Read CHUYA QELLQA La Biblia en Quechua de Ayacucho 2012 Salmos 107 Bible Online

Salmos 107 - CHUYA QELLQA La Biblia en Quechua de Ayacucho 2012 bible

Salmos 107

¹Tayta Diosta yupaychaychik payqa ancha kuyakuqmi, kuyapayakuyninqa wiña-wiñaypaqmi.

²Chaynataqa nichunku: Tayta Diospa salvasqankuna, enemigonkunamanta librasqakuna,

³intipa qespimunan lawpi nacionkunamanta, intipa seqaykunan lawpi nacionkunamanta, norte lawpi, sur lawpi nacionkunamanta, lloqsimuqkuna.

⁴Chinkasqam chunniqpi purirqaku, yachananku llaqtaman riq ñantam mana tarirqakuchu.

⁵Yarqaymantawan yakumantam wañunayarqaku.

⁶Llakikuypi kaspankum Tayta Diosta qayakurqaku, chaymi sasachakuyninkumanta libraykurqa.

⁷Sumaq ñannintam paykunata pusarqa, yachanankupaq llaqtamanmi paykunata pusarqa.

⁸Kuyakuyninmanta Tayta Diosman graciasta qoychik, runakunapaq admirakuypaq ruwasqankunamanta graciasta qoychik.

⁹Payqa yakunayayninkutam tanichin, yarqasqatam saksachin.

¹⁰Sinchi tutayaypim ñakarichisqa karqaku, cadenawan watasqam kawsarqaku.

¹¹Tayta Diospa kamachikuyninta mana kasukusqankuraykum, tukuy imapa hawanpi tanteasqankunata wischupakusqankuraykum,

¹²sasa llamkaykunawan ñakarichisqa karqaku, wichiykuptinkupas manam pipas sayarichiqninku karqachu.

¹³Llakikuypi kaspankum Tayta Diosta qayakurqaku, hinaptinmi sasachakuyninkumanta hurqoykurqa.

¹⁴Sinchi tutayaymantam paykunata hurqoykurqa, presochaqninku cadenatam tipiparurqa.

¹⁵Kuyakuyninmanta Tayta Diosman graciasta qoychik, runakunapaq milagronkuna ruwasqanmanta graciasta qoychik.

¹⁶Broncemanta punkukunatam pakiparurqa, fierromanta cerrojokunatam chamchaparurqa.

¹⁷Mana kasukusqankuraykum onqorqaku, huchankumantam ñakarirqaku,

¹⁸ima mikuytapas lliwmi millakururqaku, wañuypa patanpiñam tarikurqaku.

¹⁹Llakikuypi kaspankum Tayta Diosta qayakurqaku, Diosñataqmi sasachakuyninkumanta hurqoykurqa.

²⁰Rimapayamuspanmi paykunata hampiykurqa, wañuymantam paykunata libraykurqa.

²¹Kuyakuyninmanta Tayta Diosman graciasta qoychik. Runakunapaq milagronkuna ruwasqanmanta graciasta qoychik.

²²Sonqoykichikmanta reqsikuynikichikta payman qoychik, admirakuypaq ruwasqankunamanta kusikuywan willakuychik.

²³Lamar qochanta barcokunawan riqkunam, lamar qochapi negocio ruwaqkunam,

²⁴Tayta Diospa ruwasqankunata rikurqaku, lamar qochapi unanchasqankunata rikurqaku.

²⁵Rimarispanmi sinchillataña wayrachimurqa, olakunatam altokunaman hoqarichirqa.

²⁶Chaymi paykunaqa altomanraq uraymanraq apaykachasqa karqaku, lamar qochapa ukunmanraqmi uraykachisqa karqaku, runakunam pasaypaqta hukmanyarurqaku.

²⁷Machasqa hinam pasaypaq tamsaykacharqaku, barco manejay yachasqankupas manam yanaparqachu.

²⁸Llakikuypi kaspankum Tayta Diosta qayakurqaku, Diosñataqmi sasachakuymanta hurqoykurqa.

²⁹Sinchi wayratam sayarachirqa, hatun olakunatam hawkayarachirqa.

³⁰Chaykuna hawkayaruptinmi chayraq kusikurqaku, Tayta Dios yanapaptinmi munasqanku llaqtaman chayarqaku.

³¹Kuyakuyninmanta Tayta Diosman graciasta qoychik, runakunapaq admirakuypaq kaqkuna ruwasqanmanta graciasta qoychik.

³²Llaqtapa huñunakuyninpiyá hatunchaychik, ancianokunapa huñunakuyninpiyá yupaychaychik.

³³Mayukunatam chaki wayqoman tikran, pukyukunatam chaki allpaman tikran.

³⁴Kawsay qespinan allpakunatam qollpa allpaman tikran, chaypi yachaqkunapa huchanmantam chaynata ruwan.

³⁵Chunniq allpatam yakuyuq allpamanña tikran, chaki allpatam pukyuyuq allpamanña tikran.

³⁶Chaypim yarqaymanta kaqkunata churarqa, paykunañataqmi yachananku llaqtakunata hatarichinku.

³⁷Chakrakunapim tarpunku, uvas plantakunatam tarpunku, achkallatañam cosechanku.

³⁸Dios bendeciptinmi achkallataña mirarqaku; Dios bendeciptinmi animalninkupas mana qollurqachu.

³⁹Asllayachisqa, humillachisqam paykunaqa karqaku; ñakariypi, sasachakuypi, llakikuypim karqaku.

⁴⁰Diosqa millakunmi ñakarichikuq munaychakuqkunataqa, chaynakunataqa mana ñanpa kanan chunniqpim purichin.

⁴¹Wakchakunatam ñakarisqankumanta hoqarin, ovejakunata hinam ayllunkunatapas mirachin.

⁴²Allin ruwaq runakunam qawaspa kusikunku, mana allin ruwaqkunañataqmi upallanku.

⁴³Yachayniyuq runaqa chaykunapi yuyaymanaspam Tayta Diospa kuyapayakuyninta reqsinqa.