Read CHUYA QELLQA La Biblia en Quechua de Ayacucho 2012 Éxodo 1 Bible Online

Éxodo 1 - CHUYA QELLQA La Biblia en Quechua de Ayacucho 2012 bible

Éxodo 1

¹Kaykunam Israelpa churinkunapa sutin, paykunam Jacobwan kuska chaynataq sapakama ayllunkunapiwan Egiptoman yaykurqaku:

²Rubén, Simeón, Leví, Judá,

³Isacar, Zabulón, Benjamín,

⁴Dan, Neftalí, Gad hinaspa Aser.

⁵Jacobpa llapallan mirayninkunaqa qanchis chunkam karqaku. Joseymi ichaqa Egipto nacionpiña kachkarqa.

⁶Joseywan llapallan wawqenkunapas hinaspa wiñaymasinkunapas ñam wañukurqaña.

⁷Ichaqa Israelpa mirayninkunam llumpa-llumpayta mirarurqaku, kallpasapallañam karqakupas, chaymi Egipto nacionman huntaykurqaku.

⁸Chaymantam Egipto nacionpi, Joseyta mana reqsiq musoq reyña munaychakurqa, paymi runankunata nirqa:

⁹Qawariychik, Israelpa mirayninkunam llumpayllataña mirarunku, hinaspam ñoqanchikmantapas aswan kallpasapallaña rikurirunku.

¹⁰Chaynaqa, amaña miranankupaqyá yachaywan paykunapa contranpi imatapas ruwasunchik. Yanqañataq guerrapi kaptinchik enemigonchikkunaman hukllawakuykuspa contranchikpi peleanmanku hinaspa kay allpamanta ripukunmanku, nispa.

¹¹Chaynapim capatazkunata churarurqaku, sasa llamkaykunawan Israelpa mirayninkunata ñakarichinankupaq. Paykunawanmi ruwachirqaku Pitón llaqtatawan Ramesés llaqtata, chay llaqtakunapim rey Faraón kawsaykunata waqaychaq.

¹²Ichaqa maynataña ñakarichichkaptinkupas aswanraqmi mirarqaku, chaynapim Israelpa mirayninkunamanta Egipto runakuna mancharisqallaña karqaku.

¹³Egipto runakunam maqa-maqarispa Israelpa mirayninkunawan servichikurqaku.

¹⁴Mana aguantay atina sasallaña llamkaykunawanmi ñakarichirqaku, mitu ruwaypi, adobe chutaypi hinaspa chakra llamkaykunapi. Chay ruwaykunapi llamkachispam Israelpa mirayninkunata llumpayta ñakarichirqaku.

¹⁵Egipto nacionpa reyninqa rimarqataqmi Sifrawan chaynataq Fuawanpas, paykunam hebreo castakunapa parterankuna karqaku, hinaspam kamachirqa:

¹⁶Hebreo casta warmikunata qespichispaykichikqa imam wawa kasqantam qawankichik; qari kaptinqa wañuchinkichikmi, warmi kaptinmi ichaqa ama imanankichikchu, nispa.

¹⁷Chay parterakunam ichaqa Diosta manchakusqankurayku, Egipto nacionpi reypa kamachisqanta mana kasukuspanku qari wawakunata mana wañuchirqakuchu.

¹⁸Chaymi parterakunata qayachispan rey nirqa: ¿Imatataq kayta ruwachkankichik? ¿Imanasqataq qari wawakunata mana wañuchinkichikchu? nispa.

¹⁹Hinaptinmi rey Faraonta parterakuna nirqaku: Hebreo casta warmikunaqa manam Egipto warmikuna hinachu. Paykunaqa kallpasapa kasqankuraykum partera manaraqpas chayachkaptin qespikurunkuña, nispanku.

²⁰Parterakunatam Dios favorecerqa chaymi Israel runakuna mirasqankuman hina kallpasapallaña rikurirqaku.

²¹Parterakunapa ayllunkunatapas Diosta manchakusqankuraykum achkata mirachirqa.

²²Chaymi lliw runankunata Faraón kamachirqa: Hebreokunapa qari churin naceqtaqa mayuman wischuychik, warmi churikunatam ichaqa ama imanankichikchu, nispa.