Read CHUYA QELLQA La Biblia en Quechua de Ayacucho 2012 Ester 2 Bible Online

Ester 2 - CHUYA QELLQA La Biblia en Quechua de Ayacucho 2012 bible

Ester 2

¹Chaykunapa qepantam, piñakuynin pasaruptin rey Asuero yuyarirurqa reina Vastipa contranpi sentenciasqanta.

²Chaymi reyta serviqninkuna nirqaku: Reynilláy, qampaqyá manaraq qari reqsiq buenamoza sipaskunata maskamuchunku.

³Chaynaqa, reynilláy, kikikiyá runakunata akllay chaynapi munaychakusqayki provinciakunamanta buenamoza sipaskunata Susa llaqtaman pusamunankupaq. Chay sipaskunaqa kanqaku warmikuna waqaychaq serviqniki Hegaipa cuidasqanmi, payñam adornasqa kanankupaq imakunatapas qonqa.

⁴Chaynapi sonqoykipa munasqan sipas, reina Vastipa rantinpi akllasqa kananpaq, nispa. Chay nisqanku allinpaq rikchakapuptinmi, chaynata rey ruwarqa.

⁵Susa llaqtapim Benjamín ayllumanta kaq Judío yacharqa, sutinmi karqa Mardoqueo, payqa Jairpa churinmi karqa, Jairñataqmi Simeipa, Simeiñataqmi Cispa.

⁶Payqa Babiloniapa reynin Nabucodonosorpa, Jerusalén llaqtamanta Judapa reynin Jeconiastawan kuskata preso apachisqankunapa hukninmi karqa.

⁷Mardoqueom uywakurqa tionpa churin Esterta, hebreo rimaypim sutin karqa Hadasa. Payqa karqa allin rikchayniyuq buenamoza sipasmi, paypa tayta-maman wañukuptinmi Mardoqueo churichakuspa uywakurqa.

⁸Reypa kamachikusqan decretokuna willakusqa karuptinmi, reypa yachasqan Susa llaqtaman achka sipaskunata pusarqaku, hinaspam nanachikunanpaq Hegaiman entregarqaku. Esterpas reypa wasinman pusasqa kaspam, warmikuna nanachikuq Hegaipa makinman churasqa karqa.

⁹Estermi Hegaiwan kuyaykachikurqa, chaymi Hegai yanaparqa adornokunata chaynataq mikuyta qospan. Qoykurqataqmi reypa palacionpi kaq akllasqa qanchis sipaskunatapas servinankupaq, hinaspam chay sipaskunatawan kuskata warmikunapa yachanan wasipi allinnin kaq cuartoman pusarqa.

¹⁰Esterqa manam willakurqachu maylaw llaqtayuq kasqantapas nitaq pipa ayllunmi kasqantapas, chaynataqa ruwarqa Mardoqueopa yachachisqanman hinam.

¹¹Mardoqueoñataqmi imaynam Ester kasqanta chaynataq imaynatam hatallisqankuta yachayta munaspan, warmikunapa yachasqan wasipa punkunkunapi ichikachaq.

¹²Costumbreman hinam, reypa qayllanman yaykunankupaqqa, llapa sipaskuna chunka iskayniyuq killatapuni allichakuqku. Soqta killam mirra aceitewan cuerponkuta llusikuqku, soqta killañataqmi miski asnaq perfumekunawan untakuqku. Chaymantañam llapa sipaskuna, chulla-chullamanta turnonpi rey Asueropa qayllanman yaykuqku.

¹³Reypa qayllanman yaykunanpaq hukkaqnin sipasman tuparamuptinmi, chay sipasman tukuy imata qoqku, chaynapi allichapakuruspan warmikunapa wasinmanta reypa palacionman rinanpaq.

¹⁴Reypa palacionman tardeykuyta rispanmi paqarinnintinñataq sapaq wasimanña pusasqa karqa, chaypi reypa eunucon Saasgazña nanachikunanpaq; payqa reypa uywanakusqan warmikunata nanachikuqmi karqa. Chay warmikunaqa manañam reypa qayllanmanqa yaykuqkuñachu, aswanqa rey qayachimuptillanñam.

¹⁵Mardoqueopa tion Abihailpa churin Esterman, reypa qayllanman yayku-nanpaq turno tuparamuptinmi, Esterqa mana imatapas mañakurqachu, aswanqa reypa serviqnin warmikuna waqaychaq Hegaipa nisqallantam aparqa. Esterqa llapallan yanapaqninkunawanmi llumpayta kuyachikurqa.

¹⁶Rey Asuero qanchis wataña munaychakuchkaptinmi, Tebetwan sutichasqa chunka kaq killapi, Esterta rey Asueropa palacionman pusaykurqaku.

¹⁷Hinaptinmi rey Asueroqa llapallan warmikunamantapas aswanta Esterta kuyarurqa. Estermi llapallan sipaskunamantapas llumpayta rey Asueropa sonqonta suwarurqa, chaymi rey Asueroqa Esterpa umanman coronata churaykurqa, Vastipa rantinpi payña reina kananpaq.

¹⁸Chaymantam Esterpa sutinpi hatun convidota ruwachispan llapa kamachiqkunatawan serviqninkunata qayachirqa. Impuestotapas provinciankunapi menosyaykachispanmi, sonqonman hina regalokunatapas aypurqa.

¹⁹Manaraq qari reqsiq sipaskuna huktawan huñusqa kaptinkum, reypa palacionpa punkunpi Mardoqueo tiyachkarqa.

²⁰Esterqa Mardoqueopa kamachisqanman hinam may llaqtayuq nitaq pipa ayllunmi kasqantapas mana willakurqachu. Esterqa Mardoqueomanta yachachikuy chaskisqanman hinam kasukurqa.

²¹Chay punchawkunapim, reypa palacionpa punkunpi Mardoqueo tiyachkaptinmi, punkuta waqaychaq iskay eunucokuna Bigtanwan Teres piñasqallaña kachkarqaku hinaspam rey Asuerota wañuchinankupaq tanteanakurqaku.

²²Chayta uyariruspanmi Mardoqueoqa reina Esterman willaykurqa, Esterñataqmi Mardoqueopa sutinpi reyman willaykurqa.

²³Chaymanta tapukachakuspankum cheqap kasqanta yacharurqaku, hinaspam chay iskay eunucokunata warkururqaku. Chayqa reypa ruwasqankunamanta willakuq libropim qellqasqa kachkan.