Read CHUYA QELLQA La Biblia en Quechua de Ayacucho 2012 Éxodo 7 Bible Online

Éxodo 7 - CHUYA QELLQA La Biblia en Quechua de Ayacucho 2012 bible

Éxodo 7

¹Hinaptinmi Moisesta Tayta Dios nirqa: Qamtaqa Faraonpaqmi ñoqapa rantiypi churayki, wawqeki Aaronñataqmi profetayki kanqa,

²paymanmi ñoqapa tukuy ima kamachisqaykunata ninki, hinaptinmi wawqeki Aaronñataq Faraonman nimunqa Israelpa mirayninkunata Egipto nacionmanta kacharinanpaq.

³Ichaqa ñoqam Faraonpa sonqonta rumiyarachisaq, hinaspaymi Egipto nacionpi achka-achka señalkunatawan admirakuypaq kaqkunata ruwasaq.

⁴Chaywanpas Faraonqa manam uyarisunkichikchu, chaymi Egipto nacionta ñakarichispay Israelpa mirayninkunata tropaykunata hina hurqosaq.

⁵Egipto runakunaman atiyniyta qawachispay Israelpa mirayninkunata paykunapa chawpinmanta hurqoptiymi, Egipto runakuna yachanqaku ñoqa Tayta Dios kasqayta.

⁶Chaymi Moiseswan Aarón, Tayta Diospa kamachisqanman hina ruwarqaku.

⁷Faraonwan rimasqan tiempopim Moisesqa pusaq chunka watanpiña karqa, Aaronñataqmi pusaq chunka kimsayuq watanpiña karqa.

⁸Moisestawan Aarontam Tayta Dios nirqa:

⁹“Milagrota qawachiway” nispa Faraón nisuptikichikqa, Aarontam ninki: Tawnaykita hapispa Faraonpa ñawpaqninman wischuykuy maqta uruman tikrakunanpaq, nispa.

¹⁰Moiseswan Aaronmi, Faraonpa qayllanman yaykuspanku Tayta Diospa kamachisqanman hina ruwarqaku. Chaymi Faraonpa hinaspa serviqninkunapa ñawpaqninman tawnanta Aarón wischuykuptin maqta uruman tikrakururqa.

¹¹Faraonpas yachaysapa runakunatawan layqakunata qayachiptinmi, Egipto nacionniyuq layqakunapas layqayninkuwan chaynata ruwarqaku.

¹²Sapakama tawnankuta wischuykuptinkum chaykunapas maqta uruman tikrakururqa, ichaqa Aaronpa tawnan maqta uruman tikrakuqmi paykunapa maqta uruman tikrakuq tawnankuta millpururqa.

¹³Chaywanpas Tayta Diospa nisqanman hinam Faraonpa sonqon rumiyarurqa, chaymi paykunata mana kasurqachu.

¹⁴Chaymantam Moisesta Tayta Dios nirqa: Faraonqa sonqon rumiyasqa kaptinmi llaqtayta mana kachariyta munanchu.

¹⁵Faraonman tutapayta riy, payqa Nilo mayutam rinqa, chaymi mayupa patanpi paywan tupanaykipaq suyanki, apankitaqmi maqta uruman tikrakuruq tawnatapas.

¹⁶Hinaspam payta ninki: Hebreo runakunapa Diosninmi kachamuwan qanman kaynata ninaypaq: Chunniqpi yupaychamuwananpaq llaqtayta kachariy, nispa. Ichaqa kunankama mana kasuwasqaykiraykum

¹⁷Tayta Dios kaynata nin: Kunanmi Tayta Dios kasqayta yachanki, makiypi tawnawan Nilo mayuta waqtaruptinmi yawarman yaku tikrakurunqa.

¹⁸Chaymi mayupi kaq challwakunapas wañurunqa, mayupas asnariruptinmi Egipto runakunaqa mayupi yaku tomaytapas millakurunqaku, nispa.

¹⁹Moisestam Tayta Dios nirqa: Aaronta niy: Tawnaykita hapispa ma-kikita haywariy Egipto nacionpi mayu-kunapa, yarqakunapa, qochakunapa, qocharayaq yakukunapa hinaspa llapa-challan yakukunapa hawanman chaynapi yawaryarunanpaq. Chaymi lliw Egipto nacionpi, kullumanta chaynataq rumimanta yaku churanankupipas yawar kanqa, nispayki.

²⁰Chaymi Tayta Diospa kamachisqanta hina Moiseswan Aarón ruwarqaku. Tawnanta hoqarispanmi Faraonwan serviqninkuna qawachkaptinku mayuta waqtarurqa, hinaptinmi Nilo mayupi yakukuna yawarman tikrakururqa.

²¹Challwakunapas wañu-ruptinmi mayu asnarirurqa Egipto runa-kunapas mana tomay atinankukama. Lliw Egipto nacionpim yawar karqa.

²²Egipto nacionniyuq layqakunapas layqayninkuwan chaynata ruwaptinkum Faraonpa sonqon rumiyarurqa, chaymi Tayta Diospa nisqanpi hina Moisestawan Aaronta mana kasurqachu.

²³Chaymantam palacionman Faraón kutikurqa, paytaqa chaykunamantaqa manam imapas qokurqachu.

²⁴Egipto runakunañataqmi mayumanta yakuta mana tomayta atispanku mayupa patanpi uchkurqaku limpio yakuta maskaspanku.

²⁵Nilo mayuta Tayta Diospa waqtachisqanmantam qanchis punchawña pasarurqa.