Read CHUYA QELLQA La Biblia en Quechua de Ayacucho 2012 Ester 9 Bible Online

Ester 9 - CHUYA QELLQA La Biblia en Quechua de Ayacucho 2012 bible

Ester 9

¹Adar killapa chunka kimsayuq punchawninpim, reypa kamachikusqan decretoman hina judiokunata enemigonkuna munaychakunanku karqa, ichaqa manam cumplikurqachu, aswanqa llapa judiokunam paykunapi munaychakururqaku.

²Rey Asueropa munaychakusqan provinciakunapim, llapa judiokuna maymi yachasqanku llaqtapi huñunakururqaku enemigonkupa contranpi peleanankupaq. Ichaqa manam mayqan enemigonkupas paykunapa contranpi sayariyta atirqachu, judiokunata manchakusqankurayku.

³Chaymi llapa provinciakunapi reypa churasqan kamachikuqkunapas, gobernadorkunapas hinaspa autoridadkunapas Mardoqueota manchakuspanku judiokunataña yanaparqaku.

⁴Mardoqueoqa ancha munayniyuqmi reypa palacionpi karqa, chaymi ancha reqsisqa kayninpas lliw provinciakunaman chayarqa, chaynapim payqa aswan-aswan munay-niyuqña rikurirqa.

⁵Judiokunaqa lliw enemigonkunatam espadawan wañuchispa puchukarachirqaku, hinaspam munasqankuta ruwarurqaku.

⁶Reypa yachasqan Susa llaqtapipas pichqa pachak runakunatam wañurachirqaku.

⁷Wañurachirqakutaqmi Parsandata, Dalfonta, Aspata,

⁸Porata, Adaliata, Aridata,

⁹Parmasta, Arisaita, Vaizata hinaspa Aridaitapas.

¹⁰Paykunam karqaku judiokunapa enemigon Hame-datapa churin Amanpa chunkantin churinkuna; llapa kapuqninkutam ichaqa mana imanarqakuchu.

¹¹Hina chay punchawllapitaqmi Susa llaqtapi wañuchisqankumantapas reyman willarqaku.

¹²Hinaptinmi reina Esterta rey Asuero nirqa: Kay yachasqay Susa llaqtapipas judiokunaqa pichqa pachak runakunatam wañurachinku, wañurachinkutaqmi Amanpa chunkantin churinkunatapas; wakin provinciakunapiqa haykatachiki wañurachinku, chaynaqa ¿imatawanraqtaq mañakunki? ¿Imatawanraqtaq ruwanayta munanki? Imapas mañakusqaykiqa ruwasqam kanqa, nispa.

¹³Chaymi reina Ester nirqa: Allinpaq rikchakapusuptikiqa, paqarinyá kay Susa llaqtapi judiokuna decretoman hina ruwaspanku llapa runakuna qawananpaq Amanpa chunkantin churinkunapa ayanta warkuchunku, nispa.

¹⁴Hinaptinmi reyqa chaynata Susa llaqtapi kamachikurqa. Chaymi Amanpa chunkantin churinkunapa ayanta war-kururqaku.

¹⁵Adar killapa chunka tawayuq pun-chawninpim Susa llaqtapi yachaq judiokuna huktawan huñunakuruspanku kimsa pachak runakunatawanraq wañurachir-qaku, ichaqa manam imankutapas aparqakuchu.

¹⁶Huklaw provinciakunapi yachaq judiokunapas adar killapa chunka kimsayuq punchawninpim vidankuta defiendenankupaq huñunakurqaku, hinaspam enemigonkuta vengakuspa qanchis chunka pichqayuq waranqa runakunata wañuchirqaku, ichaqa manam imankutapas aparqakuchu.

¹⁷Tukuy kaykunaqa pasakurqa adar killapa chunka kimsayuq punchawninpim. Chay killapa chunka tawayuq punchawninpiñataqmi samaspanku convidota ruwaspa kusikurqaku.

