Read CHUYA QELLQA La Biblia en Quechua de Ayacucho 2012 Job 42 Bible Online

Job 42 - CHUYA QELLQA La Biblia en Quechua de Ayacucho 2012 bible

Job 42

¹Hinaptinmi Tayta Diosta Job nirqa:

²Ñoqaqa yachanim tukuy imapas ruway atiq kasqaykita, imatapas ruwayta munaptikiqa manam pipas harkakunmanchu.

³¿Pitaq ñoqaqa kani yachaynikimanta iskayrayaspay mana yuyayniyuq kasqayta qawachikunaypaqqa? Mana entiendesqay kaqkunamantam rimarqani, admirakuypaq kaqkunamantam mana yachaspay rimarqani.

⁴Qanmi kaynata niwarqanki: “Uyariway, ñoqam rimapayasqayki, kay tapusqaykunata contestaway”, nispayki.

⁵Qanmantaqa kaykamam uyaylla-uyariq kani, kunanmi ichaqa ñawiywan rikuykuyki.

⁶Chayraykum tukuy ima rimasqayta reqsikuni, allpapiwan uchpapim tiyaykuspay wanakuni, nispa.

⁷Tukuy chaykunata Jobman Tayta Dios niruspanmi, Temán lawmanta kaq Elifazta nirqa: Ancha piñasqam kachkani qampaq chaynataq iskaynin amigoykikunapaqpas. Qamkunaqa manam serviqniy Job hinachu ñoqamanta allinta rimarqankichik.

⁸Chaynaqa, kunanyá qanchis torokunata chaynataq qanchis carnerokunata aparikuspa serviqniy Jobman riychik, hinaspayá qamkunapa rantikichikpi lliw kañana sacrificiota ofrecemuwaychik. Serviqniy Jobñataqmi qamkunapaq mañakamuwanqa, hinaptinmi uyariykuspay contraypi mana allinkuna rimasqaykichikmanta pampachasqaykichik. Qamkunaqa manam serviqniy Job hinachu cheqap kaqta rimarqankichik.

⁹Chaynapim Elifazwan Bildad hinaspa Zofar rispanku Tayta Diospa nisqanman hina ruwarqaku, Tayta Diosñataqmi Jobpa mañakusqanta chaskiykurqa.

¹⁰Chay amigonkunapaq Job mañakuruptinmi, ñakariyninta qechuykuspan, tukuy ima kapuqnintapas iskay kuti mastaraq Tayta Dios qoykurqa.

¹¹Hinaptinmi paninkunapas, wawqenkunapas, lliw reqsiqninkunapas Jobta watukurqaku, hinaspam wasinpi convidota ruwaspanku paywan mikurqaku. Tayta Diospa sasachakuykuna qosqanmantapas llakipayaykuspankum sonqonta tiyachirqaku. Sapakamam qori-qollqetawan huk qori anillota qoykurqaku.

¹²Chaymanta qepaman kawsakuy-ninpim Jobta Tayta Dios yapamanta bendeciykurqa, ñawpaq watakunamantapas aswantaraq, chaynapim kapurqa: Chunka tawayuq waranqa ovejankuna, soqta waranqa camellonkuna, iskay waranqa yapuq toronkuna chaynataq waranqa china asnonkunapas.

¹³Kapurqataqmi qanchis qari churinkunapas chaynataq kimsa warmi churinkunapas.

¹⁴Mayor kaq warmi churintam suticharqa [4]Jemimawan, iskay kaqtañataqmi [5]Cesiawan, kimsa kaqtañataqmi [6]Keren-hapucwan.

¹⁵Jobpa warmi churinkuna hina buenamoza sipaskunaqa manam tukuy kay pachapiqa karqachu. Paykunamanmi taytan Job tupaqninta sapakamaman qoykurqa, qoykurqataqmi qari churinkunamanpas.

¹⁶Chaymantam Jobqa kawsakurqa pachak tawa chunka watataraq. Payqa churinkunatapas, willkankunatapas hinaspa willkanpa churinkunatapas rikurqaraqmi.

¹⁷Jobqa ancha yuyaq kayninpiñam wañukurqa.