Read CHUYA QELLQA La Biblia en Quechua de Ayacucho 2012 2~Crónicas 15 Bible Online

2~Crónicas 15 - CHUYA QELLQA La Biblia en Quechua de Ayacucho 2012 bible

2~Crónicas 15

¹Obedpa churin Azariasman Diospa Espiritun huntaykuptinmi,

²Rey Asawan tupananpaq rispan nirqa: Rey Asa, Judá runakuna hinaspa Benjamín ayllukuna, llapallaykichik uyariwaychik: Tayta Dioswan kaptikichikqa paypas qamkunawanmi kanqa, maskaspaykichikqa tarinkichikmi, saqeruptikichikqa paypas saqerusunkichikmi.

³Unay tiempom Israel runakunaqa mana cheqap Diosniyuq, mana sacerdotepa yachachisqan hinaspa mana kamachikuyniyuq karqaku.

⁴Ichaqa sasachakuypi kaspankum Israelpa yupaychasqan Tayta Diosman kutirikuspa maskaspanku tarirqaku.

⁵Chay tiempokunapiqa manam pipaqpas hawkayay karqachu, aswanqa llapallan nacionkunapi kaqkunapaqmi ñakariyllaña karqa.

⁶Huk nacionmi huk nacionta purmachiq, huk llaqtapas huk llaqtatam purmachiq, paykunata tukuy rikchaq sasachakuykunawan Dios manchachisqanrayku.

⁷Aswanqa kallpanchakuspayá ama hukmanyaychikchu, llamkasqaykichikmantaqa pagoykichiktam chaskinkichik, nispa.

⁸Profeta Azariaspa nisqanta Asa uyariykuspanmi kallpanchakururqa, hinaspam Judá lawpipas chaynataq Benjamín lawpipas millakuypaq idolokunata ñuturachirqa. Ñuturachirqataqmi Efraín law orqokunapi idolokunatawan hapikuykusqan llaqtakunapi idolokunatapas. Allichachirqataqmi Tayta Diospa templonpa ñawpaqninpi kaq altartapas.

⁹Chaymantam huñururqa Judapi hinaspa Benjaminpi yachaqkunata, huñururqataqmi Efraín castamanta, Manasés castamanta hinaspa Simeón castamanta paykuna ukupi yachaqkunatapas. Achkaqmi Israel nacionmanta rey Asaman pasakurqaku, pasakurqakuqa paywan Tayta Dios kasqanta qawaykuspankum.

¹⁰Paykunam Jerusalén llaqtapi huñunakururqaku rey Asapa chunka pichqayuq wataña munaychakusqanpa kimsa kaq killanpi.

¹¹Chay punchawpim sacrificiota Tayta Diosman ofrecerqaku guerrapi peleaspa qechumusqanku kaqkunamanta qanchis pachak torokunatawan qanchis waranqa ovejakunata.

¹²Hinaspankum ñawpaq taytankupa yupaychasqan Tayta Diosta tukuy sonqonkuwan tukuy almankuwan maskanankupaq prometekurqaku.

¹³Prometekurqakutaqmi pipas Israelpa Diosninta mana maskaqtaqa hatuntapas taksatapas, qaritapas warmitapas wañuchinankupaq.

¹⁴Chaynata nispankum Tayta Diospa qayllanpi hatun qapariywan jurarqaku, chaynataqa ruwarqaku cornetakunata trompetakunata tocachkaptinkum.

¹⁵Llapallan Judá runakunam jurasqankumanta kusikurqaku, tukuy sonqonkuwan jurasqankurayku. Tukuy voluntadwan maskaspankum Tayta Diosta tarirqaku chaynapim paypas hawkayayta tukuy hinastinpi qorqa.

¹⁶Rey Asaqa abuelan Maacatapas reina kayninmantam hurqorurqa Asera idolota ruwachisqanrayku. Chay idolotam kuchuparuspan ñutururqa, hinaspam Cedrón wayqopi kañarurqa.

¹⁷Israel runakunapa kasqan moqokunapi capillakunatam ichaqa mana chinkachirqachu, chaywanpas Asaqa wañukunankamam tukuy sonqonwan Diosta servikurqa.

¹⁸Taytanpa hinaspa kikinpa sapaqchasqan ofrendakunatapas, qoritapas qollqetapas chaynataq serviciokunatapas Diospa templonmanmi churarqa.

¹⁹Rey Asapa kimsa chunka pichqayuq wata munaychakuyninpim mana guerra karqachu.