Read CHUYA QELLQA La Biblia en Quechua de Ayacucho 2012 Salmos 115 Bible Online

Salmos 115 - CHUYA QELLQA La Biblia en Quechua de Ayacucho 2012 bible

Salmos 115

¹Dios Taytalláy, amayá ñoqaykuchu hatunchasqaqa kasaqku; llakipayakuq kasqaykimantawan cheqap kaynikimantaqa sutikiyá hatunchasqaqa kachun.

²Imanasqataq runakuna tapunakunku: ¿Maypitaq Israelpa Diosninku kachkan? nispanku.

³Chaymi niniku: Diosniykuqa hanaq pachapim kachkan. Payqa tukuy munasqantam ruwarqa, nispayku.

⁴Paykunapa idolonkuqa qorimanta qollqemantam, chaykunaqa runakunapa ruwasqallanmi.

⁵Siminkupas kanmi, ichaqa manam rimankuchu, ñawinkupas kanmi, ichaqa manam qawakunkuchu.

⁶Rinrinkupas kanmi, ichaqa manam uyarikunkuchu, senqankupas kanmi ichaqa manam muskinkuchu.

⁷Makinkupas kanmi, ichaqa manam llapchankuchu, chakinkupas kanmi, ichaqa manam purinkuchu, kunkayuq kaspapas manam qaparinkuchu.

⁸Haykam idolokuna ruwaqkunaqa, chay idolokunamanmi rikchakun, idolokunaman hapipakuqqa, chaykunamanmi rikchakun.

⁹Israelpa mirayninkuna, Tayta Diosman hapipakuychik, paymi yanapaspa waqaychawaqninchikqa.

¹⁰Aaronpa mirayninkuna, Tayta Diosman hapipakuychik, paymi yanapawaqninchikqa, paytaqmi nanachikuwaqninchikpas.

¹¹Tayta Diosta manchakuqkuna, Tayta Diosman hapipakuychik, paymi yanapaspa waqaychawaqninchikqa.

¹²Tayta Diosmi yuyariykuwanchik, paymi bendeciwasunchik. Israelpa mirayninkunatam bendecinqa, Aaronpa mirayninkunatam bendecinqa.

¹³Tayta Diosqa kasukuqninkunatam bendecinqa, hatuntapas taksatapas paymi bendecinqa.

¹⁴Tayta Diosmi achkanpi mirachisunkichik, churikichiktapas achkanpim mirachinqa.

¹⁵Hanaq pachapas kay pachapas unanchaq Tayta Diospa bendecisqanyá kaychik.

¹⁶Hanaq pachaqa Tayta Diospam, kay pachatañataqmi runakunaman qorqa.

¹⁷Wañusqakunapa kasqanman uraykuqkunaqa, haykam wañukuqkunaqa, manañam Diostaqa yupaychayta atinmankuñachu.

¹⁸Ñoqanchikmi ichaqa Tayta Diosta hatunchasunchik, kunanmanta wiñaykama. ¡Aleluya!