Read CHUYA QELLQA La Biblia en Quechua de Ayacucho 2012 Éxodo 29 Bible Online

Éxodo 29 - CHUYA QELLQA La Biblia en Quechua de Ayacucho 2012 bible

Éxodo 29

¹Sacerdotekunata ñoqallapaqña sapaqchaspaykim kaynata ruwanki: Malta torotawan iskay sano carnerokunatam alistanki;

²trigo harinamanta mana levadurayuq tantata hinaspa tortillata, aceitewan untasqa mana levadurayuq galletakunatam ruwanki.

³Chaykunatam canastapi apanki, apankitaqmi chay malta torotawan iskaynin carnerokunatapas, hinaspam santuariopi ofrecemuwanki

⁴Aarontawan churinkunatañataqmi ñoqa-man asuykuna carpapa punkunman asuykachimunki, hinaspam bañachinki.

⁵Sacerdotepa pachankunata hapispam Aaronta tunicawan, efodwan, capawan hinaspa pectoralwan pachachinki, hinaspam efodpa watakunwan watanki,

⁶umanmanñataqmi mitrata churanki, chay mitrapa hawanmanmi “Tayta Diospaq sapaqchasqa” niq letrerota churanki.

⁷Chaymantam ñoqallapaqña sapaqchanapaq aceiteta hapiykuspa Aaronpa umanman talliykunki, chaynatam sacerdoteña kananpaq sapaqchanki.

⁸Churinkunatapas asuykachimuspam tunicawan pachachinki.

⁹Aarontawan churinkunatam chumpiwan chumpichinki, churachinkitaqmi mitrakunawanpas, chaynapim paykunaqa kamachikuyman hina wiñaypaq sacerdotekunaña kanqaku. Chaynatam Aarontawan churinkunata wiñaypaq sacerdoteykuna kanankupaq sapaqchanki.

¹⁰Chaymantam malta torota ñoqaman asuykuna carpapa ñawpaqninman pusachinki, hinaptinmi Aaronwan churinkuna malta toropa umanman makinkuta churaykunqaku.

¹¹Hinaspam carpapa punkunpi ñoqapa ñawpaqniypi chay malta torota wañuchinki.

¹²Yawarninta chaskispam altarpa waqrachankunaman dedoykiwan llusinki, puchuq yawartañataqmi altarpa sikinman tallinki.

¹³Chaynataqmi ukunninpi, kichpanninpi, qaspanninpi, iskaynin rurunninpi wirankunatam hurqospa altarpa hawanpi kañanki.

¹⁴Qarantawan aychantañataqmi akantawan kuskata campamentomanta hawapi kañanki, chay animalqa hucha pampachanapaq wañuchisqa kasqanrayku.

¹⁵Chaynallataqmi huknin carnerotapas hapiykuptiki Aaronwan churinkuna carneropa umanman makinkuta churaykunqaku.

¹⁶Chay carnerotam wañuchispayki yawarninta chaskinki, hinas-pam altarpa muyuriqninman challanki.

¹⁷Carnerota parteparuspaykim ukun-ninkunatawan chakinkunatapas mayllanki, hinaspam chayna partesqata umantawan lliwta montorunki.

¹⁸Hinaspam altarpa hawanpi lliwchata kañanki, chaytaqa kañanki ñoqa Tayta Diospaq miski asnaq ofrenda kasqanraykum.

¹⁹Huknin carnerotapas hapiykuptikim Aaronwan churinkuna carneropa umanman makinkuta churaykunqaku.

²⁰Carnerota wañuchispam yawarninta chaskinki hinaspam Aaronpa, churinkunapa alleq rinrinpa ura patachanman llusinki, llusinkitaqmi alleq makinkupa maman dedonmanpas chaynataq alleq chakinkupa maman dedonpa hawanmanpas, puchuntañataqmi altarpa hawanpa muyuriqninman challanki.

²¹Altarpa hawanpi kaq yawarta hoqarispañataqmi ñoqallapaqña sapaqchana aceitetawan kuskata Aaronpa hinaspa churinkunapa pachanman challaykunki, chaynapim Aaronpas churinkunapas ñoqallataña serviwanankupaq sapaqchasqa kanqaku, pachankupas ñoqallapaqña sapaqchasqataqmi kanqa.

²²Chaymantam chay carneropa ukunninpi, iskaynin rurunninpi, qaspanninpi, kichpanninpi hinaspa chupanpi wirankunata hapiykunki, hapiykunkitaqmi alleq piernantapas; chay carneroqa sacerdoteykunata sapaqchanapaq ofrendam.

²³Ñoqaman ofrecena canastapi mana levadurayuq tantakunamantapas huknin ruyru tantatam hapiykunki, hapiykunkitaqmi aceitewan chapusqa torti-llatawan galletatapas huktakama.

²⁴Chaykunatam Aaronpa chaynataq churinkunapa makinman churanki, hinaspam kuyuchisqa ofrendata ñoqa Tayta Diosman ofrecemuwanki.

