Read CHUYA QELLQA La Biblia en Quechua de Ayacucho 2012 Salmos 119 Bible Online

Salmos 119 - CHUYA QELLQA La Biblia en Quechua de Ayacucho 2012 bible

Salmos 119

¹(Kay Salmoqa iskay chunka iskayniyuqman rakisqam kachkan, sapa rakipa qallariyninmi alfabeto hebreo letrawan rakisqa kachkan). ¡Mayna kusisqam allinta kawsakuspa Tayta Diospa kamachikuyninman hina puriqkunaqa!

²Mayna kusisqam kamachikuyninkunata waqaychaspa tukuy sonqowan maskaqninkunaqa.

³Diospa ñanninpi puriqkunaqa manam huchataqa ruwankuñachu.

⁴Qanmi kamachikurqanki, leynikikuna imam nisqanman hina ruwayman churasqa kananpaq.

⁵Allin kawsakuytam munani chaynapi kamachikuynikita kasukunaypaq.

⁶Kamachikuynikikunata kasukuspayqa manam penqaypiqa tarikusaqchu.

⁷Kamachikuynikikunata yachaykuspayqa cheqap sonqowanmi yupaychasqayki.

⁸Kamachikuynikikunatam kasukusaq, amayá haykapipas saqerullawaychu.

⁹Jovenqa, ¿imaynatataq kawsayninta chuyanchanman? Kamachikuynikita ruwayman churaspanmi.

¹⁰Tukuy sonqoywanmi maskarqayki, kamachikuynikikunamanta karunchakunaytaqa amayá munaychu.

¹¹Contraykipi mana huchallikunaypaqmi, palabraykikunata sonqoypi waqaycharqani.

¹²¡Ancha hatun Dios Taytalláy! Kamachikuynikikunata yachachiway.

¹³Simiywanmi willakurqani llapa yachachikuykuna niwasqaykita.

¹⁴Tukuy ima kaqkunamantapas aswanqa kamachikuynikikunapim kusikurqani.

¹⁵Yachachikuynikikunapim yuyaymanasaq, munasqaykiman hinam kawsasaq.

¹⁶Kamachikuynikikunapim kusikusaq, palabraykitaqa manam qonqasaqchu.

¹⁷Kay serviqnikita yanapaykullaway, simikitaqa kawsanaykamam kasukusaq.

¹⁸Ñawillayta kichaykuway suma-sumaq yachachikuynikikunata qawanaypaq.

¹⁹Kay pachapiqa manam wiñaypaqchu kawsasaq, amayá kamachikuynikikunata ñoqamanta pakaychu.

²⁰Almaymi llakisqa tarikun yachachikuynikikunata tukuy tiempo munapayasqaypi.

²¹Kamachikuynikita saqeq mana kasukuq millay runakunatam qaqchanki.

²²Penqaypi kaytawan qepanchasqa kaytayá ñoqamanta sapaqchay, nisqaykikunatam ñoqaqa kasukurqani.

²³Kamachikuqkunam huñunakuruspanku contraypi rimanakunku, chaywanpas kay serviqnikiqa kamachikuynikikunapim yuyaymanasaq.

²⁴Kamachikuynikikunapim kusikuni, kamachikuynikikunaqa consejaqniykunam.

²⁵Almaymi pasaypaq tuñisqa tarikun, palabraykiman hina kawsarichiway.

²⁶Imaynam kawsakuyniyta willakuptiymi contestaykuwarqanki, kamachikuynikikunata yachaykachiway.

²⁷Kamachikuynikikunata yachaykachiwaptikiqa, ruwasqaykikunapim yuyaymanasaq.

²⁸Sinchi llakikuypim tarikuni, nillawasqaykiman hina kallpanchaykullaway.

²⁹Llullakuymanta sapaqchaykuway, yachachikuynikiwan yanapaykuway.

³⁰Cheqap ñantam akllakuruni, kamachikuynikikunatam kasukusaq.

