Read CHUYA QELLQA La Biblia en Quechua de Ayacucho 2012 Éxodo 32 Bible Online

Éxodo 32 - CHUYA QELLQA La Biblia en Quechua de Ayacucho 2012 bible

Éxodo 32

¹Orqoman risqanmanta Moisés manaña rikurimuptinmi, Aaronman asuykuspanku llapa runakuna kaynata nirqaku: Pusawanankupaq dioskunata ruwapuwayku, Egipto nacionmanta hurqomuwaqniyku Moisestaqa imachá pasarun, manam yachanchikchu, nispanku.

²Chaymi paykunata Aarón nirqa: Warmikichikpa, qari churikichikpa hinaspa warmi churikichikpa qorimanta alhajankunata mañaspa apamuwaychik, nispa.

³Hinaptinmi llapallan runakuna, qorimanta alhajankuta hurqokuspanku Aaronman aparqaku.

⁴Payñataqmi chaykunata chulluchispan malta toroman rikchakuqta cincelwan llaqllarurqa, hinaptinmi llapa runakuna ninakurqaku: ¡Israel runakuna, kaymi Egipto nacionmanta hurqomuwaqninchik diosqa! nispanku.

⁵Chayta uyariruspanmi, malta toropa ñawpaqninpi huk altarta Aarón ruwarurqa, hinaspam qayakurqa: ¡Paqarinmi Tayta Diospaq fiestata ruwasun! nispa.

⁶Chaymi paqarinnintin tutapayta hatarispanku, sacrificiokunata ruwaspanku, Dioswan allinlla kasqankumanta ofrendakunata ofrecerqaku. Chaymantam llapa runakuna tiyaykuspanku mikuspa tomarqaku, hinaspam aychankuta kusichirqaku.

⁷Chaymi Moisesta Tayta Dios nirqa: Kutiy, Egipto nacionmanta hurqomusqayki runakunam millakuypaqta ruwachkanku.

⁸Kamachikuyniykunamanta rakikuruspankum qorita chullurachispa torillota ruwakurunku, hinaspam yupaychaspanku animalkunatapas wañuchipuspanku nichkanku: “¡Yaw Israel runakuna, kaymi Egipto nacionmanta hurqomuwaqninchik diosqa!” nispanku.

⁹Huktawanmi Moisesta Tayta Dios nirqa: Kay runakunata qawaspaymi yacharuni cheqaptapuni rumi sonqo kasqankuta.

¹⁰Chaynaqa, piñakuyniywan castigarunaypaq saqeykuway, paykunata tukuruspaymi qampa miraynikimantaña hatun nacionta ruwasaq, nispa.

¹¹Chaymi Tayta Diosta ruegakuspan Moisés nirqa: Dios Taytalláy, amayá piñakuychu Egipto nacionmanta hurqomusqayki runaykikunapa contranpiqa, paykunataqa hatu-hatun atiynikiwanmi hurqomurqanki.

¹²Egipto runakunachá ninmanku: “Orqopi wañurachinanpaqmi hinaspa kay pachamanta chinkarachinanpaqmi mana allinta tanteaykuspa hurqorun”, nispanku. Taytáy, piñakuynikitayá taniykachiy, runaykikunataqa ama castigaychu.

¹³Serviqniki Abrahamman, Isaacman hinaspa Israelman jurasqaykita yuyariy, paykunatam nirqanki: “Ñoqam cielopi chaskakunata hina miraynikichikta mirachispay prometesqay allpata qosaq, chaynapi wiñaypaq herencianku kananpaq”, nispa.

¹⁴Chaymi Tayta Diosqa mana allin ruwananpaq piensasqanta manaña ruwarqachu.

¹⁵Moisesmi orqomanta kutimurqa iskay tabla rumikunapi chunkantin kamachikuyta aparikuspa, chaykunaqa iskay lawninpi qellqasqam karqa.

¹⁶Chay tabla rumikunaqa Diospa ruwasqanmi karqa, hina kikin Diostaqmi qellqarqapas.

