Read CHUYA QELLQA La Biblia en Quechua de Ayacucho 2012 Esdras 1 Bible Online

Esdras 1 - CHUYA QELLQA La Biblia en Quechua de Ayacucho 2012 bible

Esdras 1

¹Profeta Jeremiasnintakama Tayta Diospa nisqan cumplikunanpaqmi, Persia nacionpi rey Ciropa munaychakusqan punta kaq watapi, rey Ciropa sonqonman kay munakuyta Tayta Dios churarqa, lliw munaychakuyninpi runakunaman kay decretota simiwan hinaspa cartakunawan kaynata nimunankupaq:

²Persia nacionpa reynin Cirom kaynata nin: Hanaq pachapi Tayta Diosmi kay pachapi nacionkunata qowarqa, hinaspam Judá nacionpi kaq Jerusalén llaqtapi templota hatarichipunaypaq kamachiwarqa.

³Chaynaqa, qamkuna ukupi pipas Tayta Diospa llaqtan kaspaqa, Judá nacionpi kaq Jerusalenman kutichun, Tayta Diosmi paywan kanqa, hinaspayá Israelpa yupaychasqan Tayta Diospa templonta hatarichimuchun, payqa Jerusalén llaqtapim yachakun.

⁴Judiokunamanta maymi yachasqankupi qepaqkunatañataqmi kamachini haykam riqkunata qoriwan, qollqewan, imapas kapuqninkuwan hinaspa animalkunawan yanapanankupaq; kamachinitaqmi Jerusalenpi Tayta Diospa templonpaq sonqonkumanta ofrendakunata qonankupaqpas, nispa.

⁵Jerusalén llaqtapi Tayta Diospa templon ruwaq rinankupaqmi Judá ayllupa chaynataq Benjamín ayllupa kamachiqninkunawan sacerdotekuna hinaspa levitakuna hatarirqaku, hatarirqakutaqmi haykam Tayta Diospa sonqochasqan runakunapas paykunawan rinankupaq.

⁶Muyuriqninpi llaqtakunañataqmi yanaparqaku qoriwan qollqewan, imapas kapuqninkunawan, animalkunawan, alhajakunawan chaynataq munasqankuman hina ofrendakunawanpas.

⁷Rey Nabucodonosormi Jerusalenpi Tayta Diospa templonmanta apaspan diosninkunapa templonman churarqa, chay serviciokunatam rey Ciro hurqomurqa,

⁸hinaspanmi tesorero Mitridateswan yupachispan kutiykachirqa Judá nacionpa kamachiqnin Sesbasarman.

⁹Yupasqankum kaykuna karqa: Qorimanta kimsa chunka tazonkuna, qoll-qemanta waranqa tazonkuna, iskay chunka isqonniyuq cuchillokuna,

¹⁰qorimanta kimsa chunka vasokuna, qollqemanta tawa pachak chunka vasokuna hinaspa tukuy rikchaq waranqa serviciokuna.

¹¹Qorimanta, qollqemanta llapallan serviciokunam karqa pichqa waranqa tawa pachaknin. Chaykunatam Sesbasar aparqa Babilonia nacionmanta Jerusalenman kutiqkunawan.