Read CHUYA QELLQA La Biblia en Quechua de Ayacucho 2012 Salmos 106 Bible Online

Salmos 106 - CHUYA QELLQA La Biblia en Quechua de Ayacucho 2012 bible

Salmos 106

¹¡Aleluya! ¡Allin kasqanmanta Tayta Diosta yupaychaychik! ¡Wiñaypaq kuyakuq kasqanmanta graciasta qoychik!

²¿Pitaq rimarinqa Tayta Diospa atiywan ruwasqankunamanta? ¿Pitaq willakunqa yupaychasqa kasqanmanta?

³¡Mayna kusisqam mana pimanpas sayapakuspa ruwaqkunaqa! ¡Mayna kusisqam mana pimanpas sayapakuspa allin arreglo ruwaqkunaqa!

⁴Dios Taytalláy, llaqtaykita kuyapayasqaykirayku yuyariykullaway, salvanaykipaq hamuspayki yuyariykullaway,

⁵chaynapi akllasqaykikunapaq allin ruwasqaykita qawanaypaq, nacionnikipa kusikusqanwan kusikunaypaq, runaykikunawan kuska yupaychanaypaq.

⁶Ñawpaq taytayku hinam huchallikuruniku, mana allinkunatam ruwaruniku, millakuypaq huchakunatam ruwaruniku.

⁷Egipto nacionpi milagrokuna ruwasqaykipas ñawpaq taytaykutaqa manam imapas qokurqachu, waknataña kuyasqaykitam mana yuyarirqakuchu, Puka lamar qochapa patanpim contraykipi hatarirqaku.

⁸Chaywanpas Diosmi sutinrayku salvaykurqa, chaynapi atiynin reqsisqa kananpaq.

⁹Qaqchaspanmi Puka lamar qochata chakichirqa, chaypa chawpintam chaki allpanta hina pusarqa.

¹⁰Chaynatam enemigonkunamanta salvarqa, chaynatam ñakarichiqninkunamanta librarqa.

¹¹Enemigonkunatam yaku pamparurqa, manam hukllapas lluptirqachu.

¹²Chayraqmi Diospa nisqanpi creerqaku, hinaspam takispa payta yupaycharqaku.

¹³Ichaqa Diospa ruwasqankunatam chaylla qonqarurqaku, manam paykunapaq tanteasqankunatapas suyarqakuchu.

¹⁴Chunniqpipas munasqallankuta mikuyta munaspankum Tayta Diosta piñachirqaku.

¹⁵Mañakusqankutam Tayta Dios qorqa, ichaqa wañuchikuq onqoytam paykunaman kachaykurqa

¹⁶Campamentopipas paykunaqa Moisesmantawan Aaronmantam envidiakurqaku, Tayta Diospaq sapaqchasqa kasqanmantam enviadiakurqaku.

¹⁷Chaymi allpa kichakuykuspan Datán runata millpururqa, Abiramtapas qatiqninkunatawanmi pamparurqa.

¹⁸Paykunapa contranpim nina ratarirurqa, mana allin ruwaq runakunatam ruparurqa.

¹⁹Horeb lawpim qorita chulluchispa torillo idolota ruwarqaku, chaypa qayllanpim qonqorarqaku.

²⁰Tukuy atiyniyuq Diosninku yupaychayta saqeruspankum pasto mikuq toroman rikchakuq idolotaña yupaycharqaku.

²¹Paykunaqa salvaqninku Diostam qonqarurqaku, atiyninwan Egiptopi tukuy ima ruwasqantam qonqarurqaku.

²²[2]Cam allpapi admirakuypaq ruwasqantam qonqarurqaku, Puka lamar qochapi manchakuypaq ruwasqantam qonqarurqaku.

²³Paykunata puchukarachinanpaqmi Dios rimarirqa, ichaqa akllakusqan Moisesmi rantinkupi sayaykurqa Diospa piñakuyninta tanichinanpaq, chaynapi mana chinkachisqa kanankupaq.

²⁴Diospa prometesqanpi mana iñispankum munayllapaqña allpata wischupakurqaku.

²⁵Carpanku ukupim Diospa contranpi rimarqaku, Tayta Diospa nisqantam mana kasukurqakuchu.

²⁶Chayraykum Diosqa chunniqpi chinkachinanpaq paykunapa contranpi jurarqa,

²⁷mirayninkutapas nacionkunapi wañuchinanpaqmi nirqa, huklaw nacionkunaman cheqechinanpaqmi rimarirqa.

²⁸Baal-peor sutiyuq idolopa qatiqninñam rikurirurqaku, mana kawsayniyuq dioskunaman ofrecesqankutam mikurqaku.

²⁹Chaynata ruwaspam Diosta piñachirqaku, chaymi paykunata peste onqoywan wañuchirqa.

³⁰Ichaqa Fineesmi chay millakuypaq hucha ruwaqta wañurachirqa, chayñam peste onqoy tanirurqa.

³¹Chaymi paytaqa allin ruwaqpaq Dios chaskirqa, hamuq miraykunapa wawa-churinkupas paymanta yuyarinankupaq.

³²Yakupa kasqan Meriba lawpim Diosta piñachirqaku, paykunapa huchanmantam Moisespas hukman tarikururqa,

³³chaymi llumpay piñakurusqanrayku, hapisqantaña llutanpi rimarqa.

³⁴Llaqtakunata puchukachinankupaq Tayta Dios kamachiptinpas manam puchukachirqakuchu.

³⁵Aswanqa chay llaqtakunamanmi hukllawakururqaku, paykunapa imam ruwasqankutañam qatipakurqaku.

³⁶Idolokunatañam yupaycharqaku, chaykunam paykunata pantachirqa.

³⁷Churinkutapas qarita-warmitam demoniokunapaq wañuchirqaku.

³⁸Mana huchayuqkunapa yawarnintam chaqchurqaku, wawa-churinkupa yawarnintam Canaán allpapi idolokunapaq chaqchurqaku, chay ruwasqankuwanmi allpatapas millakuypaqta ruwarurqaku.

³⁹Chay ruwasqankuwanmi millakuypaqña rikurirurqaku, chuchumika warmi hinam ruwayninkuwan huchallikurqaku.

⁴⁰Tayta Diosmi runankunapa contranpi llumpayta piñakururqa, runankunatam millakuypaqtaña qawarqa.

⁴¹Diosta mana reqsiq nacionkunamanmi qoykurqa, cheqniqninkunañam paykunapi munaychakurqa.

⁴²Enemigonkunapa ñakarichisqanmi karqaku, paykunapa munaychakusqanñam karqaku.

⁴³Achka kutitam paykunata Dios librarqa, ichaqa manam rimapayasqankunata kasukurqakuchu. Mana allin ruwasqankumantam uchuychasqa karqaku.

⁴⁴Chaywanpas Diosqa llakikuypi tarikusqankutam qawarirqa, qaparispa qayakusqankutam uyarirqa.

⁴⁵Paykunawan pacto ruwasqantam yuyarirqa, sinchi kuyapayakuq kasqanraykum nanaykachikurqa.

⁴⁶Preso apaqninkunawanmi llakipayariykachirqa.

⁴⁷Señornillayku, Dios Taytallayku, salvaykullawayku. Nacionkunamanta huñuykuwayku, chuya sutikita kusikuyllawanña hatunchanaykupaq.

⁴⁸Israelpa yupaychasqan Tayta Diosyá wiñaymanta wiñaykama yupaychasqa kachun. Llapallan runakunayá ¡Amén! nispa nichunku. ¡Aleluya!