Read CHUYA QELLQA La Biblia en Quechua de Ayacucho 2012 Esdras 7 Bible Online

Esdras 7 - CHUYA QELLQA La Biblia en Quechua de Ayacucho 2012 bible

Esdras 7

¹Chaykuna pasaruptinmi, Persia nacionpa reynin Artajerjes munaychakuchkaptin, Babiloniamanta Seraiaspa churin Esdras kutimurqa. Seraiasqa karqa Azariaspa churinmi, Azariasñataqmi Hilciaspa,

²Hilciasmi karqa Salumpa churin, Salumñataqmi Sadocpa, Sadocñataqmi karqa Ahitobpa churin,

³Ahitobmi karqa Amariaspa churin, Amariasñataqmi Azariaspa, Azariasñataqmi karqa Meraiotpa churin,

⁴Meraiotmi karqa Zeraiaspa churin, Zeraiasñataqmi Uzipa, Uziñataqmi karqa Buquipa churin,

⁵Buquim karqa Abisuapa churin, Abisuañataqmi Fineespa, Fineesñataqmi karqa Eleazarpa churin. Eleazarmi karqa punta kaq sacerdote Aaronpa churin.

⁶Esdrasqa karqa Moisesnintakama Israelpa mirayninkunaman Tayta Diospa kamachikuykuna qosqanta allin yachaqmi. Tayta Diosmi Esdrasta yanaparqa, chayraykum rey Artajerjespas tukuy ima mañakusqanta qoykurqa. Chaynatam Babiloniamanta Esdras kutimurqa.

⁷Qanchis wataña rey Artajerjes munaychakuchkaptinmi, Abib killapi, Israelpa wakin mirayninkuna, sacerdotekuna, levitakuna, takiqkuna, punku nanachikuqkuna hinaspa templopi servikuqkuna Esdraswan kuska Jerusalenman kutimurqaku.

⁸Rey Artajerjes qanchis wataña munaychakuchkaptinmi, [3]Ab sutiyuq pichqa kaq killapi Jerusalenman Esdras chayamurqa.

⁹Babiloniamantam watapa punta kaq killanpa qallariynin punchawpi lloqsimurqa, hinaspam chay watapa pichqa kaq killanpa qallariynin punchawpi Jerusalenman chayamurqa. Tayta Diosmi payta yanaparqa.

¹⁰Esdrasmi sonqonta kicharirqa Tayta Diospa kamachikuyninta sumaqta yachananpaq, ruwayman churananpaq hinaspa Israelpa mirayninkunaman yachachinanpaq.

¹¹Israelpa yupaychasqan Tayta Diospa kamachikuyninkunata decretonkunata allinta yachaq sacerdote Esdrasmanmi rey Artajerjes huk cartata qorqa, chay cartapa copianmi kay:

¹²Reykunapa reynin ñoqa Arta-jerjesmi rimaykamuyki qam sacerdote Esdrasta, qamqa kanki hanaq pachapi munaychakuq Diospa leynin yachachikuqmi, hawkayay qanwan kachun.

¹³Munaychakusqay nacionpi llapallan Israelpa mirayninkunatawan sacerdotenkunata hinaspa levitakunatam kamachini, pipas Jerusalén llaqtaman riyta munaspaqa qanwanyá kutichunku.

¹⁴Ñoqa reymi qanchis consejaqniykunapiwan kuska kamachikiku Judá naciontawan Jerusalén llaqtata watukamunaykipaq; chaytaqa ruwanayki Diosnikipa kamachikuyninkunata yachasqaykiman hinam.

¹⁵Jerusalén llaqtapi yachakuq Israelpa yupaychasqan Tayta Diospaq qosqayku qoritapas qollqetapas apay, chaykunataqa ñoqawan consejaqniykunam sonqoykumanta qoniku.

¹⁶Apaytaqyá Babilonia nacionpi huñusqayki qoritapas qollqetapas chaynataq Tayta Diospa Jerusalenpi kaq templonpaq llapa runakunawan sacerdotekunapa sonqonkumanta qosqanku ofrendakunatapas.

¹⁷Chay qollqewanmi rantinki torokunata, carnerokunata, malta carnerokunata hinaspa ofrendapaq kawsaykunatawan vinotapas; chaykunatam Jerusalén llaqtapi Tayta Diospa templonpi kaq altarpi ofrecenkichik.

¹⁸Puchuq qori-qollqewanñataqmi, llaqtamasikikunawan tanteanakusqaykichikman hina Diosnikichikpa munasqanta ruwankichik.

¹⁹Kay chaskisqayki serviciokunatam ichaqa Jerusalén llaqtapi Tayta Diosman qoykunki, templonpi servikunanpaq.

²⁰Diosnikipa templonpaq ima pisiptinñataqmi reypa qori-qollqen waqaychana wasimanta hurqonki.

²¹Ñoqa rey Artajerjesmi, Eufrates mayupa waklawninpi qori-qollqey waqaychaqkunata kaynata kamachimuykichik: Hanaq pachapi Tayta Diospa kamachikuyninta allinta yachaq sacerdote Esdraspa tukuy ima mañasusqaykichiktam utqayman qonkichik.

²²Kaykunatam qonkichik: Kimsa waranqa kimsa pachaknin qollqeta, iskay chunka waranqa kilo trigota, iskay waranqa iskay pachaknin litro vinota chaynataq iskay waranqa iskay pachaknin litro aceiteta, kachitapas haykam mañakusqantam qonkichik.

²³Templonpaq hanaq pachapi Tayta Diospa imapas mañakusqanqa chaylla qosqayá kachun, chaynapi kamachikusqay nacionmanpas chaynataq churiykunamanpas Diospa piñakuynin ama chayamunanpaq.

²⁴Kamachikichiktaqmi kaytapas: Llapa sacerdotekunamanta, levitakunamanta, takiqkunamanta, punku waqaychaqkunamanta, templopi servikuqkunamanta, Diospa templonpi wakiq servikuqkunamantaqa amam ima impuestotapas cobrankichikchu.

²⁵Esdras, qamñataqmi Diosnikipa yachay qosusqaykiman hina, haykam Tayta Diospa kamachikuynin yachaqkunamanta juezkunatawan gobernadorkunata churanki, chaynapi Eufrates mayupa intipa seqaykunan lawninpi yachaq runakunata kamachinankupaq; mana yachaqkunatañataqmi qam yachachinki.

²⁶Pipas Diosnikipa kamachikuyninta chaynataq ñoqa reypa kamachikuyniyta mana kasukuq runaqa chaylla juzgasqa kaspa sentenciasqa kachun wañunanpaq, llaqtanmanta qarqosqa kananpaq, multata pagananpaq otaq carcelpi kananpaqpas, nispa.

²⁷Chaymi Esdras kaynata nirqa: Ñawpaq taytanchikkunapa yupay-chasqan Tayta Diosyá hatunchasqa kachun, paymi rey Artajerjesta sonqocharqa Jerusalenpi Tayta Diospa templonta hatunchananpaq.

²⁸Tayta Diosmi reypa qayllanpi, consejaqninkunapa ñawpaqninpi hinaspa reypa churasqan kamachikuqkunapa ñawpaqninpi llakipayariykuwaspan kallpanchaykuwarqa, chaymi Tayta Diospa yanapasqan kaspay, Israelpa kamachiqninkunata huñurqani ñoqawan kuska Jerusalenman kutimunankupaq, nispa.