³¹Dios Taytalláy, kamachikuynikimanmi hapipakuni, amayá penqaymanqa churallawaychu.

³²Kamachikuynikikuna kasukunaypaqmi kallpanchakuni, qamllam sonqollaytapas kusichinki.

³³Dios Taytalláy, kamachikuynikita reqsiykachiway, wañukunaykama kasukunaypaq.

³⁴Kamachikuynikita kasukunaypaq yachayta qoykuway, tukuy sonqowan kasukuytam munani.

³⁵Kamachikuynikikunaman hina kawsachikuway, kamachikuynikipim kusikuyta tarini.

³⁶Kamachikuynikikuna kuyaqtayá sonqollayta ruwaykuy, mana allinkunata ruwaspa apuyaruymanta waqaychaykuway.

³⁷Ñawillaytayá sapaqchaykuy mana allinkuna qawaymanta, ñannikipi munasqaykiman hina purinaypaq.

³⁸Kay kasukuq serviqnikiman imam prometesqaykita cheqapchaykuy.

³⁹Penqaypi kayta ñoqamanta karunchay, chaytaqa manchakunim, yachachikuynikikunaqa allinmi.

⁴⁰Ñoqaqa kamachikuynikikunatam kuyani allin juzgaq kaynikipi kawsachiway.

⁴¹Dios Taytalláy, kuyapayakuynikita qawaykachiway, prometewasqaykiman hina salvaykullaway,

⁴²hinaptinqa palabraykipi hapipakusqayraykum kamiwaqniykunatapas chaywan kutichikusaq.

⁴³Cheqap rimaytaqa amayá simiymanta qechuychu, kamachikuynikikunapim ñoqaqa hapipakuchkani.

⁴⁴Ñoqaqa kamachikuynikikunatam wiña-wiñaypaq kasukusaq.

⁴⁵Kamachikuynikikunata kasukusqayraykum hawkaña kawsakusaq.

⁴⁶Kamachikuynikikunatam reykunapa ñawpaqninpi mana penqakuspay rimasaq.

⁴⁷Kamachikuynikikunatam kuyani, kamachikuynikikunapim kusikuni.

⁴⁸Kamachikuynikikunatam kuyani, kamachikuynikikunatam munani, kamachikuynikikunapim yuyaymanani.

⁴⁹Kay serviqnikiman rimarisqaykita yuyariy, chaypi hapipakunaypaqmi qoykuwarqanki.

⁵⁰Llakipi kachkaptiymi simillayki sonqollayta tiyaykachin, rimapayawasqaykikunam kawsarichiwan.

⁵¹Hatun tukuq runakunam ñoqamanta llumpayta burlakunku, chaywanpas yachachikuynikimantaqa manam karunchakunichu.

⁵²Dios Taytalláy, ñawpaq kamachikuynikikunatam yuyarini, chaykunawanmi sonqollayta tiyachini.

⁵³Kamachikuynikikunata mana allin runakuna qepanchaptinkum llumpayta piñakuni.

⁵⁴Runapa llaqtanpi yachaspaypas kamachikuynikikunatam takirqani.

⁵⁵Dios Taytalláy, tutanpas sutikita yuyarispaymi, yachachikuynikikunata kasukuni.

⁵⁶Ñoqapa ruwanayqa kamachikuynikikuna kasukuymi.

⁵⁷Dios Taytalláy, qamllam tukuy ima kapuqniypas kanki, ñoqaqa palabraykitam ruwayman churasaq.

⁵⁸Tukuy sonqoywanmi uyallaykita maskarqani, promesaykiman hinayá llakipayariykullaway.

⁵⁹Imaynam kawsasqayta qawarispaymi, kamachikuynikikunata kasqallan kasukurqani.

⁶⁰Kamachikuynikikunata kasukunaypaqmi kallpanchakurqani, chayllam ruwayman churarqani.

⁶¹Mana allin runakunam chawpicharuwanku, chaywanpas yachachikuynikitaqa manam qonqanichu.

