Read CHUYA QELLQA La Biblia en Quechua de Ayacucho 2012 Éxodo 5 Bible Online

Éxodo 5 - CHUYA QELLQA La Biblia en Quechua de Ayacucho 2012 bible

Éxodo 5

¹Moiseswan Aaronmi Faraonpa qayllanman yaykuspanku nirqaku: Israelpa yupaychasqan Tayta Diosmi nin: “Llaqtayta kachariy chunniqman rinankupaq, hinaspa fiestata ñoqapaq ruwamunankupaq”, nispa.

²Rey Faraonñataqmi nirqa: ¿Pitaq Tayta Diosqa payta kasuspay Israelpa mirayninkunata kachaykunaypaqqa? Tayta Diostaqa manam reqsinichu, manataqmi Israel miraykunatapas kachariymanchu, nispa.

³Chaymi paykuna nirqaku: Hebreo runakunapa Diosninmi ñoqaykuman rikuriykuwanku. Chayraykum kimsa punchaw puriyta chunniqman rispa Tayta Diosman sacrificiokunata ofrecespa hatunchamusaqku, mana chayqa ñoqaykumanmi ima peste onqoypas otaq guerrapas chayaramuwanmanku, nispanku.

⁴Ichaqa Egipto nacionpa reyninmi paykunata nirqa: Yaw Moisés, Aarón, ¿imanasqataq runakunata chaykunawan atrasankichik? Imam ruwanaykichikman kutispa llamkamuychik, nispa.

⁵Faraonqa nirqataqmi: Qamkunapa aylluykichikqa achkallañam. ¿Qamkunañataqchu llamkanankumanta samarachinkichik? nispa.

⁶Hinaspanmi hina chay punchawllapi, llapa llamkachiqkunatawan capatazkunata kaynata kamachirqa:

⁷Kunanmantaqa amañam adobeta chutanankupaq pajata qonkichikñachu, kikinkuñam huñukamunqaku.

⁸Adobetaqa haykatam ruwarqaku chaynallatam ruwachinkichik, amam imaniraqtapas menosyachinkichikchu. Qellakuspam paykunaqa nichkanku: “Diosninchikta hatunchamusunchik animalkunata ofrecespa” nispanku.

⁹Yanqa rimaykunata ama uyarichkanankupaq as allinniqta llamkachiychik pisipanankukama, nispa.

¹⁰Chaymi llamkachiqkunawan capatazkuna lloqsispanku runakunata nirqaku: Rey Faraonmi kaynata nin: “Pajataqa manañam qosqaykichikñachu.

¹¹Chaynaqa, kikikichikña maymantapas huñukamuychik, llamkaynikichikmi ichaqa mana imayniraqtapas menosyanqachu”, nispa.

¹²Chaymi Israel runakuna, Egipto nacionpi kayman chayman cheqerispanku, pajapa rantinpi rastrojotaña huñumurqaku.

¹³Llamkachiqkunañataqmi kaynata hikutarqaku: Ruwanaykichikta hinallam sapa punchaw ruwankichik, imaynam pajata qosusqaykichikpi hina, nispa.

¹⁴Hinaspam Faraonpa llamkachiqninkuna Israelpa mirayninkunamanta kaq capatazkuna churasqankuta kaynata nispa azoterqaku: ¿Imanasqataq adobe chutasqaykichikta mana haypachinkichikchu qaynakuna ruwasqaykichikman, qayna punchawpas nitaq kunan punchawpas? nispa.

¹⁵Chaymi Israelpa mirayninmanta kaq capatazkuna Faraonman quejakuq yaykuspanku nirqaku: ¿Imanasqataq serviqnikikunata kayta ruwawankiku?

¹⁶Pajata mana qowachkaspankupas “adobeta chutamuychik” nispam hikutawanku, hinaspam serviqnikikunata azotewanku. Chaypaqqa runaykikunam huchayuq, nispa.

¹⁷Ichaqa Faraonmi nirqa: Qella-qellam rikurirunkichik, chayraykum nichkankichik: “Hakuchik Tayta Diosman sacrificiokunata ofrecespa hatunchamusunchik”, nispa.

¹⁸¡Pasawaychik kaymanta hinaspa llamkamuychik! Pajataqa manam qosunkichikchu, adobetapas hina ruwanaykichikta hinallam entregankichik, nispa.

¹⁹Israelpa mirayninmanta kaq capatazkunam sasachakuypi rikurirurqaku: “Amam menosyachinkichikchu sapa punchaw adobe chutaytaqa” nisqanwan.

²⁰Chaymi Faraonpa ñawpaqninmanta lloqsiramuspanku Moiseswan hinaspa Aaronwan tuparurqaku, paykunam hawapi suyachkarqaku.

²¹Hinaspankum nirqaku: Tayta Diosyá juzgaspa castigasunkichik. Qamkunapa hawaykichikmantam Faraonwan runankuna cheqnipakuruwaspanku wañuchiwaykupi richkanku, nispa.

²²Tayta Diosta huktawan mañakuspanmi Moisés nirqa: Señorlláy ¿imanasqataq kay runakunata mana allinta ruwanki? ¿Imapaqtaq kachamuwarqanki?

²³Faraonta qampa sutikipi rimapayaq yaykusqaymantam runaykikunata ñakarichichkan. Qamqa manam runaykikunata libraykunkichu, nispa.