Read CHUYA QELLQA La Biblia en Quechua de Ayacucho 2012 Job 14 Bible Online

Job 14 - CHUYA QELLQA La Biblia en Quechua de Ayacucho 2012 bible

Job 14

¹Warmimanta naceq runapa vidanqa pisillam, hinaspapas sasachakuypa huntasqanmi.

²Wayta hina panchiruspanmi chaylla qawirun, llantuy hina pasaruspa chinkaruqllam.

³¿Chayna runatachu qawariwanki? ¿Chayna runatachu juiciomanraq qayachiwanki?

⁴¿Pitaq qachata chuyayarachinman? Manam pipas atinmanchu.

⁵Cheqaptapunipas runapa punchawninkunaqa yupasqallam kachkan, hayka killam kawsanantapas qanmi churarqanki, maykamam kawsanantapas qanmi señalarqanki, chaytaqa manam pasanqachu.

⁶Ñawikita paymanta asurichiy, hawkallata saqeykuy; llamkapakuq hina llamkayninta tukuruspan pagonwan kusikunantayá saqeykuy.

⁷Sachaqa kuchusqa kaspapas huktawanmi ikllimunqa, chay sachaqa mana pisiytam ikllimunqa.

⁸Sapinkunaña allpapi machuyaruptinpas, kullunña allpapi ismuruptinpas,

⁹yaku nuyuykuptinmi huktawan verdeyarinqa, musoq planta hinaraqmi kallmankuna llanllarinqa.

¹⁰Runam ichaqa wañuruspa chinkarunqa; manam may risqanpas yachakunchu, hinaspaqa ¿maypitaq tarikunqa?

¹¹Imaynam lamar qochamanta yakukuna waspin, imaynam mayukunapas tukuruspa chakirun,

¹²chaynam runapas wañusqanmanta mana hatarinqachu, cielokuna kanankamaqa manam puñusqanmanta rikcharinqachu nitaqmi hatarinqachu.

¹³¡Ima allinraq kanman piñakuyniki pasanankama wañuqkunapa kasqanpi pakaykuwaptikiqa! ¡Ima allinraq kanman plazota qoykuwaspayki yuyariwaptikiqa!

¹⁴Huk runa wañukuspan, ¿yaqachu kawsarimunmanraq? kawsakuyniypim sapa punchaw suyallasaq, llakikuyniymanta librasqa kanaykamam suyallasaq.

¹⁵Qayakamuptikim contestamusqayki; unanchaqniy kasqaykiraykum kuyakuywan qawariykamuwanki.

¹⁶Yupiykunatapas yupaytam munanki, huchaykunatam ichaqa qonqarunkiña.

¹⁷Mana kasukusqaytapas costalpi wichqaruspam, mana allin ruwasqaykunata pampachaykuwanki.

¹⁸Orqopas wichiykuspam cheqerun, qaqakunapas maymi kasqanmantam suchurun.

¹⁹Imaynam rumikunata yaku llaqllarun, imaynam allpata lloqlla aparun, chaynam qampas runapa hapipakuyninta yanqacharunki.

²⁰Runataqa wiñaypaqmi vencerunki, allpanmantam wischurunki, rikchaynintapas tikraruspaykim aviarunki.

²¹Churinkuna alabasqa kaptinpas payqa manañam yachanqañachu, churinkuna uchuychasqa kaptinpas payqa manañam yachanqañachu.

²²Runaqa sapallanmi cuerponpa nanayninwan ñakarin, kikillantaqmi kikinmanta llakikun, nispa.