Read CHUYA QELLQA La Biblia en Quechua de Ayacucho 2012 Éxodo 2 Bible Online

Éxodo 2 - CHUYA QELLQA La Biblia en Quechua de Ayacucho 2012 bible

Éxodo 2

¹Leví ayllumanta kaq qarim, hina Leví castanmanta kaq warmiwan casarakurqa.

²Chay warmim wiksayakuruspan qari wawata wachakururqa, chaymi kuyayllapaq kasqanta qawaykuspan kimsa killata pakarurqa.

³Ichaqa unayta manaña pakayta atispanmi, totoramanta canastillata ruwaruspan yaku mana yaykurunanpaq suma-sumaqta breawan llusirurqa, hinaspam chay canastaman wawata churaykuspan Nilo mayupa patanpi totorakunapa chawpinpi saqeykurqa.

⁴Wawapa paninñataqmi karullamanta wateqarqa, wawata imam pasasqanta qawananpaq.

⁵Faraonpa warmi churinmi mayuta bañakuq rirqa, chaymi criadankunawan mayu patanpi purichkaptinku Faraonpa churinqa totorakunapa chawpinpi huk canastillata rikururqa, hinaspam huknin criadanwan apachimurqa.

⁶Kichaykuspa qawaykuptinmi huk wawa waqachkasqa, chaymi Faraonpa churin llakirikuspan nirqa: Hebreo casta wawacham kayqa, nispa.

⁷Wawapa paninñataqmi Faraonpa warmi churinta nirqa: ¿Munankichu kay wawata ñuñupusunaykipaq hebreo castamanta warmita qayarapamunayta? nispa.

⁸Faraonpa warmi churinñataqmi nirqa: Arí, qayaramuy, nispa. Hinaptinmi chay sipas pasaspan wawapa mamallanta qayaramurqa.

⁹Paytam Faraonpa warmi churin nirqa: Kay wawata apaspa uywapamuway, pagapusqaykim, nispa. Chaymi wawata apaspan uywamurqa.

¹⁰Wawa wiñaruptinmi Faraonpa warmi churinman qoykapurqa, hinaptinmi wawanta hina uywaspan [1]Moiseswan suticharqa: “Yakumanta hurqomusqaymi”, nispan.

¹¹ Huk punchawmi Moisesqa yuyayniyuqña kachkaspan, castankuna watukuq lloqsispan sasa llamkaykunawan ñakarisqankuta qawarqa, qawarqataqmi hebreomasin runata Egipto runa maqasqantapas.

¹²Chaymi kaylawta-waklawta qawakacharikuspa mana pitapas rikuspan, chay Egipto runata wañurachirqa, hinaspam aqopi pamparurqa.

¹³Paqarinnintinpas lloqsispanmi hebreo casta iskay runakunata maqanakuchkaqta rikururqa, hinaspam maqaq kaq runata nirqa: ¿Imanasqataq castaykita maqanki? nispa.

¹⁴Chaymi payñataq nirqa: ¿Pitaq qamta ñoqaykupa kamachiqniyku hinaspa juezniyku kanaykipaq churasurqanki? ¿Egipto runata wañurachispachu ñoqatapas wañurachiwayta munachkanki? nispa. Hinaptinmi sonqonpi mancharikuruspan Moisés nirqa: “Cheqaptapunipas kay ruwasqaytaqa yacharunkum”, nispa.

¹⁵Faraonmi Moisespa imam ruwarusqanta yacharuspan wañurachiypi rirqa. Chaymi Moisesqa Madián lawman Faraonmanta lluptikururqa. Chayman chayaruspanmi pozopa patanpi tiyaykurqa.

¹⁶Madián lawpi sacerdotepam qanchis warmi churinkuna karqa, paykunam taytanpa ovejankunaman tomachinanpaq artesakunaman yaku hurqoq hamurqaku.

¹⁷Ichaqa michiqkuna hamuruspanmi paykunata qarqorurqa. Chaymi Moisés hatarispan sipaskunata amachakurqa, hinaspam ovejankunamanpas yakuta tomachirqa.

¹⁸Maypacham sipaskuna taytankupaman kutiruptinkum, pay tapurqa: ¿Imanasqataq kunanqa chaylla kutiramunkichik? nispa.

¹⁹Paykunañataqmi nirqaku: Egipto runam michiqkunamanta amachawarqaku, hinaspam yakuta hurqopuwaspanku ovejakunamanpas tomachirqa, nispa.

²⁰Chaymi taytanku tapurqa: ¿Maypitaq chay runa kachkan? ¿Ima-nasqataq saqeramunkichik? Mikunanpaq qayamuychik, nispa.

²¹Chaynapim Moisesqa Reuelpa wasinpi yachananpaq arí nirqa. Chaymantam Reuelqa churin Seforawan Moisesta casarachirqa.

²²Warmin Séfora qari wawata wachakuruptinmi Moisés chay wawata Gersonwan suticharqa: “Ñoqaqa huklaw llaqtayuqmi kani runapa llaqtanpi”, nispa.

²³Watakuna pasaruptinmi Egipto nacionpi rey wañururqa. Israelpa mirayninkunañataqmi esclavo kasqankurayku llumpay ñakariypi karqaku, chaymi waqaspanku Diosta mañakurqaku.

²⁴Ñakarispa waqasqankuta Dios uyarispanmi Abrahamwan, Isaacwan hinaspa Jacobwan pacto ruwasqanta mana qonqarqachu.

²⁵Chaymi Israelpa mirayninkuna imaynam tarikusqankuta Dios qawaykurqa.