Read CHUYA QELLQA La Biblia en Quechua de Ayacucho 2012 Job 5 Bible Online

Job 5 - CHUYA QELLQA La Biblia en Quechua de Ayacucho 2012 bible

Job 5

¹Chaynaqa Job, kunanyá qayakuy, ¿yaqachus pipas uyariramusunki? ¿Mayqan angelmantaq hapipakunki?

²Cheqaptapunipas mana yachayniyuqtaqa piñakuyninmi wañuchin, hukpa kapuqninta munapayaq runataqa envidiakuyllanmi wañuchin.

³Ñoqam rikurqani mana yachayniyuq runa apuyaruqta, hina chayllamanmi wasintapas ñakaykurqani.

⁴Churinkunapas mana yanapaqniyuqmi kachkanku, juzgadopipas manam allin arreglotaqa tarinkuchu, nanachikuqninkupas manam pipas kanchu.

⁵Cosechasqankutapas kichkakunapa chawpinmanta hurqoruspankum yarqay runakuna mikukurunku, llapa imankutapas yakunayasqa hinaña envidiakuqkunam apakunqaku.

⁶Mana allin ruwayqa manam allpamantachu wiñamun, sasachakuypas manam allpamantachu paqarimun.

⁷Ichaqa imaynam nina chispa altoman hoqarikun chaynam runapas nacemun ñakariykunapi kawsananpaq.

⁸Qam kaspayqa Tayta Diosmanmi kutirikuyman, sasachakuyniytapas paypa makinmancha churaykuyman.

⁹Diosqa yachayninchikpa mana haypasqan kaqkunatam ruwan, admirakuypaq kaqkuna ruwasqanqa mana yupay atinam.

¹⁰Payqa allpamanmi parata chayachimun, chaywanmi chakrakunata parqon;

¹¹uchuychakuqkunatam hatunchan, llakipi tarikuqkunatam yanapan;

¹²sakri runakunapa tanteasqantañataqmi yanqachan, makinkunapa ruwasqan mana qespichisqa kananpaq;

¹³yachaysapa tukuqkunatam kikinkupa sakri kayllankupi wichirachin, mana allinkuna ruway munasqankutam yanqachan.

¹⁴Paykunaqa punchawpacham tutayaypi hina purinku, chawpi punchawpipas tutayaypi hinam purinku.

¹⁵Diosqa wakchakunatam wañuymanta salvaykun, mana allin runakunamantam libraykun, millay runakunapa makinmantam hurqoykun.

¹⁶Payqa mana imayuqkunapa hapipakunanmi, mana allin runakunapa simintam wichqarun.

¹⁷¡Mayna kusisqam Diospa corregisqan runaqa! Chaynaqa, Tukuy Atiyniyuq Diospa castigontaqa amayá wischupakuychu.

¹⁸Diosqa runata heridaruspanpas hina kikillantaqmi hampiykun, pimanña nanayta qoykuspanpas hina payllataqmi hampiykun.

¹⁹Soqta sasachakuymantam librasunki, qanchis kaqñataqmi manaña chayamusunkichu.

²⁰Yarqay tiempopipas wañuymantam waqaychasunki, guerra tiempopipas espadamantam hurqoykusunki.

²¹Nina qallu runakunamantam waqaychasunki, ima sasachakuyña hamuqmantapas manam manchakunkichu.

²²Sasachakuymantawan yarqaymantapas asikunkim, mikukuq purun animalkunatapas manam manchakunkichu,

²³chakraykipi rumikunapas manam imanasunkichu, purun animalkunapas hawkallam qanwan kawsakunqa.

²⁴Wasikipipas hawkam kawsakunki llapa imaykita watukuspapas lliwtam tariykunki.

²⁵Miraynikikunapas achkallañam kanqa, mana yupay atina qora hina achkallañam kanqa.

²⁶Yuyaqñapas hina kallpallaykipiraqmi wañukunki, tiempollanpi cosechasqa trigo hinam apasqa kanki.

²⁷Tukuy chaykuna chayna kasqantaqa yachanchikmi; chaynaqa uyariy hinaspa kikikimanta haypay cheqap kasqanta, nispa.