Read CHUYA QELLQA La Biblia en Quechua de Ayacucho 2012 Esdras 8 Bible Online

Esdras 8 - CHUYA QELLQA La Biblia en Quechua de Ayacucho 2012 bible

Esdras 8

¹Ayllunkuman chaynataq ñawpaq taytankuman hina, rey Artajerjes munaychakuchkaptin Babiloniamanta Jerusalenman ñoqawan kutimuq kamachikuqkunam kaykuna:

²Fineespa mirayninkunamanta Gersón; Itamarpa mirayninkunamanta Daniel; Davidpa mirayninkunamanta Hatús;

³Secaniaspa chaynataq Parospa mirayninkunamanta Zacarías, paywan kuskam pachak pichqa chunka runakuna listasqa karqaku.

⁴Pahat-moabpa mirayninkunamanta Zeraiaspa churin Elioenai, paywanmi kutimurqaku iskay pachak runakuna.

⁵Secaniaspa mirayninkunamanta Jahazielpa churin, paywanmi kutimurqaku kimsa pachak runakuna.

⁶Adinpa mirayninkunamanta Jonatanpa churin Ebed, paywanmi kutimurqaku pichqa chunka runakuna.

⁷Elampa mirayninkunamanta Ataliaspa churin Jesaías, paywanmi kutimurqaku qanchis chunka runakuna.

⁸Sefatiaspa mirayninkunamanta Micael-pa churin Zebadías, paywanmi kutimurqaku pusaq chunka runakuna.

⁹Joabpa mirayninkunamanta Jehielpa churin Obadías, paywanmi kutimurqaku iskay pachak chunka pusaqniyuq runakuna.

¹⁰Banipa mirayninkunamanta Josi-fiaspa churin Selomit, paywanmi kutimurqaku pachak soqta chunka runakuna.

¹¹Bebaipa mirayninkunamanta Bebaipa churin Zacarías, paywanmi kutimurqaku iskay chunka pusaqniyuq runakuna.

¹²Azgadpa mirayninkunamanta Haca-tanpa churin Johanán, paywanmi kutimurqaku pachak chunka runakuna.

¹³Adonicampa mirayninkunamantam kutimurqaku qepa wiñaykuna, paykunam karqa: Elifelet, Jeiel hinaspa Semaías, paykunawanmi kutimurqaku soqta chunka runakuna.

¹⁴Bigvaipa mirayninkunamanta Utai-wan Zabud, paykunawanmi kutimurqaku qanchis chunka runakuna.

¹⁵Ñoqa Esdrasmi paykunata huñurqani Ahava mayupa patanpi, hinaspam chaypi kimsa punchaw samarqaniku. Llapa runakunapa hinaspa sacerdotekunapa chawpinpi levitakunata watukuykuspaymi mana hukllatapas tarirqanichu.

¹⁶Chaymi Eliezerta, Arielta, Semaiasta, Elnatanta, Jaribta, Elnatanta, Natanta, Zacariasta hinaspa Mesulamta qayachimurqani, paykunaqa kamachikuqkunam karqaku. Qayachimurqanitaqmi Joiaribtawan Elnatantapas, paykunam yachaypa huntasqan runakuna karqaku.

¹⁷Hinaspam kacharqani Casifia llaqtapi kamachikuq Iddoman rispanku, Iddota chaynataq Casifia llaqtapi paywan kaqkunata mañakamuptinku Tayta Diospa templonpi servikuqkunata kachamunankupaq.

¹⁸Chaynapim Diosniyku ñoqaykuwan kasqanrayku kachamurqaku Israelpi Leví ayllumanta kaq Mahlipa churin ancha yachayniyuq Serebiasta, churinkunata hinaspa wawqenkunata; llapallan hamuqkunam karqaku chunka pusaqniyuq runakuna.

¹⁹Kachamurqaku-taqmi Meraripa mirayninmanta kaq Hasabias-tawan Jesaiastapas, paykunam churinkunapiwan wawqenkunapiwan karqaku iskay chunka runakuna.

²⁰Templopi servikuqkunamantapas iskay pachak iskay chunka runakunatam kachamurqaku. Paykunapa ñawpaq taytankutam Davidwan kamachikuqkuna churarqaku levitakunata yanapanankupaq. Paykunatam sutin-sutin listaman churar-qaku.

