Read CHUYA QELLQA La Biblia en Quechua de Ayacucho 2012 Éxodo 22 Bible Online

Éxodo 22 - CHUYA QELLQA La Biblia en Quechua de Ayacucho 2012 bible

Éxodo 22

¹Pipas torota otaq ovejata suwakuruspa rantikurunanpaq nakarunqa hinaspaqa, huk toromantam pichqa torotaña sayachipunqa, huk ovejamantañataqmi tawa ovejataña.

²Sichum huk suwata, suwakuchkaqta tariruspa pipas maqachkaspalla wañurachiptinqa, chay maqaqnin runaqa mana huchayuqmi kanqa.

³Punchaw pacha wañurachiptinmi ichaqa, wañuchisqanmanta chay maqaqnin runa sentenciasqa kanqa. Suwakusqanpi hapirachikuspanqa, dueñonmanmi sayachipunqa, sayachipunanpaq mana imanpas kaptinñataqmi suwakusqanmanta pagananpaq rantikusqa kanqa.

⁴Sichum kawsachkaqtaraq suwapa makinpi tarirunqaku torota, asnota otaq ovejata, hinaptinqa chay suwam huk chaynatawanraq sayachipunqa.

⁵Pipas chakranpi otaq uvas chakranpi michinanpaq animalninta qaykunman, hinachkaspan hukpa tarpukuyninta dañorachinqa hinaspaqa chakranmanta chaynataq uvas chakranmantapas allinnin kaqwanmi sayachipunqa.

⁶Pipas kichkakunata ninawan kañachkaptin chay nina huñusqa kawsayta otaq sayachkaq kawsaytapas ruparuptinqa, chay nina ratachiqmi kawsaypa dueñonman kañasqanmanta sayachipunqa.

⁷Pipas qollqenta otaq imantapas runamasinman churachikunman, hinaptinñataq churapachikusqan wasimanta pipas suwarunman, hinaptin chay suwata hapiruptinkuqa chay suwam huk chaynatawanraq sayachipunqa.

⁸Suwata mana tariptinkum ichaqa, chay wasipa dueñon Diospa qayllanman pusasqa kanqa, chaynapi runamasinpa kapuqnin suwakusqanmanta otaq mana suwakusqanmantapas jurananpaq.

⁹Sichum pipas torota, asnota, ovejata, pachata otaq imatapas hapikuykuchkaspan llullakuspan ninman: “Ñoqa-pam kayqa” nispa, hinaptinqa Diospa qayllanpim arreglanqaku, huchayuq kaqmi huk chaynatawanraq sayachipunqa.

¹⁰Pipas runamasinman asnonta, toronta otaq ima animalnintapas waqaychapunanpaq saqeykunqa, hi-naptin chay animal wañurunman, maqapasqa karunman, mana pipapas rikusqanta suwasqa karunman, hinaptinqa

¹¹chay waqaychaqmi Tayta Diospa qayllanpi juranqa runamasinpa kapuqninta mana suwakusqanmanta, hinaptinmi animalpa dueñonqa cheqap kasqanpaq hapinqa, chaynapim chay animal waqaychaqqa mana sayachinqañachu.

¹²Sichum chay animalta kikin suwarachikuspanqa dueñonmanmi sayachipunqa.

¹³Purun animal wañurachiptinqa puchuntam apamunqa chaynapim mana paganqachu.

¹⁴Pipas runamasinmanta uywanta prestakunman hinaptin dueñonpa mana rikusqanta imapas pasarunman otaq wañurunmanpas hinaptinqa pagapunqam.

¹⁵Dueñon rikuchkaptin wañuruptinmi ichaqa mana sayachipunqachu, alquilasqa kaptinqa, haykawan alquilasqallantam pagapunqa.

¹⁶Manaraq qari reqsiq sipasta engañaruspa paywan puñuruspanqa, costumbreman hinam sipaspa taytanman pagapunqa, hinaspam chay sipaswan casarakunqa.

¹⁷Taytan mana casarachiyta munaptinqa, casarachkaq hinam engañasqanmanta costumbreman hina chay sipaspa precionta qollqenpi paganqa.

¹⁸Layqa warmitaqa wañuchinkichikmi.

¹⁹Pipas animalwan qachakuqtaqa wañuchinkichikmi.

²⁰Diosllamanmi sacrificiotaqa ofrecenkichik, idolokunaman ofreceqqa wañunqapunim.

²¹Huklaw llaqtayuqtaqa amam engañankichu nitaqmi ñakarichinkichu. Qamkunapas Egipto nacionpim huklaw llaqtayuq hina karqankichik.

²²Amam viudatapas nitaq mana tayta-mamayuqtapas ñakarichinkichu.

²³Sichum ñakarichiptiki pay-kuna qayakamuwaptinkuqa uyarisaqpunim.

²⁴Chaynata ruwaptikichikqa sinchita piñakuspaymi guerrawan wañuchisqaykichik, warmikichikñataqmi viuda kanqa, churikichikkunapas mana taytayuqmi qepanqaku.

²⁵Sichum qanwan yachaq wakcha runaman qollqeta prestaspaykiqa, mana mirayniyuqllapaqmi prestanki, amataqmi wakin runa hinaqa miraynintapas mañankichu.

²⁶Runamasikipa pachanta prendapi hapispaykiqa manaraq inti seqaykuchkaptinmi kutichipunki,

²⁷chaylla maytukuykunanpaq kasqanrayku. Mana chayqa, ¿imapitaq puñunman? Chay runa qayakamuwaptinqa kuyapayakuq kasqayraykum uyarisaq.

²⁸Amam Diospa contranpi mana allintaqa rimankichu, nitaqmi kamachikuqkunatapas ñakankichu.

²⁹Ama unaspam cosechaykikunapa chaynataq uvasnikikunapa punta kaq rurunta apamuwanki. Piwi churikitapas qowankipunim.

³⁰Vacaykikunapa chaynataq ovejaykikunapa punta kaq wawankunatapas qowankim; nacesqanmantam qanchis punchaw mamanwan kanqa, pusaq punchawmanñataqmi ñoqaman qowanki.

³¹Qamkunaqa ñoqallapaqña sapaqchasqa runakunam kankichik, chayraykum aycha mikuq purun animalkunapa wañuchisqan animalpa aychantaqa ama mikunkichikchu, chay aychataqa allqokunamanmi wischuykunkichik.