi tocanankupaq. Chaynaqa, Israelpa mirayninkuna, ñawpaq taytaykichikpa Diosninpa contranpiqa amayá peleaychikchu, manam imaynata ruwaspapas venceyta atiwaqchikchu, nispa.

¹³Jeroboammi ichaqa wakin soldadonkunata kamarachirqa Judá soldadokunata qepanmanta atacamunankupaq, chaynapim Jeroboampa wakin soldadonkunaqa Judá runakunapa qepanpiña kachkarqaku.

¹⁴Judá soldadokuna qepankuta qawarikuspankum musyakururqaku ñawpaqninkumantawan qepankumanta soldadokuna atacamusqanta, chaymi Tayta Diosta mañakurqaku, sacerdotekunañataqmi trompetata tocarqaku.

¹⁵Chaymi Judá soldadokuna guerrapaq qapariptinku, Jeroboamtawan Israel runakunata Tayta Dios vencerurqa, chaynataqa ruwarurqa Abiaspa hinaspa Judá runakunapa qayllanpim.

¹⁶Hinaptinmi Israel tropakuna Judá runakunapa qayllanmanta ayqekurqaku, chaynatam paykunata Judá soldadokunapa makinman Tayta Dios churaykurqa.

¹⁷Rey Abiasmi soldadonkunapiwan Israel runakunata wañurachirqaku pichqa pachak waranqa akllasqa soldadokunata.

¹⁸Chaynapim Israel runakunaqa penqaypi karqaku, Judá runakunam ichaqa kallpanchasqa karqaku ñawpaq taytankupa Diosninpi hapipakusqankurayku.

¹⁹Abiasmi Jeroboamta qatikacharqa, hinaspam kay llaqtakunata qechururqa: Bet-elta llaqtachantinkunata, Jesanata llaqtachantinkunata hinaspa Efraintapas llaqtachantinkunata.

²⁰Rey Abiaspa tiemponpiqa manañam Jeroboamqa atiyniyuqñachu karqa, chaynapim Jero-boamman onqoyta Tayta Dios qoykuptin wañururqa.

²¹Abiasñataqmi aswan más atiyniyuq rikurirurqa. Warminkunam karqa chunka tawayuq, paykunapim karqa iskay chunka iskayniyuq qari churinkuna hinaspa chunka soqtayuq warmi churinkuna.

²²Abiaspa imaynam kawsasqanwan imakunam ruwasqanpas, profeta Iddopa qellqasqan libropim qellqasqa kachkan.