²¹Chaymantam Ahava mayupa patanpi ayunanaykupaq kamachikurqani, Tayta Diospa qayllanpi uchuychakuspa payta mañakunaykupaq, chaynapi ñoqaykupas, warmaykupas chaynataq llapa kapuqniykupas ñanta allinlla rinaykupaq.

²²Chaynataqa ruwarqani ñanpi enemigokunamanta waqaychawanankupaq reymanta sillada tropakuna mañakuyta penqakusqayraykum. Reytaqa nirqanikutaqmi: “Diosniykuqa maskaqninkunatam waqaychan, qepanchaqninkunamanmi ichaqa sinchi piñakuyninta kacharin”, nispaykupas.

²³Chayraykum ayunaspayku Diosniy-kuta mañakuptiyku uyariykuwarqaku.

²⁴Chaymantam sacerdotekunamanta chunka iskayniyuq kamachikuqkunata rakirqani, paykunam karqa: Serebiaswan Hasabías hinaspa paykunapa ayllunmanta kaq chunka runakuna.

²⁵Paykunamanmi pesaykuspay qorqani Diosniykupa templonpaq, reypa, consejaqninkunapa, kamachikuqkunapa chaynataq Israelpa mirayninkunapa qosqanku qorita, qollqeta, serviciokunata hinaspa ofrendakunatapas.

²⁶Pesaykuspaymi qorqani iskay chunka hukniyuq waranqa tawa pachak pichqa chunka kilo qollqeta, qollqemanta pachak serviciokunata, kimsa waranqa kimsa pachaknin kilo qorita,

²⁷qorimanta iskay chunka vasokunata sapakama pusaq kilo pesaqtakama hinaspa llipipipichkaq broncemanta iskay vasokunatapas, chaykunaqa qori hina kuyayllapaqraqmi karqa.

²⁸Chaymantam paykunata nirqani: Qamkunaqa Tayta Diospaq sapaqchasqam kankichik, sapaqchasqataqmi kay serviciokunapas, qoripas, qollqepas, chaykunaqa ñawpaq taytanchikkunapa sonqonkumanta Diosman qosqanku ofrendam.

²⁹Chaynaqa, sumaqtayá waqaychaychik, Jerusalenpi Tayta Diospa templonpi qori-qollqe waqaychana cuartopi, llapa sacerdotekunapa, levitakunapa hinaspa ayllukuna kamachiqkunapa ñawpaqninpi pesanaykichikkama.

³⁰Chaymi sacerdotekunawan llapa levitakuna pesasqanku qorita, qollqeta, serviciokunata chaskirqaku, hinaspam Jerusalenpi Diosniykupa templonman aparqaku.

³¹Watapa qallariynin Abib killapa chunka iskayniyuq punchawninpim Ahava mayu patanmanta Jerusalenman pasarqaniku; Diosniykum waqaychapawaspanku enemigoykumantapas chaynataq salteaqkunamantapas librawarqaku.

³²Jerusalén llaqtaman chayaramuspaykum kimsa punchaw samarqaniku.

³³Tawa kaq punchawpiñataqmi, qorita, qollqeta, serviciokunata pesarqaku Diosniykupa templonpi, hinaspam Uriaspa churin sacerdote Meremotmanwan Fineespa churin Eleazarman qorqaku; paykunawantaqmi karqa levitakunamanta Josueypa churin Jozabadwan Binuipa churin Noadiaspas.

³⁴Chay punchawllam pesaspa, yupaspa hinaspa listaspa lliwta qorqaku.

³⁵Chaymantam preso kasqankumanta kutimuqkuna Israelpa Diosninman lliw kañana sacrificiokunata ofrecerqaku. Israelpi sapa ayllupa rantinpim ofrecerqaku chunka iskayniyuq malta torokunata, isqon chunka soqtayuq carnerokunata, qanchis chunka qanchisniyuq malta carnerokunata hinaspa hucha pampachana ofrendapaq chunka iskayniyuq chivatokunata; chaykunatam Tayta Diosman lliw kañana sacrificiota ofrecerqaku.

³⁶Eufrates mayupa intipa seqaykunan lawninpi kamachikuqkunamanwan capitankunamanpas reypa qellqamusqan kamachikuykunatam qorqaku. Paykunam Israelpa mirayninkunata Tayta Diospa templon ruwaypi yanaparqaku.