Read CHUYA QELLQA La Biblia en Quechua de Ayacucho 2012 2~Crónicas 23 Bible Online

2~Crónicas 23 - CHUYA QELLQA La Biblia en Quechua de Ayacucho 2012 bible

2~Crónicas 23

¹Qanchis wataña Atalía munay-chakuchkaptinmi, sacerdote Joia-da kallpanchakuspan tropakunapa capitanninkunawan contratota ruwarqa, paykunam karqaku Jeroboampa churin Azarías, Johananpa churin Ismael, Obedpa churin Azarías, Adaiapa churin Maasías hinaspa Zicripa churin Elisafat.

²Paykunam lliw Judá nacionpi purimuspanku llapallan llaqtakunamanta llapa levitakunata, ayllukunapi kamachikuqkunata hinaspa Israelpi kamachikuqkunata huñuramurqaku, chaymi Jerusalén llaqtaman rirqaku.

³Hinaptinmi Diospa templonpi llapallan huñunasqa runakuna reywan contratota ruwarqaku. Chaypim sacerdote Joiada nirqa: Kaypim reypa churin kachkan, paymi Davidpa miraynin kasqanrayku Tayta Diospa prometesqanman hina munaychakunqa.

⁴Chaynaqa, kaynatam ruwankichik: Llapa sacerdotekunamanta hinaspa levitakunamantam kimsaman rakikuruspaykichik, wakiqnikichik punkukunata waqaychankichik.

⁵Wakiqnikichikmi reypa palacionta waqaychankichik, wakiqnikichikñataqmi “Cimientowan” sutichasqa punkuta waqaychankichik; llapa runakunañataqmi Tayta Diospa templonpa pationpi kanqaku.

⁶Amam pipas Tayta Diospa templonmanqa yaykunqachu, yaykuspaqa-yaykunqaku sacerdotekunawan servikuq levitakunallam, chaypaq sapaqchasqa kasqankurayku; wakin runakunañataqmi Tayta Diospa kamachisqanman hina hawapi qawan-qawanlla kanqaku.

⁷Llapa levitakunam makinpi armayuqkama reyta chawpicharunqaku, pipas temploman yaykuqtaqa wañuchinkichikmi. Qamkunaqa maylawman riptinpas reytam waqaychankichik, nispa.

⁸Chaymi llapa levitakunawan Judá nacionpi kaqkuna, sacerdote Joiadapa kamachisqanman hina ruwarqaku. Sapa kamachikuqkunam kamachisqankuna-manta samana punchawpi yaykuq-kunatawan lloqsiqkunata sumaqta qawarqaku; sacerdote Joiadaqa ruwayninkumanta samaqkunatapas manam kacharirqachu.

⁹Sacerdote Joiadaqa llapa capitankunamanpas rey Davidpa lanzankunatawan rikchaqmana escudokunatam qoykurqa, chay armakunaqa Tayta Diospa templonpim waqaychasqa karqa.

¹⁰Chaymantam llapa runakunata armayuqtakama seqellataña churarurqa, templopa alleq law kuchunmanta qallaykuspa ichoq law kuchunkama, altarñataqmi karqa paykunapa chawpinpi, llapan lawmantam reytaqa waqaycharqaku.

¹¹Hinaptinmi sacerdote Joiadawan churinkuna, rey Ocoziaspa churin Joasta hurqoramurqaku, umanman coronata churaykuspankum imaynam munaychakunanmanta yachachikuykunata hapiykachirqaku, hinaspam rey kananpaq umanman aceiteta tallispanku nirqaku: ¡Kawsachun rey! nispanku.

¹²Runakunapa kallpasqankutawan “Kawsachun rey” nisqankuta Atalía uya-riruspanmi, Tayta Diospa templonpi runakunapa kasqanman kallparqa.

¹³Chaypim reyta rikururqa temploman yaykuna pilarpa waqtanpi sayachkaqta, rikururqataqmi kamachikuqkunatawan trompeta tocaqkunatapas reypa waqtanpi sayachkaqta, llapa runakunatapas kusikuyllawanña trompetakunata tocaspa takichkaqta, takiqkunatapas tocanakunawan yupaychachkaqta. Chaykunata Atalía qawaykuspanmi pachanta llikipakuspan qaparirqa: ¡Traicionmi kayqa, traicionmi kayqa! nispa.

¹⁴Hinaptinmi tropakunapa capitanninkunata lloqsirachispan sacerdote Joiada nirqa: Chawpikichikmanta Ataliata hawaman hurqoychik, pitapas payman sayapakuqtaqa wañuchinkichikmi, nispa. “Tayta Diospa templonpiqa amam paytaqa wañuchinkichikchu” nispa sacerdote kamachikusqanraykum,

¹⁵Ataliataqa hawaman hurqoruspanku reypa palacionman riq “Caballokunapa Punkun” sutiyuq punkupi wañurachirqaku.

¹⁶Sacerdote Joiadam reywan hinaspa llapallan runakunawan contratota ruwarqa, chaynapi Tayta Diospa runankunaña kanankupaq.

¹⁷Chaymantam llapallan runakuna Baalpa templonman yaykuruspanku tuñirachirqaku; altarninkunata tuñirachispam idolonkunatapas ñutuparurqaku, Baalpa sacerdoten Matantapas altarkunapa ñawpaqninpim wañurachirqaku.

¹⁸Chaymantam Joiadaqa, guardiakunata Tayta Diospa templonpi churarqa, chay guardiakunatam sacerdotekunawan levitakuna kamachirqa; rey Davidraqmi churarqa sacerdotekunatawan levitakunataqa muyuyninpi llamkanankupaq, Moisespa yachachikuyninman hina lliw kañana sacrificiota ofrecenankupaq, Davidpa kamachisqanman hina kusikuywan takistin ruwanankupaq.

¹⁹Tayta Diospa templonman yay-kuna punkukunapipas, punku waqay-chaqkunatam churarqa, chaynapi mana chuyanchasqa kaqkunaqa mana maynintapas yaykunankupaq.

²⁰Chaymantam qayachirqa capitankunata, ancha reqsisqa runakunata, llapa kamachikuqkunata chaynataq llapa runakunatapas, hinaspam Tayta Diospa templonmanta palacionman reyta pusarqaku. Hanay punkunta yaykuspankum reyta trononpi tiyaykachirqaku.

²¹Llapallan runakunam kusisqallaña karqaku. Ataliata espadawan wañurachisqankuraykum llaqtapas hawkaña karqa.