²⁵Chaymantam makinkumanta chaskiykuspa lliw kañana aychatawan kuskata altarpa hawanpi kañanki, chaykunaqa ñoqa Tayta Diospaq miski asnaq kasqanrayku. Chayqa ñoqapaq kañasqa ofrendam.

²⁶Aaronta sacerdotey kananpaq sapaqchaspaykim, carneropa pechonta hoqarispa, kuyuchina ofrendata ñoqa Tayta Diospa qayllaypi ofrecemuwanki. Chay carneropa pechonqa qampaqmi kanqa.

²⁷Aaronwan churinkuna sacerdoteykunaña kanankupaq kuyuchina ofrendata ofrecewasqayki carneromantam pechontawan piernanta sapaqchanki. Chaykunam Aaronpaqwan churinkunapaq kanqa.

²⁸Chay kamachikuymi kanqa Aaronpaqwan churinkunapaq. Pipas Israelpa mirayninkunamanta ñoqa Tayta Dioswan allinlla kasqanmanta ofreceqmi sacerdotekunaman chay partesqa carneropa pechontawan piernanta qonqa. Chaymi Israelpa mirayninkunapaq wiñaypaq kamachikuy kanqa.

²⁹Aaronpa chuya pachankunaqa qepan hamuq churinkunapaqmi kanqa. Sacerdote kanankupaq aceitewan tallispa sapaqchasqa kaspankum pachakunqaku.

³⁰Asuykamuwananku carpapi “Chuya” lugarman serviwananpaq Aaronpa rantinpi yaykuq miraynin sacerdoteqa qanchis punchawpunim Aaronpa pachanwan pachasqa kanqa.

³¹Sacerdoteykunaña kanankupaq ofre-cesqayki carneropa aychantam hapispayki chaypaq sapaqchasqa lugarpi yanunki.

³²Chay aychatawan canastapi tantatam Aaronwan churinkuna ñoqaman asuykuna carpapa punkunpi mikunqaku.

³³Chaykunataqa mikunqaku sacerdoteykunaña kanankupaq aceitewan tallispa sapaqchasqa kaptinku huchanku pampachasqa kananpaq ofrenda kasqanraykum. Mana sacerdote kaqkunaqa amam mikunqakuchu ñoqapaq sapaqchasqa kasqanrayku.

³⁴Sichum chay aychamanta otaq tantamanta paqarinnintinpaq puchuruptinqa ninapim kañarunki; chaykunataqa amam pipas mikunqachu, ñoqapaq sapaqchasqa kasqanrayku.

³⁵Imaynam kamachisqayman hinam Aaronwan chaynataq churinkunawanpas ruwanki; qanchis punchawmi tukuy chaykunata ruwanki.

³⁶Sapa punchawmi hucharayku huk malta torota wañuchispa kañanki. Huchamanta malta torota ofrecespaykim altarta chuyanchanki huchakuna pampachasqa kanapaq, hinaspam chuyanchasqa kananpaq aceiteta tallinki.

³⁷Qanchis punchawmi hucharayku ofrendata altarpi ofrecespa chuyanchanki, chaynapim altarqa ñoqallapaqña sapaqchasqa kanqa; imapas altarman tuparuqqa ñoqallapaqña sapaqchasqam kanqa.

³⁸Sapa punchawmi huk watayuq iskay carnerokunata ofrecewanki. Chaytaqa mana tipiytam altarpa hawanpi ruwanki.

³⁹Huknin carnerotam ofrecenki tutapayta, huknin carnerotañataqmi tardeykuyta.

⁴⁰Chay carnerotawan kuskatam iskay kilo harinata ofrecenki, chay harinataqa aceitunasta chamchaspa hurqosqa aceitewanmi chapunki, hinaspam huk litro vinota tallinki.

⁴¹Tardeykuyta ofrecenayki carnerowanpas chaynallatam ruwanki, tutapayta ofrecesqaykita hinallam ofrecenki; chaykunam ñoqapaq miski asnaq ofrenda.

⁴²Chay kañasqa ofrendatam lliw miraynikichik mana tipiyta ruwanqaku, chaytaqa ruwanqaku ñoqapa qayllaypim, asuykuwananku carpapa punkunpi; chaypi tupaptinchikmi rimapayasqayki.

⁴³Chaypim Israelpa mirayninkunawan tupasaq, hinaptinmi chaypi tarikusqayrayku chay sitioqa ñoqallapaqña sapaqchasqa kanqa.

⁴⁴Carpatawan altartam ñoqallapaqña sapaqchasaq. Aarontawan churinkunatapas sacerdoteykuna kanankupaqmi sapaqchasaq.

⁴⁵Hinaspam Israelpa mirayninkunapa chawpinpi yachaspay Diosninku kasaq.

⁴⁶Chaynapim ñoqa Tayta Dios, Diosninku kasqayta yachanqaku. Chawpinkupi yachanaypaqmi Egipto nacionmanta paykunata hurqomurqani. Ñoqa Tayta Diosmi, Diosninku kani.