Read CHUYA QELLQA La Biblia en Quechua de Ayacucho 2012 Salmos 132 Bible Online

Salmos 132 - CHUYA QELLQA La Biblia en Quechua de Ayacucho 2012 bible

Salmos 132

¹Diosman asuykunapaq taki Dios Taytalláy, Davidmanta yuyariy, ñakariyninkunamanta yuyariy.

²Jacobpa Atiyniyuq Diosnin, juramentaspa kayna prometekususqaykita yuyariy:

³Manam wasiyman yaykusaqchu nitaqmi puñunaypipas samaykusaqchu,

⁴manam ñawiytapas wichqaykusaqchu nitaqmi asllatapas puñusaqchu,

⁵Tayta Diospaq sitiota tarinaykama, Jacobpa Tukuy Atiyniyuq Diosninpaq wasinta hatarichinaykama, nispa.

⁶Efrata lawpi kachkaspaykum Diospa Arcanmanta uyarirqaniku, hinaspam Quiriat-jearim lawpiña tarirurqaniku.

⁷Diospa wasinman hakuchik, hinaspa ñawpaqninpi qonqorakamusunchik.

⁸Dios Taytalláy hatariy, atiyniki Arcaykipiwan maymi samanayki moqoman hamuy.

⁹Sacerdotekikunapas allin ruwaywan pachakuchunku, chuyanchasqaykikunapas kusikuymanta qaparichunku.

¹⁰Serviqniki Davidta kuyasqaykirayku rey kananpaq sapaqchasqaykita ama qepanchaychu.

¹¹Tayta Diosmi Davidman juramentowan prometespan nirqa: “Miraynikimantam hukkaqninta tronoykiman churasaq.

¹²Sichum miraynikikuna pactoyta kasukuptinkuqa, yachachisqay kamachikuykunata waqaychaptinkuqa, paykunapa mirayninkunapas wiñaypaqmi tronoykimanta munaychakunqaku”, nispa.

¹³Tayta Diosmi Sión moqota chaypi yachananpaq akllakuspan nirqa:

¹⁴Kaypim yachanay wasita hatarichisaq, kaymantam wiñaypaq munaychakusaq, chaynatam tantearuni.

¹⁵Tarpukuyninkutapas sinchitam ruruchisaq, paykuna ukupi wakchakunatam saksanankukama mikuchisaq.

¹⁶Sacerdotenkunatapas salvacionniywanmi pachachisaq, chuyankunapas kusikuymantam qaparinqaku.

¹⁷Chaypim Davidpa mirayninmanta atiyniyuq reyta hatarichisaq, kaypim wiñaypaq munaychakunqa.

¹⁸Enemigonkunatam penqayman churasaq, paypa munaychakuyninmi ichaqa kancharinqa, nispa.