Read CHUYA QELLQA La Biblia en Quechua de Ayacucho 2012 Job 9 Bible Online

Job 9 - CHUYA QELLQA La Biblia en Quechua de Ayacucho 2012 bible

Job 9

¹Jobñataqmi nirqa:

²Arí, ñoqaqa yachanim chayna kasqanta. ¿Runaqa imaynataq Diospa qayllanpi mana huchayuqpaq hapikunman?

³Pipas Dioswan atipanakuyta munaspaqa waranqa tapukuymantachá mana hukllatapas contestanmanchu.

⁴Diosqa llumpay atiyniyuqmi, payqa ancha yachayniyuqmi ¿Pitaq paywan kutipanakuspan allin lloqsirunman?

⁵Diosqa piñakuyninpim orqokunata kuyurichin, mana pipa musyasqantam chaykunata tuñichin.

⁶Kay pachatam maymi kasqanmanta kuyuchin, kay pachapa tiyanankunatam katkatatachin.

⁷Dios kamachiptinqa intipas manam lloqsimunchu, pay munaptinqa chaskakunapas manam kanchamunchu.

⁸Payqa mana pipa yanapasqanmi cielokunata mastarin, lamar qochapa olankunapim purin.

⁹Diosmi unancharqa Suwapa Corralnin sutiyuq chaskakunata. Diosmi unancharqa Qalalu sutiyuq chaskakunata. Diosmi unancharqa sur lawpi kaq chaskakunata.

¹⁰Diosqa yachaypa mana haypay atinan hatu-hatun kaqkunatam ruwan, admirakuypaq kaqkuna ruwasqanpas mana yupay atinam.

¹¹Sichum ñawpaqniyta Dios pasaptinqa manam rikusaqchu, waqtayta pasaptinpas manam musyasaqchu.

¹²Imatapas hapikuykuptin, ¿pitaq kutichipuway ninman? imatapas ruwaptin, ¿pitaq “imatataq ruwachkanki” ninman?

¹³Diosqa manam qonqarunchu piñakuynintaqa, [2]Rahabta yanapaqkunapas paypa qayllanpim kumuykunqaku.

¹⁴¿Imanispaytaq Tayta Diosta kutipayman?

¹⁵Mayna allin ruwaqña kaspaypas paytaqa manam kutipaymanchu; payqa juezniymi, chayraykum llakipayakuyninta mañakullasaq.

¹⁶Sichum mañakusqayta qoykuwaptinpas manam creeymanchu pay uyariwanantaqa.

¹⁷Diosqa wayrawan parawanmi ñakarichiwan, heridaykunatapas yanqamantam mirarachin.

¹⁸Samayniy millpuykunaytapas mana saqeykuwaspam ñakariywan llakikuywan huntaykuwan.

¹⁹Kallpanmanta rimaptinchikpas Diosqa tukuy atiyniyuqmi, juicioman qayachisqapas ¿pitaq payta pusachimunman?

²⁰Allin ruwaqpaqña hapikuptiypas payqa mana allin ruwaq kasqaytam qawaykachiwanman.

²¹Mana huchayuq kasqaypas manam imapas qokuwanchu, kawsaytapas amiruniñam.

²²Tukuy imapas chaynallam, chayraykum nini: Huchayuqtapas mana huchayuqtapas Diosqa iskaynintam chinkachin, nispay.

²³Sichum imawanpas runa qonqaymanta wañuptinqa, mana huchayuq runapa ñakariynninwanqa Diosqa asikunmi.

²⁴Mana allin runakunapa makinmanmi kay pachatapas churaykun, paymi juezkunapa ñawintapas wichqarun. Sichum Dios mana chaykunata ruwaptinqa ¿pitaq chayta ruwan?

²⁵Wataykunapas utqayllamanmi kallparun, allin kaqtapas mana rikuchkaspanmi lluptirun.

²⁶Utqayman kallpaq barcokuna hinam pasarun, mikunanman pawaykuq anka hinam pawarun.

²⁷Sichum nisaq: Quejaykunatapas qonqaspa, llaki uyayuq kayniytapas kusikuymanña tikraspa, kallpanchakusaq,

²⁸hinaptinpas llapa nanayniykunam yapamanta mancharichiwan, ñoqaqa yachakunim Diosqa huchayuqpaq hapiwasqanta.

²⁹Sichum huchayuqpaq hapiwaptinqa yanqapaqñam kallpanchakuyniypas.

³⁰Jabonwanña mayllakuptiypas, lejiawanña makiyta chuyanchaptiypas,

³¹qamqa mitumanraqmi wischuykuwanki, pachaypunipas ñoqamantaqa millakuwanmi.

³²Diosqa manam ñoqa hina runachu payta kutipaspay juezpa qayllanman apanakunaykupaqqa.

³³Ima allinraq kanman allin arreglo ruwaykuwaqniyku juez kaptinqa,

³⁴chaynapi Dios amaña ñakarichiwananpaq, nitaq manchachiwananpaq.

³⁵Hinaptinqa mana manchakuspaycha rimarikuyman, ñoqaqa yachakunim paytaqa mana imapipas pantasqayta, nispa.