Read CHUYA QELLQA La Biblia en Quechua de Ayacucho 2012 Éxodo 19 Bible Online

Éxodo 19 - CHUYA QELLQA La Biblia en Quechua de Ayacucho 2012 bible

Éxodo 19

¹Egipto nacionmanta lloqsimusqanku punchawmanta kimsa killaña pasaruptinmi, Israelpa mirayninkuna Sinaí chunniqman chayarurqaku.

²Paykunam Refidim lawmanta lloqsispanku Sinaí chunniqman chayarurqaku, hinaspam Sinaí orqopa ñawpaqninpi carpankuta sayachirqaku.

³Chaypi kasqanmantam Moisés seqarqa Dioswan tupamunanpaq, hinaptinmi orqomanta Tayta Dios qayamuspan nirqa: Kaynatam Jacobpa castankunata otaq Israelpa mirayninkunata ninki:

⁴“Qamkunaqa qawarqankichikmi Egipto runakunata imam ruwasqayta, qawarqankichiktaqmi ankapa rapranpi hina ñoqapa kasqayman qamkunata apamusqaytapas.

⁵Sichum nisqayta kasukuspa pacto ruwasqaytapas cumplispaykichikqa, qamkunam kankichik wakin runakunamanta akllakusqay runaykuna. Kay pachaqa ñoqapam.

⁶Qamkunam sacerdoteykuna kankichik, ñoqallataña serviwanaykichikpaq sapaqchasqa llaqta”. Chaynatam Israelpa mirayninkunaman willamunki, nispa.

⁷Chaymi Moisés kutiramuspan llaqtapi kamachikuqkunata qayaspan willarqa Tayta Diospa imam nimusqankunata.

⁸Hinaptinmi runakuna chulla runa hinalla nirqaku: Tayta Diospa tukuy kamachiwasqankutam ruwasaqku, nispanku. Moisesñataqmi kutispan runakunapa nisqanta Tayta Diosman willamurqa.

⁹Chaymi Moisesta Tayta Dios nirqa: Ñoqam qanwan rimanaypaq yanay-yanay puyupi hamusaq, chaynapi runakuna uyarispanku tukuy tiempo qampi hapipakunankupaq, nispa. Moisesñataqmi runakunapa nisqanta Tayta Diosman willarqa.

¹⁰Chaymi Tayta Dios nirqa: Runakunaman kutispayki, kunan chaynataq paqarin punchaw chuyanchamuy, pachankuta taqsakuchunku,

¹¹hinaspa mincha punchawpaq allichakuchunku; mincha punchawtam Sinaí orqopa hawanman, llapallan runakuna qawachkaptin ñoqa Tayta Dios uraykamusaq.

¹²Runakuna mana pasanankupaqmi orqopa muyuriqninpi señalkunata churanki. Hinaspam paykunata kaynata ninki: Amam orqomanqa seqankichikchu nitaqmi patallantapas sarunkichikchu, pipas chayna ruwaqqa wañunqam.

¹³Pipas seqaqtaqa, runa kaptin otaq animal kaptinpas rumiwan otaq flechawanmi wañuchinkichik. Runakunaqa seqanqaku maypacham trompeta waqaqta uyarispallankum, nispa.

¹⁴Orqomanta uraykamuspanmi, Diosta yupaychanankupaq runakunata Moisés chuyancharqa. Hinaptinmi runakunapas pachankuta taqsakurqaku.

¹⁵Runakunatam Moisés nirqa: Mincha punchawpaqmi allichakunkichik, chay punchawpaqqa amam warmikichikwanpas puñunkichikchu, nispa.

¹⁶ Kimsa kaq punchaw achikyaqmanmi rayokuna, llipyakuna karqa, yana puyukunañataqmi orqota tapaykurqa; hinaptinmi trompetakuna nisyuta waqaptin campamentopi llapallan runakuna manchakuymanta katkatatarqaku.

¹⁷Moisesñataqmi Dioswan tupanankupaq llapa runakunata campamentomanta lloqsichimurqa, hinaptinmi orqopa ñawpaqninpi sayarqaku.

¹⁸Ninapi Tayta Dios uraykamuptinmi Sinaí orqo qosnirirqa hornopa qosniriynin hinaraq, orqontinmi sinchita katkatatarqa.

¹⁹Cornetam aswan kallpawan qaparirqa, chaymi Tayta Diosta Moisés rimapayaptin rayo hina qaparillawanña contestamurqa.

²⁰Tayta Diosmi Sinaí orqoman uraykamurqa, hinaspam Moisesta chayman rinanpaq qayamurqa, chaymi Moisés seqarqa.

²¹Chaymi Moisesta Tayta Dios nirqa: Uraykuspayki runaykunata nimuy, qawawanankurayku señal churasqaykita ama pasamunankupaq, yanqañataqmi lliw wañurunmanku.

²²Ñoqaman asuykamuq sacerdotekunapas chuyanchakuchunku, yanqañataqmi paykunatapas wañurachiyman, nispa.

²³Chaymi Tayta Diosta Moisés nirqa: Runakunaqa manam Sinaí orqomanqa seqanmankuchu, qanmi kamachiwarqankiku: “Orqopa muyuriqninpi señalta churay hinaspa sapaqchay”, nispayki.

²⁴Hinaptinmi Moisesta Tayta Dios nirqa: Uraykuy hinaspa Aaronwan seqamuychik, sacerdotekunawan runakunam ichaqa ama orqopa muyuriqninpi señal churamusqaykita pasamunqakuchu, chay señaltaqa ñoqapa kasqayman ama seqamunankupaqmi churarqanki, pasaramuptinkuqa yanqañataqmi paykunatapas wañurachiyman, nispa.

²⁵Chaymi runakunapa kasqanman Moisés uraykamuspan chaykunata willarqa.