Read CHUYA QELLQA La Biblia en Quechua de Ayacucho 2012 Job 31 Bible Online

Job 31 - CHUYA QELLQA La Biblia en Quechua de Ayacucho 2012 bible

Job 31

¹Ñawiywanmi contratota ruwarqani sipaskunata mana munapayanaypaq.

²Hanaq pachapi kaq Diosqa, ¿ima premiotataq qowanman? Tukuy Atiyniyuq Diosqa, ¿ima herenciatataq qowanman?

³¿Manachum llakikuyqa mana allin runakunapaq? ¿Manachum sasachakuyqa mana allin ruwaqkunapaq?

⁴¿Manachum Diosqa imayna purisqayta qawachkan? ¿Manachum Diosqa ichisqaykunatapas yupachkan?

⁵Manam ñoqaqa ima mana allintapas ruwarqanichu, manataqmi pitapas engañaytaqa munarqanichu.

⁶Diosyá mana suwakuq balanzapi pesaykuwachun, chaypim yachanqa mana huchayuq kasqayta.

⁷Sichum allin ñanmanta rakikuruptiyqa, sichum hukpa kaqta munapayaptiyqa, sichum runapa kaqta makiypi tariruptinqa,

⁸tarpusqaytapas hukyá mikukuchun, tarpusqaytapas hukyá cosechakuchun.

⁹Sichum sapaq warmiwan engañarachikuptiyqa, sichum vecinoypa warminta munapayaptiyqa

¹⁰warmiypuniyá hukpa criadanña kachun, mana reqsisqakunayá paywan puñukuchun.

¹¹Chaykunata ruwaruptiyqa mayna huchach kanman karqa, chaykunata ruwaruspayqa juezkunapa juzgasqancha kayman karqa.

¹²Chaynata ruwaruptiyqa, tukuy imaykunatapas ninachá ruparunman karqa.

¹³Sichum criadoykuna imatapas mañawaptinkuqa, ñoqaqa chayllam qoykuq kani.

¹⁴Mana chayqa ¿imaynataq Diospa qayllanmanqa asuykuyman? Cuentata mañaykuwaptinqa, ¿imaynataq contestakuyman?

¹⁵Ñoqatapas paykunatapas mamaykupa wiksanpiqa Diosllam unanchawarqaku, Ñoqamanpas paykunamanpas hina payllam kawsayta qowarqaku.

¹⁶Wakchakunapa mañakuwasqantaqa manam negarqanichu, viudakunatapas yarqaymanta kaqtaqa manam qawarqanichu.

¹⁷Mikuspaypas manam sapallaychu mikurqani, aswanqa mana tayta-mamayuqku-namanmi haywaykuq kani.

¹⁸Mana tayta-mamayuqkunapaqpas taytan hinam karqani, viudakunapaqpas nanachikuqninkum karqani.

¹⁹Pipas mana pachayuq kaspa ñakarisqanta rikuykuspayqa, wakcha kasqanrayku qatakuykunanpaq mana imanpas kaptinqa,

²⁰ovejaykunapa millwanwanmi qoniykachirqani, paykunañataqmi chay yanapaykusqayta reqsikullaqku.

²¹Juezkunawan reqsinakusqayraykuqa mana tayta-mamayuqpa contranpiqa manam hoqarikurqanichu.

²²Mana cheqap kaptinqa rikraypas wasaymantayá wichiruchun, brazoypas hombroymantayá pakikuruchun.

²³Ñoqallayqa Diospa castigontam manchakurqani, paypa qayllanpiqa manam hoqarikuyta atiymanchu.

²⁴Manam haykapipas qorimanqa hapipakurqanichu, manataqmi qoritaqa “qanmi hapipakunayqa kanki” nirqanichu.

²⁵Manam llumpay apu kayniypichu kusikurqani, nitaqmi llumpay qollqe ganasqaypichu kusikurqani.

²⁶Intipa kancharisqantam rikurqani, killapa sumaqllaña achkirisqantam rikurqani;

²⁷ichaqa manam pakakuspallapas yupaycharqanichu, manataqmi karullamantapas muchapayarqanichu.

²⁸Chay ruwayqa castigopaqcha kanman, hanaq pachapi kaq Diosta negaycha kanman.

²⁹Cheqniwaqniyña llakipi tarikuptinpas manam kusikurqanichu, ima mana allinña pasaruptinpas manam kusipayarqanichu.

³⁰Paytaqa manam haykapipas ñakarqanichu, nitaqmi wañunantapas munarqanichu.

³¹Criadoykunaqa manam niqkuchu: ¿Pitaq mikuyniwan mana saksaykurqakuchu? nispanku.

³²Huklaw llaqtayuqkunataqa manam hawapi puñunantaqa munarqanichu, illaqkunamanpas wasiytaqa kichaykuqmi kani.

³³Wakin runakuna hinaqa manam huchaytaqa pakarqanichu, nitaqmi millay kaqkuna ruwasqaytapas pakarqanichu,

³⁴runakunata manchakuspayqa, aylluykuna penqawananta manchakuspayqa, manapunim upallakuykuspayqa pakakurqanichu.

³⁵¡Ima allinraq kanman pipas uyariykuwaptinqa! Firmaywanmi respetachisaq rimarikusqaytaqa; Tukuy Atiyniyuq Diosyá contestawachun qellqaykuspa yanqamanta tumpawaqniykunamantaqa.

³⁶Chaytam hombroypi apasaq, coronata hinam churakusaq.

³⁷Tukuy ima ruwasqaymantam Diosman cuentata qosaq, mana manchakuspam qayllanman asuykusaq.

³⁸Sichum chakraypas contraypi qapariptinqa, surconkunapas waqaptinqa,

³⁹sichum rurunkunata mana pagaspay mikuruptiyqa, llamkaqkunatapas ñakarichiptiyqa,

⁴⁰trigopa rantinpiyá kichkankama qorakunaña wiñachun, cebadapa rantinpiyá kichkakunaña wiñachun, nispa. Kaypim Jobpa rimarikusqan tukun.