Read CHUYA QELLQA La Biblia en Quechua de Ayacucho 2012 Salmos 139 Bible Online

Salmos 139 - CHUYA QELLQA La Biblia en Quechua de Ayacucho 2012 bible

Salmos 139

¹Davidpa takisqan Dios Taytalláy, sonqollayta qawaykuwaspaykim pim kallasqayta reqsiwanki.

²Tiyasqaytawan hatarisqaytapas yachankim, ima piensasqaypas qampaqqa yachasqallaykim.

³Purisqaytawan samasqaytapas sumaqtam yachanki, imayna kawsasqaypas yachasqallaykim.

⁴Dios Taytalláy, manaraqpas rimarichkaptiymi, imam rimanaytapas yachankiña.

⁵Muyuriykuwaspam waqaychaykuwanki, makillaykiwanmi pakaykuwanki.

⁶Admirakuypaq yachaynikikunaqa hatu-hatunmi, mana haypay atinam; hatun kasqanraykum mana entiendeyta atinichu.

⁷¿Maymantaq Espirituykimanta riyman? ¿Maymantaq qayllaykimanta ayqeyman?

⁸Hanaq pachaman qespiptiypas chaypim kachkanki, wañuqkunapa kasqanmanña uraykuptiypas chaypim kachkanki.

⁹Intipa qespimunan lawmanña pawariptiypas, intipa seqaykunan lawpiña yachaptiypas,

¹⁰chaypipas makikiwanmi pusawanki, alleq makikiwanmi takyachiwanki.

¹¹Tutayaymi pakaykuwanqa niptiypas, muyuriqniypi achkiña tutayaruptinpas,

¹²tutayaypas manam qanmantaqa pakawanmanchu, tutayaypas punchaw hinam kancharin; tutayaypas achkiypas qampaqqa chaynallam.

¹³Qanmi cuerpoypa ukunpi kaqkunata ruwarqanki, qanmi mamaypa wiksanpi ruwaykuwarqanki.

¹⁴Admirakuypaq unanchawasqaykimantam yupaychayki; ruwasqaykikunaqa ancha admirakuypaqmi, kaykunataqa sumaqtam yachani.

¹⁵Pakasqallapi tulluypa wiñasqanpas qanmantaqa manam pakasqachu karqa. Allpapa ukunpi hina wiñasqaypas qanmantaqa manam pakasqachu karqa.

¹⁶Sulluchallaraq kachkaptiymi rikuwarqankiña, manaraq huk punchawllapas kawsachkaptiyqa hayka watam kawsanaytapas yacharqankiñam, tukuy chaykunam libroykipi qellqasqaña karqa.

¹⁷Diosnilláy, ¡mayna suma-sumaqmi yuyaymanaynikikunaqa! ¡Mana yupay atinam!

¹⁸Yupaptiypas aqo hinaña mana yupay atinam, sichum yupayta tukuruspapas qanwanmi kachkani.

¹⁹Diosnilláy, millay ruwaq runakunata wañurachiy, runa wañuchiqkunata ñoqamanta sapaqchay.

²⁰Paykunaqa contraykipim mana allinkunata rimanku; sutikitapas yanqapaqmi rimanku.

²¹Dios Taytalláy, ¿manachum cheqnisuqnikikunata ñoqapas cheqnini? ¿Manachum enemigoykikunapaq ñoqapas piñakuni?

²²Pasaypaqtam cheqnini, enemigoykunapaqmi hapini.

²³Diosnilláy, sumaqta qawapaykuwaspa sonqollayta reqsiykuy; pruebaykuwaspa tukuy yuyaymanayniykunata reqsiykuy.

²⁴Sichum mana allin ñanninta puriptiyqa, munasqaykiman hina kawsakuyta yachachiway.