Read CHUYA QELLQA La Biblia en Quechua de Ayacucho 2012 Ester 4 Bible Online

Ester 4 - CHUYA QELLQA La Biblia en Quechua de Ayacucho 2012 bible

Ester 4

¹Mardoqueom tukuy kaykunata yacharuspan pachankunata llikiparqa, hinaspam qachqa pachawan pachakuruspan, umanman uchpata tallikuykuspan llaqtapa chawpinta qaparillawanña waqastin rirqa.

²Hinaspanmi reypa palacion punkukama chayarurqa, ichaqa manam ukuman yaykurqachu chayna pachayuqqa mana yaykuna kasqanrayku.

³Reypa kamachisqan decreto sapa provinciakunaman chayaruptinmi, llapa judiokuna hatun llakikuypi, ayunopi, waqakuypi karqaku, achkaqmi qachqa pachawan churakuykuspa uchpapi puñurqaku.

⁴Tukuy chaykuna pasakusqantam reina Esterman willaykurqaku serviqnin sipaskuna chaynataq serviqnin eunucokunapas, chaymi reina Esterqa sinchillataña llakikuspan Mardoqueoman pachata apachirqa, chaynapi qachqa pachankunata hurqokuspan chay apachisqan pachawan mudakunanpaq, Mardoqueom ichaqa mana munarqachu.

⁵Chaymantam reina Ester, reypa serviqnin Hatacta qayachispan Mardoqueoman kacharqa imam pasakusqanmantawan imanasqam chayna pachasqa kasqanmanta tapumunanpaq.

⁶Chaymi Hatac rirqa Mardoqueopa kasqanman; Mardoqueoqa plazapim kachkarqa reypa palacionpa punkunpi.

⁷Hinaptinmi imam pasasqanmanta payman Mardoqueo willarqa, willarqataqmi llapa judiokuna wañuchisqa kanankupaq Amanpa reyman qollqe qoy munasqantapas.

⁸Qorqataqmi judío runakuna chinkachisqa kanankupaq Susa llaqtapi cheqechisqanku decretopa copiantapas, chaynapi Esterpas yachananpaq. Kunarqataqmi reyman asuykuspa castankunapa favorninpi mañakunanpaqpas.

⁹Hatacmi Esterpa kasqanman kutis-pan Mardoqueopa nisqanta willamurqa.

¹⁰Chaymi Esterqa Hatacwan Mardoqueoman kaynata willachimurqa:

¹¹Reypa serviqninkunawan munaychakusqan provinciakunapi runakunaqa yachankum reypa leyninqa: “Qaripas otaq warmipas mana qayasqa kachkaspan reypa uku law pationman yaykuqqa wañuchisqam kanqa, yaykuspaqa yaykunman pimanpas qori varanta rey haywariptillanmi” nisqanta. Ñoqaqa kimsa chunka punchawñam reypa qayllanman yaykunaypaq mana qayasqachu kani, nispa.

¹²Esterpa nisqankunata Mardoqueoman willaykuptinkum,

¹³payñataq Esterman kaynata nichimurqa: ¿Judío kachkaspapas reypa palacionpi kasqaykiraykuchu wañuymanta lluptiyta piensachkanki?

¹⁴Sichum kunan rimarinayki kachkaptin upallakuptikiqa judío runakunapa libraqninqa huklawmantam hamunqa, chaywanpas qamqa taytaykipa ayllunkunapiwanmi puchukanki. Ichapas kayna sasachakuypi yanapawanaykikupaq reina kayman chayarqanki, nispa.

¹⁵Hinaptinmi Esterñataq kaynata willachimurqa:

¹⁶Susa llaqtapi judío runakunatayá ñoqapaq ayunanankupaq huñuramuy, kimsa punchaw kimsa tutam ama mikunkichikchu nitaq tomankichikchu. Ñoqapas serviqniy sipaskunapiwanmi ayunasaq, chaymantañam reypa qayllanman yaykusaq, leyman hina mana yaykuna kachkaptinpas, wañunay otaq kawsanay kaptinpas, nispa.

¹⁷Chaymi Mardoqueo rispan Esterpa kamachisqanman hina ruwarqa.