⁶²Cheqap nisqaykikunamanta graciasta qonaypaqmi chawpi tutata hatarini.

⁶³Ñoqaqa kamachikuynikikunata waqaychaspa kasukuqkunapa puriqmasinmi kani.

⁶⁴Dios Taytalláy, kuyapayakuynikipa huntaykusqanmi kay pachaqa kachkan; kamachikuynikikunata yachaykachiway.

⁶⁵Dios Taytalláy, rimapayawasqaykiman hinam, kay serviqnikiwan allinta ruwarqanki.

⁶⁶Yachaytawan allin ruwaytayá yachaykachiway, ñoqaqa kamachikuynikikunapim hapipakuni.

⁶⁷Manaraq uchuychasqa kaspayqa chinkasqam purirqani, kunanmi ichaqa Chuya simikitaña kasukuni.

⁶⁸Qamqa kuyakuqmi kanki, qamqa allinlla ruwaqmi kanki; kamachikuynikikunatayá yachaykachiway.

⁶⁹Hatun tukuqkunam yanqamanta tumpawanku, chaywanpas tukuy sonqoywanmi kamachikuynikikunata kasukuni.

⁷⁰Paykunaqa paqway rumi sonqom, ñoqam ichaqa yachachikuynikikunapi kusikuni.

⁷¹Allinpaqmi uchuychasqa karqani, chaynapi kamachikuynikikunata yachanaypaq.

⁷²Ñoqapaqqa waranqantin qorimantawan qollqemantapas kamachikuynikikunam aswan allinqa.

⁷³Makikiwan ruwaspam unanchawarqanki, kamachikuynikikunata yachanaypaqyá yachayta qoykullaway.

⁷⁴Palabraykipi hapipakusqayraykum kasusuqnikikuna rikuwaspanku kusikunqaku.

⁷⁵Dios Taytalláy, kamachikuynikikunaqa cheqapmi, huchaymantam ñakarichiwankipas.

⁷⁶Promesaykiman hina kay serviqnikita, kuyakuynikiwan kusiykachillaway.

⁷⁷Llakipayakuynikiwan kawsachikuway, yachachikuynikikunapim ñoqaqa kusikusaq.

⁷⁸Hatun tukuqkuna penqaypi tarikuchunku, paykunaqa yanqamantam ñakarichiwanku, ñoqam ichaqa kamachikuynikipi yuyaymanasaq.

⁷⁹Kamachikuynikikuna yachaqkunayá ñoqawan kuska huñunakuchunku.

⁸⁰Kamachikuynikikunaman hinayá sonqoypas kachun, mana penqakuypi kanaypaq.

⁸¹Salvacionnikimantam almallay wañunayachkanña, chaywanpas ñoqallayqa palabraykipim hapipakuchkani.

⁸²Promesaykikunata suyasqaypim ñawillaypas pisiparunña, chayraykum tapukullani: ¿Haykapitaq sonqollay tiyaykachiq hamunki? nispay.

⁸³Qosnipi chakiruq odre hinaña kaspaypas, kamachikuynikikunataqa manam qonqanichu.

⁸⁴¿Haykapikamataq kay serviqniki kawsanqa? ¿Haykapitaq qatikachawaqniykunata juzganki?

⁸⁵Yachachikuynikita mana kasukuspa hatun tukuq runakunam, wichichiwanankupaq ñanniypi trampakunata churarunku.

⁸⁶Mana imamantam ñakarichiwanku, yanapaykullaway; kamachikuynikikunaqa cheqapmi.

⁸⁷Yaqallam kay pachamantapas chinkarachiwanku, chaywanpas kamachikuynikikunataqa manam saqerqanichu.

⁸⁸Ancha kuyakuynikiman hina kawsarichiway, kamachikuynikikunata kasukunaypaq.

⁸⁹Dios Taytalláy, palabraykiqa wiña-wiñaypaqmi; hanaq pachapim sapinchasqa kachkan.

