Read CHUYA QELLQA La Biblia en Quechua de Ayacucho 2012 Salmos 147 Bible Online

Salmos 147 - CHUYA QELLQA La Biblia en Quechua de Ayacucho 2012 bible

Salmos 147

¹¡Aleluya! ¡Tayta Diosta yupaychaychik! Mayna allinmi takikunawan Diosta yupaychayqa, takinkunapas miskillañam.

²Tayta Diosmi Jerusalenta huktawan hatarichinqa, Israelmanta cheqechisqa kaqkunatam huñumunqa.

³Payqa llakisqa sonqoyuqkunatam hampiykun, heridankutam hampiykun.

⁴Payqa hayka chaskakuna kasqanta yupaqmi, sapa chaskakunatam sutinmanta qayan.

⁵Diosninchikqa hatunmi, atiyninpas ancha hatunmi, yachayninpas mana tukuqmi.

⁶Tayta Diosqa uchuychakuqkunatam hatunchan, mana allin ruwaq runatam ichaqa pampakama uchuychan.

⁷Tayta Diosman takiychik, Diosninchikman arpawan takiychik.

⁸Payqa cielokunata puyuwan huntachiqmi, allpaman parata chayachimuqmi, orqokunapi qorakunata wiñachiqmi.

⁹Paymi animalkunata mikuchin, mallqo ullachkukunatam waqaptin mikuchin.

¹⁰Caballopa kallpanwanpas manam kusikunchu, nitaqmi runapa kallpanwanpas kusikunchu.

¹¹Tayta Diosqa kasukuqninkunapim kusikun, kuyakuyninpi hapipakuqninkunapim kusikun.

¹²Jerusalén llaqta, Tayta Diosta yupaychay, Sión llaqta, Diosnikita yupaychay.

¹³Payqa punkuykikunatam takyachin, wawaykikunatam bendicen.

¹⁴Payqa llaqtaykiman hawkayay apamuqmi, allinnin trigowan saksachisuqnikim.

¹⁵Paymi palabranta kay pachaman willachimun, palabranñataqmi utqayman cheqerin.

¹⁶Rititapas millwata hinam chayachimun, lastatapas uchpata hinam chaqchurimun.

¹⁷Qasatam runtu parata hina chayachimun, chirita kacharimuspanmi yakuta rankachuchin.

¹⁸Rimariyninwanmi chullurichin, pukuriptinmi yakukunapas kallparin.

¹⁹Palabrankunatam Jacobman reqsichirqa, kamachikuynintawan yachachikuynintam Israelman yachachirqa.

²⁰Manam mayqan nacionwanpas chaynataqa ruwarqachu; chay nacionkunaqa manam yachachikuynintapas reqsirqakuchu. ¡Aleluya!