¹⁸Susa llaqtapi yachaq judiokunañataqmi huñunakuspanku adar killapa chunka kimsayuq punchawninpiwan chunka tawayuq punchawninpi vidankuta defiendekurqaku; hinaspam chunka pichqayuq punchawninpiña samaruspanku convidota ruwaspanku anchata kusikurqaku.

¹⁹Chayraykum mana murallasqa llaqtachakunapi yachaq judiokunapas, adar killapa chunka tawayuq punchawninpi kusikuywan convidota ruwaspanku regalokunatapas hukninkumanta hukninkukama apachinakunku.

²⁰Mardoqueom tukuy kaykunata qellqaspan, rey Asueropa munaychakusqan provinciakunapi judiokunaman cartakunata apachirqa, karupi chaynataq hichpapi kaqkunamanpas.

²¹Paykunatam kamachirqa sapa wata adar killapa chunka tawayuq hinaspa chunka pichqayuq punchawninpi huñunakuspanku fiestata ruwanankupaq,

²²chay punchawkunapi judiokuna enemigonkumanta librasqa kasqankuta, llakinkupas kusikuymanña tikrakusqanta, waqayninkupas kusikuy punchawmanña tikrakusqanta yuyari-nankupaq; hinaspa convidota chay punchawkunapi ruwaspanku vecinon-kuman mikuyta apachispanku wakchakunamanpas regalokunata qonankupaq.

²³Chaymi judiokunaqa Mardoqueopa kamachisqanman hina, chay fiesta ruway qallarisqankuta huk costumbremanña tikrarurqaku.

²⁴Agagpa miraynin Hamedatapa churin Amanmi tantearurqa judiokuna puchukarachiyta; payqa karqa judiokunapa enemigonmi, chayraykum Amanqa Purta choqarqa, judiokunata puchukarachispa tukurunanpaq.

²⁵Ichaqa reypa ñawpaqninman reina Ester hamuruspa mañakuptinmi, reyqa huk decretota kamachikurqa, judiokunapa contranpi Amanpa mana allinkuna tanteasqan kikillanman wichiykunanpaq. Chaynapim Amanqa churinkunapiwan warkunapi warkurachikurqaku.

²⁶Chayraykum chay punchawkunata [3]“Purim” nispa suticharqaku, “Pur” simi-manta paqarisqanrayku. Mardoqueopa cartanman hinam chaynataq qawasqankuman hinaspa kikinku ukupi pasasqanman hinam,

²⁷judiokunaqa kamachinakurqaku, kikinkupas, mirayninkupas chaynataq paykunaman hukllawakuqkunapas mana qonqaykuspa, kay iskay punchaw fiestata watan-watan ruwanankupaq. Chaynata ruwanankupaqmi kamachikuyta chaskirqaku,

²⁸chay punchawkunata yuyarispanku, sapa ayllu, lliw provinciakunapi chaynataq llaqtakunapipas, mirayninkunapas fiestata ruwanankupaq; chaynapi llapa judiokuna chaynataq qepa miraykunapas kay Purim fiestata mana qonqaykuspa ruwanankupaq.

²⁹Hinaptinmi Abihailpa churin reina Esterwan judío Mardoqueo, hatun atiyniyuq kayninkuman hina, iskay kaq cartata qellqarqaku, Purim fiestaqa kasukuspa ruwayman churasqa kananpaq.

³⁰Chay cartakunatam llapallan judiokunaman chaynataq rey Asueropa munaychakusqan pachak iskay chunka qanchisniyuq provinciakunamanpas apachirqaku, sumaq kuya-kuy chaynataq cheqap rimaywan qell-qasqata.

³¹Chay qellqawanmi reqsi-chirqa Mardoqueopa chaynataq reina Esterpa kamachisqanman hina ima punchawkunapim Purim fiestata ruwa-nankutapas. Yachachirqataqmi imay-nam ayunanankutapas chaynataq sasachakuyninkupi imaynam waqanan-kutapas.

³²Chaynapim Purim fiesta-manta Esterpa kamachisqankunaqa allin sapinchasqa hinaspa huk libropi qellqasqa karqa.