Read CHUYA QELLQA La Biblia en Quechua de Ayacucho 2012 Éxodo 11 Bible Online

Éxodo 11 - CHUYA QELLQA La Biblia en Quechua de Ayacucho 2012 bible

Éxodo 11

¹Moisestam Tayta Dios nirqa: Faraonmanwan Egipto runakunamanmi huk castigotawan apamusaq, chay castigopa qepantam kachaykusunkichik, hinaspam llapallaykichikta qarqosunkichik.

²Israelpa mirayninkunata nimuy, sapakamayá vecinonkumanta qaripas warmipas qorita qollqeta alhajakunata mañakuchunku, nispa.

³Israelpa mirayninkunatam Egipto runakunawan Tayta Dios favorecechirqa. Moisespas Egipto nacionpiqa, Faraonpa serviqninkunapa hinaspa lliw runakunapa respetasqanmi karqa.

⁴Chaymi Faraonta Moisés nirqa: Tayta Diosmi kaynata nin: “Chawpi tutatam Egipto nacionpa chawpinta ñoqa pasasaq.

⁵Hinaptinmi Egipto nacionpi lliw piwi wawakuna wañunqa, tronopi tiyaq Faraonpa piwi churinmanta qallaykuspa maraypa waqtanpi tiyaq criadapa piwinkama, wañunqataqmi llapa animalpa piwi wawanpas.

⁶Chaymi lliw Egipto nacionpi hatun waqakuy kanqa, chayna waqayqa manam haykapipas karqachu nitaqmi kanqachu.

⁷Israelpa mirayninkunamantam ichaqa, runapas nitaq animalpas mana wañunqachu, manam allqollapas anyakunqachu. Chaynapim yachankichik Egipto runakunamanta Israelpa mirayninkunata Tayta Dios sapaqchasqanta.

⁸Hinaptinmi llapallan serviqnikikuna ñoqaman hamuspa, ñawpaqniypi qonqorakuykuspa niwanqaku: “Llapallan runaykikunapiwan kaymanta lloqsiy”, nispanku. Chaymantañam lloqsisaq. Chaynata niruspanmi Faraonpa ñawpaqninmanta llumpay piñasqallaña Moisés lloqsirqa.

⁹Chaymantam Moisesta Tayta Dios nirqa: Faraonqa manam kasusunkichikchu, chaynapim Egipto nacionpi admirakuypaq ruwasqaykunata qawachikusaq, nispa.

¹⁰Moiseswan Aaronmi tukuy kay admirakuypaq kaqkunata Faraonpa ñawpaqninpi ruwarqaku. Ichaqa Tayta Diosmi Faraonpa sonqonta rumiyarachirqa, chaymi Israelpa mirayninkunata Egipto nacionmanta mana kacharirqachu.