Read CHUYA QELLQA La Biblia en Quechua de Ayacucho 2012 Éxodo 28 Bible Online

Éxodo 28 - CHUYA QELLQA La Biblia en Quechua de Ayacucho 2012 bible

Éxodo 28

¹Israelpa mirayninkunamanta akllaspa Aarontawan churinkunata ñawpaqnikiman qayay, chaynapi Aaronwan churinkuna: Nadab, Abiú, Eleazar hinaspa Itamar sacerdoteykuna kanankupaq.

²Wawqeki Aaronpaqmi suma-sumaq pachata ruwapunki chaynapi ancha reqsisqa kananpaq.

³Chaynaqa, yachaywan huntachisqay llapallan maestrokunata nimuy Aaronpa pachanta ruwanankupaq; chaynapi Aaronqa sapaqchakusqay sacerdotey kananpaq.

⁴Kaykunam ruwananku pachakuna: Pectoral, efod, capa, bordasqa túnica, mitra hinaspa chumpi. Chay pachakunatam wawqeki Aaronpaqwan churinkunapaq ruwanqaku chaynapi sacerdoteykuna kanankupaq.

⁵Chay pachata ruwanankupaqmi hapinqaku qorita, azul qaytuta, morado qaytuta, grosella qaytuta hinaspa kawpusqa linota.

⁶Efodtam ruwanqaku qorimanta, morado qaytumanta, grosella qaytumanta, guindo qaytumanta hinaspa kawpusqa linomanta suma-sumaq kuruyuqta.

⁷Efodta hapinanpaqmi iskaynin hombronkunapi tirantekuna kanqa.

⁸Efodpa hawanpi kaq watakupas huk piezallam qorimanta kanqa, morado qaytumanta, grosella qaytumanta, guindo qaytumanta hinaspa kawpusqa linomanta.

⁹Ónice sutiyuq iskay alhaja rumikunapa hawanpim Israelpa churinkunapa sutinta qellqanki.

¹⁰Huknin rumipim nacesqankuman hina qatinasninpi soqtankupa sutinta qellqanki, huknin rumipiñataqmi wakin soqtapa sutinta qellqanki.

¹¹Sellokuna ruwaqmi Israelpa churinkunapa sutinta chay alhaja rumikunapi qellqanqa, hapiqnintañataqmi qorimanta ruwanki.

¹²Chay iskay alhaja rumikunatam efodpa hombron-pa hawanpi churanki, chaynapi Israelpa mirayninkunata ama qonqarunaypaq. Aaronmi iskaynin hombronpi paykunapa sutinkunata apanqa, chaynapim ñawpaqniyman hamuptin mana qonqasaqchu.

¹³Chay rumikunapa hapiqnintaqa qorimantam ruwanki.

¹⁴Ruwankitaqmi qorimanta simpasqa cadenakunatapas cordonman rikchakuqta, hinaspam chay simpasqa cadenakunata alhaja rumikunapa hapiqninkunaman hapichinki.

¹⁵Efodta ruwasqankuta hinam imam munasqayta yachanaykipaq pectoraltapas ruwachinki, qorimanta, morado qaytumanta, grosella qaytumanta hinaspa kawpusqa linomanta.

¹⁶Chay pectoralqa kanqa iskayman doblasqa cuadradom, largonwan anchonmi cuarto metrokama kanqa.

¹⁷Chay pectoralpa hawanmanmi hapichinki tawa seqe alhaja rumikunata; punta kaq seqepim kanqa sardio, topacio hinaspa carbunclo alhaja rumikuna.

¹⁸Iskay kaq seqepim kanqa esmeralda, zafiro hinaspa diamante alhaja rumikuna.

¹⁹Kimsa kaq seqepim kanqa jacinto, ágata hinaspa amatista alhaja rumikuna.

²⁰Tawa kaq seqepiñataqmi kanqa berilo, ónice hinaspa jaspe alhaja rumikuna. Chaykunaqa sapakamam qoriwan hapichisqa kanqa.

²¹Israelpa chunka iskayniyuq churinkunapa sutinman hinam alhaja rumikunapas chunka iskayniyuq kanqa; sapa rumipim sello hina sapa ayllupa sutin qellqasqa kanqa.

²²Chay pectoralpaqmi qorimanta simpasqa cadenakunata ruwanki, cordonman rikchakuqta.

²³Ruwankitaqmi qorimanta iskay anillokunatapas, chay-kunatam pectoralpa iskaynin puntankunaman churanki.

²⁴Hinaspam chay pectoralpa puntankunapi kaq iskay anillokunaman qorimanta iskay cordonkunata watanki.

