Read CHUYA QELLQA La Biblia en Quechua de Ayacucho 2012 Salmos 103 Bible Online

Salmos 103 - CHUYA QELLQA La Biblia en Quechua de Ayacucho 2012 bible

Salmos 103

¹Davidpa takisqan Tukuy almaywanmi Tayta Diosta hatunchasaq, tukuy sonqoywanmi chuya sutinta yupaychasaq.

²Tukuy almaywanmi Tayta Diosta hatunchasaq, tukuy ima qowasqantapas manam qonqasaqchu.

³Paymi huchaykuna pampachaqniyqa, paymi tukuy nanayniykuna hampiykuqniyqa.

⁴Payqa wañuymantam pakaykuwan, kuyapayariwaspam yanapaykuwan.

⁵Payqa allinnin kaqkunatam qoykuwan, ankata hinam musoqyaykachiwan.

⁶Tayta Diosqa allin arreglo ruwaqmi, ñakarichisqakuna nanachikuqmi.

⁷Moisesmanmi ñanninkunata reqsichirqa, Israelpa mirayninkunamanmi ruwasqankunata qawachirqa.

⁸Tayta Diosqa llakipayarikuspa kuyakuqmi, mana chaylla piñakuruqmi, ancha kuyakuq sonqoyuqmi.

⁹Manam wiñaypaqchu anyawasun, manam wiñaypaqchu piñakuwasun.

¹⁰Manam huchanchikman hinachu ñakarichiwanchik, nitaqmi mana allin ruwasqanchikman hinachu pagawanchik.

¹¹Imaynam kay pachapa hawanpi cielokuna hatu-hatun, chayna hatunmi kuyakuyninpas kasukuqninkunapaqqa.

¹²Imaynam intipa qespimunan law intipa seqaykunan lawmanta karupi kachkan, chaynatam huchanchikkunatapas ñoqanchikmanta karuncharachin.

¹³Imaynam taytan churinkunata llakipayan, chaynam Tayta Diospas manchakuqninkunata llakipayan.

¹⁴Payqa yachanmi imamanta ruwasqam kasqanchiktapas, reqsinmi allpamanta ruwasqa kasqanchiktapas.

¹⁵Runapa kawsayninqa qora hinallam, purunpi wiñaruq wayta hinallam.

¹⁶Wayra qespiramuspanmi chay qorata chinkarachin, manam yachakunchu maypim wiñasqanpas.

¹⁷Tayta Diospa kuyakuyninmi ichaqa wiña-wiñaypaq, kasukuqninkunawanmi kachkan, allin ruwayninpas miraymanta-miraykamam.

¹⁸Pacton waqaychaqkunawanmi kachkan, kamachikuyninkunata kasukuqkunawanmi kachkan.

¹⁹Tayta Diosmi trononta hanaq pachapi churarun, munaychakuyninqa tukuy imapa hawanpim kachkan.

²⁰Atiyniyuq angelkuna, Tayta Diosta qapaqchaychik; kamachisqanta kasukuqkuna payta yupaychaychik.

²¹Llapallan tropankuna, Tayta Diosta hatunchaychik; munasqanta ruwaspa serviqninkuna, payllataña yupaychaychik.

²²Llapallan unanchasqankuna, Tayta Diosta yupaychaychik; munaychakuyninpi kaqkuna, payllataña hatunchaychik. ¡Tukuy almaywanmi Tayta Diosta hatunchasaq!