Read CHUYA QELLQA La Biblia en Quechua de Ayacucho 2012 Éxodo 24 Bible Online

Éxodo 24 - CHUYA QELLQA La Biblia en Quechua de Ayacucho 2012 bible

Éxodo 24

¹Moisestam Tayta Dios nirqa: Ñoqapa kasqayman qespimuspayki Aaronta, Nadabta, Abiuta hinaspa Israel castakunamanta qanchis chunka ancianokunata pusamuy; paykunaqa ñoqamanta karullapim qonqorakunqaku.

²Qamllam ñoqamanqa asuykamuwanki, pusamusqayki runakunaqa amam asuykamuwanqakuchu amataqmi runakunapas qanwanqa seqamunqachu, nispa.

³Tayta Diospa tukuy nisqankunatam runakunaman Moisés willarqa, willar-qataqmi Tayta Diospa qosqan lliw kamachikuykunatapas, hinaptinmi chulla runa hinalla llapallanku nirqaku: ¡Tayta Diospa tukuy nisqankunatam ruwasaqku! nispanku.

⁴Chaymi Tayta Diospa tukuy nisqankunata Moisés qellqarqa, hinaspam tutapayta hatarispan Sinaí orqopa ñawpaqninpi huk altarta ruwaspan chunka iskayniyuq rumikunata sayachirqa, chaynataqa ruwarqa Israelpa chunka iskayniyuq ayllunkunaman hinam.

⁵Chaymantam Israel casta jovenkunata kacharqa, torokunata sacrificaspa Tayta Dioswan allinlla kasqankumanta ofrecenankupaq.

⁶Moisesmi animalkunapa yawarninta chaskispan, wakinta tazonkunapi churarqa, wakintañataqmi altarpa hawanman challarqa.

⁷Chaymantam Diospa pacto ruwasqan librota hapiykuspan runakuna uyarinanpaq leerqa, chaymi paykunañataq nirqaku: Tayta Diospa tukuy nisqanta kasukuspam ruwasaqku, nispanku.

⁸ Chaymi yawarta hapiykuspan runakunaman challaspan Moisés nirqa: Kay yawarwanmi Tayta Diosqa qamkunawan pacto ruwasqanta cheqapchan, chay pactotam ruwarqa imaynam rimapayawasqanchikman hina, nispa.

⁹Moiseswan kuskam seqarqaku Aarón, Nadab, Abiú hinaspa Israel miraykunamanta qanchis chunka ancianokunapas;

¹⁰chaypim Israelpa Diosninta rikurqaku. Chakinpa sarusqanmi kasqa suma-sumaq kichasqa cielo hina hinaspa zafiro rumi hina.

¹¹Diosqa Israelpi kamachikuqkuna-taqa manam imanarqachu, chaymi Diosta qawaspanku mikuspa tomar-qaku.

¹²Moisestam Tayta Dios nirqa: Ñoqapa kasqay orqoman qespimuy hinaspa chaypi suyaway, tabla rumikunapi qellqasqay yachachikuytawan kamachikuykunatam qanman qosqayki, chaynapi runakunaman yacha-chinaykipaq, nispa.

¹³Chaymi Moisesqa yanapaqnin Josueypiwan Diospa kasqan orqoman qespirqa

¹⁴Manaraq qespichkaspanmi ancianokunata nirqa: Kutimunaykukama kayllapi suyawachkayku. Aaronwan Hurmi qamkunawan qepanqa, pipapas quejan kaptinqa paykunaman rispam willakunkichik, nispa.

¹⁵Orqoman Moisés qespiruptinmi orqota puyu tapaykurqa.

¹⁶Tayta Diospa atiyninmi Sinaí orqopa hawan-man tiyaykurqa. Soqta punchawmi orqota puyu taparurqa. Qanchis kaq punchawpiñataqmi puyu ukumanta Moisesta Tayta Dios qayamurqa.

¹⁷Tayta Diospa atiynintam Israelpa mirayninkuna orqopa puntanpi lenwachkaq ninata hina rikurqaku.

¹⁸Chaymi puyu ukuman yaykuspa orqoman Moisés qespirqa. Hinaspam chay orqopi tawa chunka punchaw tawa chunka tuta kamurqa.