Read CHUYA QELLQA La Biblia en Quechua de Ayacucho 2012 Éxodo 13 Bible Online

Éxodo 13 - CHUYA QELLQA La Biblia en Quechua de Ayacucho 2012 bible

Éxodo 13

¹Moisestam Tayta Dios nirqa:

²Llapallan piwikunata qoway, Israelpa mirayninkunamanta punta nacemuqkunaqa ñoqapam, runakuna kaspa otaq animalkuna kaspapas, nispa.

³Chaymi runakunata Moisés nirqa: Amam kay punchawtaqa qonqankichikchu, kay punchawpim Egipto nacionpi esclavo kasqaykichikmanta lloqsirqankichik. Tayta Diosmi hatun atiyninwan kaymanta hurqosurqankichik. Chaynaqa, amam levadurayuq tantataqa mikunkichikchu.

⁴Kunanmi qamkuna kay Abib killapi lloqsichkankichik.

⁵Tayta Diosmi cananeokunapa, heteokunapa, hititakunapa hinaspa jebuseokunapa allpanman pusasunkichik. Ñawpaq taytaykichikmanmi jurarqa tukuy imakunapa kanan chaynataq tukuy kawsaypa qespinan allpata qosunaykichikpaq. Chay allpaman yaykuspaykichikmi kay fiestata Abib killapi ruwankichik.

⁶Qanchis punchawmi mana levadurayuq tantata mikunkichik, qanchis kaq punchawpim Tayta Diosta yupaychana fiesta kanqa.

⁷Qanchisnintin punchawmi mana levadurayuq tantata mikunkichik. Chay qanchisnintin punchawpiqa manam maymi kasqaykichikpiqa imapas levadurawan poqosqaqa kanqachu, nitaqmi levadurapas kanqachu.

⁸Chay punchawpim churikichikkunaman willankichik: “Kaytaqa ruwachkanchik Egipto nacionmanta Tayta Diospa hurqomuwasqanchikmantam”, nispaykichik.

⁹Kayqa kanqa ama qonqanaykichikpaqmi, makikichikpi hinaspa urkuykichikpi marca hinam kanqa, Tayta Diospa yachachikuynin simillaykichikpi kananpaq. Tayta Diosqa hatun atiyninwanmi Egipto nacionmanta hurqomusurqankichik.

¹⁰Chaynaqa, imam punchawpim watan-watan kay fiestata Abib killapipuni ruwankichik.

¹¹Qamkunamanpas, ñawpaq taytay-ki-kunamanpas jurasqanman hina cananeokunapa allpanta Tayta Dios qoykusuptikichikmi,

¹²piwi qari churikichikta Tayta Diosman qonkichik, qonkichiktaqmi punta naceq orqo animaltapas; chaykunaqa Tayta Diospam.

¹³Asnopa punta wawantam ichaqa huk carnerowan cambianki, mana cambiaspaqa kunkantam qewirunki. Piwi qari churikitapas cambiankitaqmi.

¹⁴Churiki qepa punchawta tapususpayki: “¿Imataq kayqa?” nisuptikiqa kaynatam ninki: “Tayta Diosmi esclavo kasqaykumanta hatun atiyninwan Egipto nacionmanta hurqomuwarqaku.

¹⁵Sonqonta rumiyarachispa Faraón mana kachariwaptinkum runapa piwi churinmanta qallarispa animalpa piwinkama llapa piwikunata Egipto nacionpi Tayta Dios wañurachirqa. Chayraykum Tayta Diospaq wañuchiniku llapallan punta nacemuq animalkunata, hinaspam piwi qari churiykutapas cambianiku.

¹⁶Chaynaqa, qampaqmi kanqa makikipiwan urkuykipi marca hina, Egipto nacionmanta hatun atiyninwan Tayta Dios hurqomuwasqankuta ama qonqanaykipaq”, nispa.

¹⁷Israel runakunata Faraón kachaykuptinqa, hichpalla kachkaptinpas Tayta Diosqa manam filisteokunapa ñannintachu pusarqa. Paymi nirqa: Kay runakunaqa guerrawan mancharikuspam Egipto nacionman kutikunmanku, nispa.

¹⁸Chayraykum Diosqa Puka lamar qocha lawman chunniq ñanninta muyuchirqa. Israelpa mirayninkunaqa tropa-tropam Egipto nacionmanta lloq-sirqaku.

¹⁹Moisesqa Joseypa tullun-kunatapas aparqam. Joseymi kawsachkaspallaraq Israelpa mirayninkunata jurachispan nirqa: Diosmi cheqaptapuni watukamusunkichik, hinaptinmi tulluykunata kaymanta apankichik, nispa.

²⁰Israelpa mirayninkunam Sucotmanta lloqsispanku Etam lawpi carpankuta sayachispa chunniqpa qallariyninpi samarurqaku.

²¹Punchawmi Tayta Dios paykunapa ñawpaqninta sayanpa puyupi rirqa, tutañataqmi achkinanpaq sayanpa ninapi rirqa, chaynapi tutapas punchawpas rinankupaq.

²²Paykunapa ñawpaqninmantaqa manam punchawpi sayanpa puyupas nitaq tutapi sayanpa ninapas karunchakurqachu.