⁹⁰Hapipakunapaq kaynikiqa miraymanta-miraykamam, kay pachapas sapinchaptikim takyachkan.

⁹¹Qam kamachiptikim tukuy imakunapas kunankama takyachkan, tukuy chaykunam qamllata servisunki.

⁹²Yachachikuynikikunapi mana kusikuptiyqa, llakikuychá wañurachiwanmanña karqa.

⁹³Kamachikuynikikunataqa manam haykapipas qonqasaqchu, chaykunawanmi kawsachikuwarqanki.

⁹⁴Qamllapam kani, salvaykullaway, ñoqaqa kamachikuynikikunatam kasukurqani.

⁹⁵Mana allin runakunam wañuchiwanankupaq muyuruwanku, chaywanpas ñoqaqa kamachikuynikikunapim hapipakusaq.

⁹⁶Qawasqayman hinaqa imaña sumaq kaqpas tukuruqllam, kamachikuynikikunam ichaqa mana haykapipas tukunqachu.

⁹⁷¡Maynatam yachachikuynikita kuyallani! sapa punchawmi chayllapi yuyaymanani.

⁹⁸Kamachikuynikikunawanmi llapa enemigoymantapas aswan yachayniyuqta ruwaykuwanki, kamachikuynikikunaqa ñoqawanmi kachkan.

⁹⁹Yachachikuynikipi yuyaymanasqayraykum yachachiqniykunamantapas aswan yachayniyuqraq rikuriruni.

¹⁰⁰Kamachikuynikikunata kasukusqayraykum yuyaqkunamantapas aswan yachayniyuq rikuriruni.

¹⁰¹Kamachikuynikikunata kasukunaypaqmi chakillaytapas mana allin ñanmanta asuchirqani.

¹⁰²Yachachiqniy kasqaykiraykum kamachikuynikikunamantaqa mana rakikurqanichu.

¹⁰³Simillaypaqpas mayna miskillañam palabraykiqa, mielmantapas aswan miskiraqmi.

¹⁰⁴Kamachikuynikikunamantam yachayta chaskiruni; chayraykum tukuy mana allin kawsaytaqa cheqnini.

¹⁰⁵Palabraykiqa chakiykunata achkiriq mechero hinam, purinay ñantam kancharin.

¹⁰⁶Kamachikuynikikunata kasukunaypaqmi jurarqani.

¹⁰⁷Sinchi llakisqam tarikuni, palabraykiman hina kawsarichillaway.

¹⁰⁸Dios Taytalláy ruegakuykim, alabasqaytayá ofrendata hina chaskiykuway, kamachikuynikikunata yachaykachiway.

¹⁰⁹Wañuypa patanpiña tarikuspaypas yachachikuynikikunataqa manam qonqanichu.

¹¹⁰Mana allin runakuna wichichiwayta munaptinkupas, tukuy yachachikuynikimantaqa manam karunchakusaqchu.

¹¹¹Kamachikuynikikunam wiñaypaq herenciayqa, paykunaqa sonqollaytam kusichin.

¹¹²Kamachikuynikikunata tukuy sonqoywan wiñaypaq kasukunaypaqmi tanteakuruni.

¹¹³Iskay uya runakunataqa cheqninim yachachikuynikitam ichaqa kuyani.

¹¹⁴Qamqa pakaykuqniymi kanki, harkaykuqniymi kanki, ñoqaqa palabraykipim suyallasaq.

¹¹⁵Mana allin runakuna, ñoqamanta anchuriychik. Diosniypa kamachikuyninkuna kasukuytam munani.

¹¹⁶Promesaykiman hina kallpanchaykuway hinaptinqa kawsasaqmi; ¡amayá penqaypiqa saqerullawaychu!

¹¹⁷Yanapawaptikiqa salvasqam kasaq, kamachikuynikikunatapas mana pisipaspam kasukusaq.

¹¹⁸Kamachikuynikikunamanta karunchakuqtaqa puchukachinkim, paykunapaqqa sakri kayninkupas pantayllam.

