Read CHUYA QELLQA La Biblia en Quechua de Ayacucho 2012 Nehemías 3 Bible Online

Nehemías 3 - CHUYA QELLQA La Biblia en Quechua de Ayacucho 2012 bible

Nehemías 3

¹Sumo sacerdote Eliasibmi sacer-dotemasinkunapiwan hatarispan-ku Ovejawan sutichasqa punkuta hatarichirqaku. Vigankunatawan punkun-kunata churaspankum perqankunatapas Pachakwan sutichasqa torremanta qallaykuspa Hamea sutiyuq torrekama ruwarqaku, hinaspam Tayta Diospaq sapaqcharqaku.

²Qatiqnintam Jericó llaqtayuq runakuna ruwarqaku, qatiqnintañataqmi Imripa churin Zacur.

³Challwawan sutichasqa punkutam ruwarqaku Senaapa mirayninkuna. Vigankunatawan punkunkunata churaspankum cerrojonkunatawan rejillankunatapas churarqaku.

⁴Qatiqnintam allicharqa Uriaspa churin Meremot, Uriasqa karqa Cospa churinmi; qatiqnintañataqmi allicharqa Berequiaspa churin Mesulam, Berequiasqa karqa Mesezabeelpa churinmi. Qatiqnintam allicharqa Baanapa churin Sadoc.

⁵Qatiqnintam allicharqa Tecoa llaqtayuq runakuna, kamachiqninkunam ichaqa mana yanapayta munarqakuchu.

⁶Jesaná sutiyuq punkutam otaq Mawkawan sutichasqa punkutam allicharqaku Paseahpa churin Joiadawan Besodiaspa churin Mesulam; vigankunatawan punkunkunata churaspankum, cerrojonkunatawan rejillankunatapas churarqaku.

⁷Qatiqnintam allicharqaku Gabaón llaqtayuq Melatías, Meronot llaqtayuq Jadón, Gabaón llaqtayuq runakuna hinaspa Mizpa llaqtayuq runakuna, chay llaqtakunaqa Eufrates mayupa waklawninpi kaq gobernadorpa kamachisqanmi karqaku.

⁸Qatiqnintam allicharqa platerokunamanta kaq Harhaiapa churin Uziel, paytam yanaparqa perfumekunata ruwaqpa churin Hananías. Iskayninkum Jerusalenpa murallankunata allicharqaku rakta perqawan tupanakuqkama.

⁹Qatiqnintam allicharqa Hurpa churin Refaías, payqa karqa Jerusalén parten llaqtapa gobernadorninmi.

¹⁰Qatiqnintam allicharqa Harumafpa churin Jedaías, wasinpa chimpanpi kasqanrayku. Qatiqnintañataqmi allicharqa Hasabniaspa churin Hatús.

¹¹Qatiqnintam allicharqaku Harimpa churin Malquiaswan Pahat-moabpa churin Hasub, paykunam allicharqaku Hornos sutiyuq torretapas.

¹²Qatiqnintam allicharqa Halohespa churin Salum hinaspa warmi churinkuna, payqa karqa Jerusalén parten llaqtapa gobernadorninmi.

¹³Qechwa punkutam allicharqaku Hanunwan Zanoa llaqtapi yachaqkuna, paykunam perqaspanku punkunkunatawan cerrojonkunata hinaspa rejillankunata churarqaku. Murallatapas tawa pachak pichqa chunka metrotam allicharqaku Muladarwan sutichasqa punkukama.

¹⁴Muladarwan sutichasqa punkutam allicharqa Recabpa churin Malquías, payqa karqa Bet-haquerem llaqtapi gobernadormi, paymi punkunkunatawan cerrojonkunata hinaspa rejillankunata churarqa.

¹⁵Pukyuwan sutichasqa punkutam allicharqa Colhozepa churin Salum, payqa karqa Mizpa llaqtapa gobernadorninmi. Paymi musoqmanta perqaspan qatarqa, hinaspanmi punkunkunatawan cerrojonkunantapas churarqa. Allicharqataqmi reypa huertanman riq Siloé estanquepa perqantapas “Davidpa Llaqtanmanta” uraykamuq gradaskama.

