Read CHUYA QELLQA La Biblia en Quechua de Ayacucho 2012 Ester 5 Bible Online

Ester 5 - CHUYA QELLQA La Biblia en Quechua de Ayacucho 2012 bible

Ester 5

¹Kimsa punchaw pasaruptinmi reina pachawan Ester pachakurqa, hinaspam reypa palacionpa uku patioman yaykuspa chayarurqa reypa tiyananpa chimpa corredorninman. Reyñataqmi trononpi tiyachkarqa.

²Reina Esterta patiopi sayachkaqta rikuykuspanmi, makinpi qorimanta varanta haywariykuspan favoreceykurqa. Esterñataqmi asuykuspan varanpa puntanta llapchaykurqa.

³Chaymi reyñataq tapurqa: Reina Ester, ¿imataq pasasunki? ¿Imataq mañakuyniki? Mañawaptikiqa munaychakusqay naciontapas partentam qoykusqayki, nispa.

⁴Hinaptinmi reina Ester nirqa: Reynilláy, allinpaq rikchakapusuptikiqa kunanyá convido ruwasqayman Amanwan kuska hamuychik, nispa.

⁵Reyñataqmi kamachikurqa: Esterpa mañakusqanman hina, Amanta qayamuychik, nispa. Chaynapim reyqa Amanwan kuska Esterpa convido ruwachisqanman rirqaku.

⁶Convidota mikuspa vinota upyachkaptinkum Esterta rey nirqa: ¿Imataq mañakuyniki? Ima mañawasqaykitapas qosqaykim. Mañawaptikiqa munaychakusqay naciontapas partentam qoykusqayki, nispa.

⁷Chaymi Ester nirqa: Ñoqapa mañakuyniyqa kayllam:

⁸Reynilláy, kuyapayawaspaykiqa hinas-pa kay mañakusqayta allinpaq hapispaykiqa, paqarinyá Amanwan kuska huktawan convido ruwachisqayman hamuychik, ima mañakuyniytapas paqarinñam nisqayki, nispa.

⁹Chay punchawmi Amán ancha kusisqallaña lloqsirqa; ichaqa Mardoqueota reypa palacionpa punkunpi mana sayarisqanta nitaq kuyurisqanta rikuruspanmi sinchita piñakururqa.

¹⁰Chaywanpas aguantakuykuspanmi Amanqa wasinman chayarurqa, hinaspam amistadninkunata, warmin Zerestapas qayachirqa.

¹¹Hinaspam paykunapa qayllanpi alabakurqa apu kayninmanta, achkallaña churinkunamanta, tukuy imawan rey hatunchasqanmanta chaynataq kamachikuqkunapa, serviqninkunapa hawanman rey churasqanmantapas.

¹²Amanqa nirqataqmi: Reina Esterqa manam pitapas reytawan kuskataqa convidanchu, aswanqa ñoqallatam; paqarinpaqpas reywan kuskam convidasqa kachkani.

¹³Chaywanpas judío Mardoqueota reypa palacionpa punkunpi tiyachkaqta sapa punchaw rikuptiyqa, manam imapaqpas serviwanchu, nispa.

¹⁴Chaymi warmin Zereswan llapa amistadninkuna kaynata nirqaku: Iskay chunka iskayniyuq metro kaspita sayarachiy hinaspa paqarinlla reyta niy Mardoqueo chaypi warkusqa kananpaq, chaynapim qamqa kusisqaña convidoman yaykunki, nispa. Chay nisqankum Amanpaq allinpaq rikchakarapurqa, chaymi payqa huk warkunata sayachirqa.