²⁵Qorimanta iskay cordonkunapa puntankunatañataqmi ónice alhaja rumipa iskaynin hapichinankunaman churanki, hinaspam efodpa tirantenkunapa ñawpaqninman watanki.

²⁶Iskay anillo-kunatawanmi qorimanta ruwanki, chay-kunatam pectoralpa iskaynin puntankunaman churanki, efodwan tupanakuq law patanpa ukunpi.

²⁷Ruwankitaqmi qorimanta iskay anillokunatapas, chaykunatam churanki efodpa iskaynin tirantenkunapa ñawpaqninpi, uran kaq costurapa hichpanpi, efodpa watakunpa hawanpi.

²⁸Hinaspam morado qaytumanta cordonwan pectoralpa anillonkunamanta hapichinki efodpa anillonkunaman, hinaptinmi pectoralqa efodpa watakunpa hawanpi kanqa, chaynapim pectoralqa efodmanta mana kacharikunqachu.

²⁹Aaronmi sapa kuti “Chuya” sutiyuq lugarman yaykuspan qasqonpa hawanpi apanqa, Israelpa churinkunapa chunka iskayniyuq sutinkunata, pectoralpi ñawpaqniyman apamuwaptinmi mana qonqasaqchu.

³⁰Chay pectoralpim churanki “Urim” sutiyuq rumitawan “Tumim” sutiyuq rumita, chaykunam ñawpaqniyman Aarón hamuptin qasqonpi kanqa. Chaynatam Aaronqa sapa kutilla qasqonpi apaykachanqa. Chay rumikunawanmi Israelpa mirayninkuna ñoqapa imam munasqayta yachanqaku.

³¹Efodpa capantapas morado telamantam ruwanki.

³²Chay capapa chawpinpim huk uchkuta uma ustuchinapaq ruwanki, chay uchkupa muyuriqninpim mana llikikurunanpaq ribeteta churanki.

³³Chay capapa patanpim granadapa rurunta hina adornokunata ruwanki, chaykunam kanqa morado qaytumanta, grosella qaytumanta hinaspa guindo qaytumanta, chay adornokunapa chawpinpiñataqmi qorimanta campanillakunata churanki.

³⁴Puntatam churanki qorimanta huk campanillata, chaypa qepanmanñataqmi huk granadata, chaypa qepanmanñataqmi qorimanta huk campanillata, chaypa qepanmanñataq huk granadata, chaynatam chay capapa muyuriqninpi churanki.

³⁵Chay capawan churakuspam Aaronqa ñoqapa ñawpaqniyman servicio ruwaq yaykunqa, chay campanillakunam yaykuptinpas lloqsimuptinpas mana wañurunanpaq uyarikunqa.

³⁶Huk letrerotam qorimanta ruwanki hinaspam sellopi hina qellqanki “Tayta Diospaq sapaqchasqa” niqta.

³⁷Chay letrerotaqa morado cordonwanmi mitrapa urkun lawman watanki.

³⁸Chay letreroqa Aaronpa urkunpa hawanpim kanqa, chaynapim Aaronqa Israelpa mirayninkuna ñoqapaq sapaqchasqa ofrenda qosqankupi pantarusqanku huchankuta apanqa. Chay letrerom Aaronpa urkunpi tukuy tiempo kanqa chaynapi ñoqapa favorniyta haypanankupaq.

³⁹Awaytaqyá huk tunicatapas, ruwaytaq linomanta mitratapas chaynataq huk sumaq kuruyuq chumpitapas.

⁴⁰Aaronpa churinkunapaqpas tunicakunata, chumpikunata, mitrakunatam ruwanki, chaynapi ancha reqsisqa suma-sumaqllaña kanankupaq.

⁴¹Chay pachakunawanmi wawqeki Aaronta chaynataq churinkunatapas pachachinki, hinaspam aceiteta tallispa ñoqapa sacerdoteykunaña kanankupaq sapaqchanki.

⁴²Paykunapaqqa ruwankitaqmi linomanta calzoncillokunatapas, chaynapi weqawninmanta moqonkama tapakunankupaq.

⁴³Chaywan hinakuspam Aaronwan churinkuna ñoqaman asuykuna carpaman yaykunqaku, hina chayna pachasqallam kanqaku “Chuya” lugarpi kaq altarman serviwanankupaq asuykuspankupas, chaynapim paykunataqa huchankurayku mana wañuchisaqchu. Kayqa wiñaypaq decretom Aaronpaqwan mirayninkunapaqpas kanqa.