¹⁶Qatiqnintam allicharqa Azbucpa churin Nehemías, payqa karqa Bet-sur parten llaqtapa gobernadorninmi, paymi allicharqa Davidpa sepulturankunapa chimpankama, estanquekama hinaspa soldadokunapa cuartelninkama.

¹⁷Qatiqnin perqakunatam llapa levitakuna allicharqaku. Paykunamantam Banipa churin Rehum qallaykurqa, qatiqnintañataqmi allicharqa Hasabías, payqa karqa Keila parten llaqtapa gobernadorninmi, paymi Keila llaqtapa sutinpi allicharqa.

¹⁸Qatiqnintam allicharqa Henadadpa churin Bavai, payqa karqa Keila parten llaqtapa gobernadorninmi.

¹⁹Qatiqnintam allicharqa Josueypa churin Ezer, payqa karqa Mizpa llaqtapa gobernadorninmi, paytaqmi allicharqa esquinapi armakuna waqaychana wasipa chimpan wichayman riq perqatapas.

²⁰Qatiqnintam allicharqa Zabaipa churin Baruc, esquinamanta qallaykuspa sumo sacerdote Eliasibpa wasinpa punkunkama.

²¹Qatiqnintam allicharqa Uriaspa churin Meremot, Uriasqa karqa Cospa churinmi; paymi allicharqa Eliasibpa wasinpa punkunmanta qallarispa Eliasibpa wasinpa patankama.

²²Qatiqnintam allicharqaku Jordán qechwapi yachaq sacerdotekuna.

²³Qatiqnintam wasinkupa chimpanpi kasqanrayku allicharqaku Benjaminwan Hasub. Qatiqnintañataqmi wasinpa hichpanpi kasqanrayku allicharqa Maasiaspa churin Azarías, Maasiasqa karqa Ana-niaspa churinmi.

²⁴Qatiqnintam allicharqa Henadadpa churin Binúi, Azariaspa wasinmanta qallarispa esquina muyuykunakama.

²⁵Qatiqnintam allicharqa Uzaipa churin Palal. Paymi allicharqa esquinapa chimpan perqata hinaspa reypa wasinmanta lloqsiq hatun torretapas, chayqa kachkan carcelpa pationpim. Qatiqnintañataqmi allicharqa Farospa churin Pedaías.

²⁶Qatiqnintam allicharqaku templopi servikuqkunamanta Ofelpi yachaqkuna, paykunam allicharqaku intipa qespimunan lawninta Yakuwan sutichasqa punkukama hinaspa hawa lawman lloqsiq torrekama.

²⁷Qatiqnintam allicharqaku Tecoa llaqtayuq runakuna, hawa lawman lloqsiq hatun torrepa chimpanmanta qallarispa Ofelpa murallankama.

²⁸Qatiqnintam Caballokunawan sutichasqa punkumanta qallaykuspa llapa sacerdotekuna allicharqaku, sapakamam wasinkupa chimpanta allicharqaku.

²⁹Qatiqnintam wasinpa chimpan kasqanrayku allicharqa Imerpa churin Sadoc. Qatiqnintañataqmi allicharqa intipa qespimunan lawpi punkuta nanachikuq Secaniaspa churin Semaías.

³⁰Qatiqnintam allicharqaku Selemiaspa churin Hananiaswan Salafpa soqta kaq churin Hanún. Berequiaspa churin Mesulamñataqmi wasin chimpanta allicharqa.

³¹Qatiqnintam allicharqa plateropa churin Malquías, Diospa templonpi servikuqkunapa chaynataq negociantekunapa wasinkukama, juzgana punkunta esquinapi vigilaqkunapa sayanankama.

³²Esquinapi vigilaqkunapa sayanamanta qallarispam Ovejawan sutichasqa punkukama allicharqaku platerokunawan negociantekuna.