¹¹⁹Mana allin runakunataqa qopata hinam wischunki, chayraykum ñoqaqa kamachikuynikikunata kuyani.

¹²⁰Qayllaykipim manchakuymanta katkatatani, kamachikuynikitam sinchita manchakuni.

¹²¹Allin kaqtawan allin kawsakuytam ruwayman churarqani, amayá ñakarichiqniykunapa makinmanqa wischuykullawaychu.

¹²²Allinllata kawsachikuway, amayá hatun tukuqkuna ñakarichiwanantaqa munaychu.

¹²³Ñawillaymi utirunña salvacionnikita suyaspa, promesaykiman hina librawanaykita suyaspa.

¹²⁴Kuyapayakuynikiman hinayá kay serviqnikita ruwaykullaway, kamachikuynikikunatayá yachaykachillaway.

¹²⁵Serviqnikim kani, kamachikuynikikunata reqsinaypaq yachayta qoykullaway.

¹²⁶Dios Taytalláy, ñam ruwanayki tiempoña, kamachikuynikikunatam mana kasukunkuchu.

¹²⁷Chayraykum kamachikuynikikunata kuyani, chuyay-chuyay qorimantapas aswantam kuyani.

¹²⁸Kamachikuynikikunaman hinam kawsakuni, tukuy mana allin kawsaytam cheqnini.

¹²⁹Kamachikuynikikunaqa suma-sumaqmi, chayraykum kasukuni.

¹³⁰Palabraykipa yachachikuyninqa achkiymi llampu sonqoyuqkunatam yachachin.

¹³¹Kamachikuynikikunata munasqayraykum yarqasqa hinaña suyallachkani.

¹³²Kuyasuqnikikunawan ruwasqaykita hina, qawariwaspayki llakipayariykullaway.

¹³³Palabraykiman hina kawsachikuway, amayá huchaqa munaychakuruwachunchu.

¹³⁴Runakunapa ñakarichikuyninmanta libraykullaway, kamachikuynikikunata kasukunaypaq.

¹³⁵Kay serviqllaykita qawariykullaway, kamachikuynikikunata yachaykachillaway.

¹³⁶Kamachikuynikikunata mana kasukusqankuraykum weqellaypas mayu hinaraq paqcharichkan.

¹³⁷Dios Taytalláy, qamqa allin kaqkuna ruwaqmi kanki; yachachikuynikikunaqa cheqapmi.

¹³⁸Kamachikuynikikunaqa cheqapmi, yachachikuynikikunaqa mana pantayniyuqmi.

¹³⁹Palabraykiraykum anchallataña sientikuruni palabraykita enemigoykuna qonqarusqanrayku.

¹⁴⁰Palabraykiqa chuyay-chuyaymi, chayraykum kay serviqnikiqa anchata kuyallani.

¹⁴¹Mana pipapas qawarinanña kaspaypas, kamachikuynikikunataqa manam qonqanichu.

¹⁴²Qamqa wiñaypaq allin ruwaqmi kanki, yachachikuynikipas cheqapmi.

¹⁴³Ñakariywan llakikuymi inturuwan, chaywanpas kamachikuynikikunam kusiykachillawan.

¹⁴⁴Kamachikuynikikunaqa wiñaypaq mana pantayniyuqmi, yachayta qoykullaway, hinaptinqa kawsasaqmi.

¹⁴⁵Dios Taytalláy, tukuy sonqoywanmi qayakamullayki; uyariykullaway, kamachikuynikikuna kasukuytam munani.

¹⁴⁶Salvaykuwanaykipaqmi qayakamullayki, kamachikuynikikuna kasukuytam munani.

¹⁴⁷Tutapayta hatarispaymi yanapaykuwanaykipaq qayakamullayki, palabraykipim hapipakullani.

¹⁴⁸Palabraykipi yuyaymananaypaqmi mana puñuykuspa tukuy tuta rikchani.

