Read CHUYA QELLQA La Biblia en Quechua de Ayacucho 2012 Éxodo 6 Bible Online

Éxodo 6 - CHUYA QELLQA La Biblia en Quechua de Ayacucho 2012 bible

Éxodo 6

¹Chaymi Moisesta Tayta Dios nirqa: Kunanmi Faraonta imam ruwasqayta qawanki, atiyniywan ñakarichiptiyñam kacharisunkichikqa, hinaspam nacionninmanta kikin qarqosunkichik, nispa.

²Moisesta rimapayaspam Tayta Dios nirqa: Ñoqam Tayta [4]Dios kani.

³Abrahamman, Isaacman hinaspa Jacobmanmi rikurirqani “Tukuy Atiyniyuq Dios” sutiywan reqsichikuspay; “Tayta Dios” sutiypim ichaqa paykunaman manaraq reqsichikurqanichu.

⁴Paykunawanmi pactota ruwarqani, chaynapi huklaw llaqtayuq hina yachasqanku Canaán allpata paykunaman qonaypaq.

⁵Israelpa mirayninkunapa ñakarisqankutapas yachanim, paykunawanmi Egipto runakuna servichikuchkanku. Pacto ruwasqaytaqa manam qonqanichu,

⁶chayraykum Israelpa mirayninkunata ninki: Ñoqam Tayta Dios kani. Ñoqam Egipto nacionpi sasa llamkaykunamanta hurqosqaykichik, servipakuq kasqaykichikmantapas librasqaykichikmi. Atiyniywanmi hatun castigokunawan salvasqaykichik.

⁷Llaqtaypaqña hapiykuspaymi Diosnikichik kasaq, qamkunañataqmi Egipto nacionpi sasa llamkaykunapi ñakarisqaykichikmanta hurqoqnikichik Tayta Dios kasqayta yachankichik.

⁸Abrahamman, Isaacman hinaspa Jacobman qonaypaq prometesqay allpamanmi pusasqaykichik. Chay allpata qoptiymi qamkunapaña kanqa. Ñoqam Tayta Dios kani, nispa.

⁹Chaynatam Israelpa mirayninkunata Moisés rimapayarqa. Paykunam ichaqa Moisesta mana kasurqakuchu, sasallaña llamkaypi tarikuspanku llumpay pisipasqa kasqankurayku.

¹⁰Chaymi Moisesta Tayta Dios nirqa:

¹¹Egipto nacionpi rey Faraonpa qayllanman yaykuspa nimuy, kay allpamanta Israelpa mirayninkunata kacharinanpaq, nispa.

¹²Moisesñataqmi Tayta Diosta nirqa: Israelpa mirayninkuna mana kasuwachkaptinqa, ¿imaynataq Faraonqa kasuruwanqa mana ancha rimay atiq runataqa? nispa.

¹³Chaymi Aarontawan Moisesta Tayta Dios kamachirqa, Israelpa mirayninkunatawan chaynataq Faraonta kaynata nimunankupaq: Tayta Diosmi Egipto nacionmanta Israelpa mirayninkunata hurqonaykupaq kamachimuwanku, nispa.

¹⁴Kaykunam taytankumanta sapa ayllupa kamachiqninkuna: Israelpa piwi churin Rubenpa churinkunam karqa: Hanoc, Falú, Hezrón hinaspa Carmi. Paykunam karqaku Rubenpa ayllunkuna.

¹⁵Simeonpa churinkunam karqa: Jemuel, Jamín, Ohad, Jaquín, Zohar hinaspa Cananea warmipa wawan Saúl. Paykunam karqaku Simeonpa ayllunkuna.

¹⁶Leviypa churinkunañataqmi mirayninkuman hina karqa: Gersón, Coat hinaspa Merari. Leviymi pachak kimsa chunka qanchisniyuq watata kawsakurqa.

¹⁷Gersonpa churinkunam ayllunkunaman hina karqa Libni hinaspa Simei.

¹⁸Coatpa churinkunam karqa: Amram, Izhar, Hebrón hinaspa Uziel. Coatmi pachak kimsa chunka kimsayuq watata kawsarqa.

¹⁹Meraripa churinkunam karqa Mahliwan Musi. Paykunam mirayninkuman hina Leví ayllunkuna karqaku.

²⁰Amrammi casarakurqa tían Jocabedwan, chaymi wachakurqa Aarontawan Moisesta. Amrammi pachak kimsa chunka qanchisniyuq watata kawsarqa.

²¹Izharpa churinkunam karqa: Coré, Nefeg hinaspa Zicri.

²²Uzielpa churinkunam karqa: Misael, Elzafán hinaspa Sitri.

²³Aaronmi casarakurqa Aminadabpa churin hinaspa Naasonpa panin Elisabetwan. Paymi wachakurqa Nadabta, Abiuta, Eleazarta hinaspa Itamarta.

²⁴Coreypa churinkunam karqa: Asir, Elcana hinaspa Abiasaf. Paykunam Coré ayllukuna karqaku.

²⁵Aaronpa churin Eleazarpas Futielpa huknin warmi churinwanmi casarakurqa chaymi wachakurqa Fineesta. Paykunam Leví ayllukuna ukupi kamachikuqkuna karqaku.

²⁶Aarontawan Moisestam Tayta Dios kamachirqa, Israelpa mirayninkunata Egipto nacionmanta tropa-tropata hurqomunankupaq.

²⁷Kay Moiseswan Aaronmi rey Faraonta rimapayarqaku Egipto nacionmanta Israelpa mirayninkunata kacharinanpaq.

²⁸Tayta Diosmi Egipto nacionpi Moises-ta rimapayaspan

²⁹nirqa: Ñoqam Tayta Dios kani. Tukuy nisqaykunata Egipto nacionpi rey Faraonman willamuy, nispa.

³⁰Ichaqa Tayta Diostam Moisés nirqa: Ñoqaqa mana ancha rimakuy atiq ru-nam kani ¿imaynataq Faraonqa uyariwanqa? nispa.