¹⁷Josueymi runakunapa qapariyninta uyariruspan Moisesta nirqa: Guerrapi hinam campamentopi runakuna qaparichkanku, nispa.

¹⁸Chaymi Moisés nirqa: Chay uyarisqayqa manam venceqpa qaparisqanchu, nitaqmi vencechikuqpa qaparisqanchu, aswanqa takikunatam uyarichkani, nispa.

¹⁹Moisesmi campamentoman chayaruspan rikururqa malta torillotawan runakunapa tususqanta, chaymi hapisqan tabla rumikunata piñakuywan chamqarurqa, hinaptinmi orqopa sikinpi pakipakururqa.

²⁰Hinaspam chay qori torillo ruwasqankuta hapiykuspan ninapi kañarurqa, ñutuy-ñutuyta kutaruspanmi yakuman machqeykuspan Israelpa mirayninkunaman tomachirqa.

²¹Aarontañataqmi Moisés nirqa: ¿Imanasurqankitaq kay runakuna hatun huchaman urmaykachinaykipaq? nispa.

²²Chaymi Aarón nirqa: Señorlláy ama piñakuychu, qamqa yachankim kay runakunaqa mana allinman qokusqa kasqankuta.

²³Paykunam niwarqaku: “Pusawananchikpaq dioskunata ruwapuwayku. Egipto nacionmanta hurqomuqninchik Moisestaqa imachá pasarun, manam yachanchikchu”, nispanku.

²⁴Ñoqañataqmi nirqani: “Pipapas qorin kaptinqa apamuwaychik” nispa. Hinaptinmi paykuna qorita apamuwarqaku, chayta ninaman wischuykuptiymi kay torillo lloqsiramurqa, nispa.

²⁵Moisesmi qawaykurqa Aarón saqey-kuptin runakuna munasqankuta ruwaspa enemigonkupa burlakunanpaq hina kasqankuta.

²⁶Chaymi campamentopa punkunpi sayaykuspan Moisés, nirqa: Tayta Diospa kaqkunayá ñoqaman huñunakamuychik, nispa. Chaymi Leviypa llapallan mirayninkuna payman asuykamurqaku.

²⁷Hinaptinmi paykunata Moisés nirqa: Tayta Diosmi, Israelpa Diosninmi kaynata nin: “Sapakama espadaykichikta alistaspa carpan-carpan yaykuspa wawqekichikta, amistadnikichikta hinaspa aylluykichiktapas wañuchiychik”, nispa.

²⁸Hinaptinmi Leviypa mirayninkuna Moisespa nisqanta hina ruwarqaku, chaymi yaqa kimsa waranqa runakuna chay punchawpi wañururqaku.

²⁹Chaymi Moisés nirqa: Kunanmi Tayta Diospa serviqnin kanaykichikpaq churasqa kankichik, churikichiktapas hinaspa aylluykichiktapas wañuchisqaykichikraykum qamkunataqa bendecisunkichik, nispa.

³⁰Paqarinnintin punchawmi runakunata Moisés nirqa: Qamkunam hatunta huchallikurunkichik, kunanmi Tayta Diospa kasqanman ñoqa kutisaq, icharaqpas mañakuptiy pampachaykusunkichikman, nispa.

³¹Tayta Diospa kasqanman kutispanmi Moisés nirqa: Dios Taytalláy, kay runakunam qorimanta diosta ruwakuruspanku hatu-hatunta huchallikurunku.

³²Aswanqa huchankutayá pampachaykuy, mana pampachaspaykiqa libropi qellqasqaykimanta sutiytapas chinkarachiy, nispa.

³³Chaymi Tayta Dios nirqa: Pipas contraypi huchallikuqllatam libroymantaqa chinkachisaq.

³⁴Chaynaqa, kunan kutispa chay runakunata maymi nisqayman pusay. Angelniymi pusasunki, castiganay punchaw chayamuptinñam paykunataqa huchankumanta castigasaq, nispa.

³⁵Chaymi runakunata Tayta Dios castigarqa torillo idolota Aaronwan ruwarachispa yupaychasqankumanta.