¹⁴⁹Dios Taytalláy, kuyakuynikiman hina uyariykullaway; allin ruwaynikiman hina kawsarichillaway.

¹⁵⁰Qatikachawaqniykunaqa hichpallaypim kachkanku, paykunaqa yachachikuynikimantapas karunchakurunkum.

¹⁵¹Dios Taytalláy, qamqa hichpallaypim kachkanki, kamachikuynikikunapas cheqapmi.

¹⁵²Kamachikuynikikunataqa unayñam reqsini, kamachikuynikikunataqa wiñaypaqmi takyachirqanki.

¹⁵³Ñakarisqayta qawarispayá libraykullaway, yachachikuynikitaqa manam qonqallanichu.

¹⁵⁴Sasachakuyniyta qawarispayá libraykullaway, nisqaykiman hinayá kawsachillaway.

¹⁵⁵Mana allin ruwaqkunaqa manam salvakunqakuchu, kamachikuynikikunata qepanchasqankurayku.

¹⁵⁶Dios Taytalláy, llakipayakuynikiqa ancha hatunmi; yachachikuynikiman hina kawsachillaway.

¹⁵⁷Enemigoykunawan ñakarichiqniykunaqa achkallañam, chaywanpas kamachikuynikikunamantaqa manam rakikunichu.

¹⁵⁸Iskay uya runakunata qawaspaymi anchata piñakurqani, palabraykikunata mana kasukusqankuraykum piñakurqani.

¹⁵⁹Dios Taytalláy, kamachikuynikikuna kuyasqaytayá qawariy, kuyakuynikiman hinayá kawsachillaway.

¹⁶⁰Llapallan palabraykikunaqa cheqapmi, kamachikuynikikunaqa wiñaypaq mana pantaqmi.

¹⁶¹Kamachikuqkunam mana imamanta qatikachawanku, chaywanpas ñoqaqa palabraykitam manchakuni.

¹⁶²[3]Qori-qollqeta tarikuq hinaraqmi palabraykipi sinchita kusikullani.

¹⁶³Llullakuytaqa llumpaytam cheqnini, pasaypaqtam millakuni; yachachikuynikitam ichaqa kuyani.

¹⁶⁴Mana pantaq kamachikuynikikunamantam sapa punchaw mana pisipaspa yupaychayki.

¹⁶⁵Yachachikuynikita kuyaqkunaqa llumpay hawkayaypim kawsakunku, paykunaqa manam haykapipas urmanqakuchu.

¹⁶⁶Dios Taytalláy, salvaykuwanaykitam suyallachkani, kamachikuynikikunatapas ruwaymanmi churallani.

¹⁶⁷Chuya simikita kasukuspaymi, tukuy sonqoymanta kuyani.

¹⁶⁸Yachachikuynikikunatawan kamachikuynikikunatam kasukuni, qamllam yachanki imaynam kawsasqaytapas.

¹⁶⁹Dios Taytalláy, qayakuyniyta uyariykullaway; palabraykiman hina yachayta qoykullaway.

¹⁷⁰Mañakusqayta chaskiykullaway, prometewasqaykiman hina libraykullaway.

¹⁷¹Kamachikuynikikunata yachaykachiwaptikiqa llumpaytam yupaychasqayki.

¹⁷²Kamachikuynikikunamantam yupaychasqayki llapallan palabraykikunaqa cheqapmi.

¹⁷³Kamachikuynikikunatam ñoqaqa akllakurqani, atiynikiwanyá chaylla yanapaykuway.

¹⁷⁴Dios Taytalláy, salvaykuwanaykitam anchata munallani, yachachikuynikikunapim kusikullani.

¹⁷⁵Qamta yupaychanaypaqmi kawsayta munallani, yachachikuyniki yanapaykullawachun.

¹⁷⁶Kay serviqllaykita maskaykullaway, chinkasqa oveja hinam purillachkani; kamachikuynikikunataqa manam qonqarqanichu.